Umqeqetshi weqembu elimela ilizwe emdlalweni wenguqu, elama Warriors, uZdravko Logarusic, uthi akasoze abize abadlali abadlala beselizweni lase South Africa ukuba bazophatheka emdlalweni wokuzwana amandla leliqembu elizawudlala lele lele Malawi ensukwini ezilandelayo.
Uluhlu lwabadlali abazakuba yingxenye yeqembu lama Warriors elizakuyadibana leqembu elimela ilizwe lase Malawi lukhangelelwe ukuba lukhutshwe ngoLwesibili, njalo umqeqetshi uLogarusic uthi inengi labadlali abazabumba leliqembu ngabadlali abadlala phetsheya kolwandle.
“Sibize abadlali abadlala kuzwekazi lase Europe imbangela kuyikuba abadlali bethu abaselizweni lase South Africa sebelamaviki ambalwa bengadlali. Ngalokho ke sikubone kufanele ukuba siphe ithuba abadlali abadlala phetsheya kolwandle ukuba labo bebonakale ngoba phela laba abase South Africa bavele bona bayaziwa,” kutsho uLogarusic.
Umdlalo lo okumele ube phakathi kweqembu le Zimbabwe lele Malawi uhlelwe ukuba udlalwe ngeSonto khonale kwele Malawi njalo ngumdlalo wobungane.
Umqeqetshi uLogarusic uthi yena njengoba kungumdlalo wobungane uzabiza abadlali aleqiniso elokuba bonke bazathola ithuba lokudlala ngeSonto.
“Sizabiza abadlali abalitshumi lesikhombisa ngoba phela abalitshumi lanye yibo abazaqala ukudlala njalo sivunyelwe ukuba sifake abadlali abayisithupha bevela phandle. Lokhu sikwenza ngoba asingeke sibize umdlali odlala kwele Europe afike lapha singamdlalisi. Sifuna wonke ozabuya athole ithuba lokudlala,” kutsho uLogarusic.
Iqembu lama Warriors lilungiselela ukuphatheka kumncitiswano wokudinga amaqembu azakuyadlala kumidlalo ye Africa Cup of Nations njalo likhangelelwe ukudibana lele Algeria kabili ngenyanga ezayo.
Umdlalo wangeSonto nxa uzaphumelela uzabe ungowakuqala lapho umqeqetshi uLogarusic azakhokhela ilizwe le Zimbabwe enkundleni selokhu waphiwa lumsebenzi njengoba ezemidlalo zahle zamiswa yena esanda kuqhatshwa ngemva kokuba sekuqhamuke umkhuhlane we Corona.
Inhlelo zomdlalo wenguqu zilokhu zisamisiwe elizweni le Zimbabwe kodwa inhlanganiso ye Zimbabwe Football Association icele kuhulumende ukuba ivunyelwe ukuthumela iqembu lama Warriors kwele Malawi.
Abadlali bazahle baqonde kwele Malawi bevela emazweni abadlala kuwo.