Ingcwethi kwezombusazwe zithi ukuxabana okukubandla le MDC kuveza sobala ukuba ibandla leli kumele lilandele isisekelo salo sombuso ukuze lenqabele ukusiwa emthethwandaba lisipha ithuba ibandla le Zanu PF ukuthi lenze umathanda.
Lokhu kuza ngemva kukuba icele laleli bandla elikhokhelwa ngu Nkosikazi Thokozani Khuphe liphiwe imvumo yokukhokhela lelibandla lidale laphezulu ele Supreme Court ngoba uMnu. Nelson Chamisa ethiwa kalandelanga isisekelo sebandla aze athathe intambo zombuso ngemva kokubhubha kuMnu. Morgan Tsvangirai owayengumkhokheli wakuqala walelibandla.
Lokhu kusolwa licele elikhokhelwa ngu Chamisa lona elithi ibandla le MDC-T langena kukhetho lilodwa lanqotshwa okwesabekayo lathola izihlalo ezimbili nje kuphela. Bathi lelibandla lehlukene lebandla le MDC Alliance elancintisa kukhetho luka 2018 ngalokho umthethwaba bathi waphosisa isinqumo ngoba uKhuphe usephiwa ubukhokheli bebandla elamnqoba kukhetho.
Kodwa abanye abantu bathi ngabe ibandla leli liyalandela isisekelo sombuso walo ngabe akuladubo olufana lalolu.
Abanye bathi isiekelo sombuso webandla saqala ukwephulwa ngoweyengumongameli, uMnu. Tsvngirai aze ekhethe abanye abasekeli bakhe ababili, uChamisa lo Mnu. Elias Mudzuri yena evele elomsekeli wakhe, uKhuphe owayekethwe ngokusemthethweni ngumhlangano we congress.
Kuthe ngokubhubha kuka Tsvangirai ngomnyaka ka 2018, idale le National Council eye MDC-T labeka uMnu Nelson Chamisa ukuba ngu Mongameli khona kuloKhuphe obikwa wayengangeni emhlanganweni loTsvangirai esola ukubunjwa komanyano weMDC Alliance lamanye amabandla angamatshumi amabili.
UKhuphe, uMudzuri, locale waba ngunobhala jikelele uMnu. Douglas Mwonzora, owake waba ngumsekeli kamgcinisihlalo, uMnu. Morgan Komichi, othiwa wayelobudlelwano obuqatha lomuyi uTsvangirai labanye bathi akulandelwe isinqumo somthethwandaba we Supreme Court esithi kumele ibandla leMDC libuyele kuzigaba zengatsha, ama structures ngesilingu, awomnyaka ka 2014.
Kodwa abanye bathi uMwonzora loKomichi badinga izikhundla nje kuphela ngoba banqotshwa kukhetho lwedale le congress nyakenye yikho besiya kuKhuphe lapho ababikwa befuna ukuncintisa isikhundla sobukhokheli.
Icele likaChamisa lona lithi lenza umhlangano walo we congress, owawukhokhelwa nguKomichi lanquma ukuxotsha uKhuphe ebandleni leMDC Alliance goba wayesebumbe elakhe ele MDC-T kulandela isinqumo somthethwandaba esathi angasebenzisa igama lokuthi MDC-T.
Ingcwethi ezicubungula ezombusazwe zithi ukungalandelwa kwemithetho kubandla leli kufana lukutshiya isilonda esenza kube lula ukungena kwempethui.
Enye yalezingcwethu, nguMnu Mlindelwa Mancitshana. Ke sizwe elandisa ngalokhu.
“Ibandla le MDC lisesikhathini esinzima kulandelwa yikungalandelwa komthetho,okwenza ibandla abalwisana lalo lithule ithuba lokungenela kundaba zabo. Nxa likwezombusazwe kumele lilandele isisekelo senu ngoba abadala bathi impethu ngena ngenxeba,” kutsho uMancitshana.
Lokhu kugcizelelwe ngesinye isizalwane se Zimbbawe esisekela ibandla leli uMnu Alfred Dzirutwe.
“Kuqakathekile njengebandla ukuthi silandele isisekelo sombuso esasibhalayo njengebandla. Isisekelo sombuso yiso kuphela esisitshengisa indlela okumele sisebenze ngayo nxa kungelengxabano, ” kutsho uDzirutwe.
UMnu Iphithule Maphosa owebandla le ZAPU uthi kumele abantu be Zimbabwe bafunde kulokhu okwenzakala kubandla le MDC ukuze bangacini bevotela ibandla elilomkhuba ofana lowe ZANU PF, esithi ibandla leMDC njengoba lifuna intambo zombuso kumele itshengise umahluko lebandla le ZANU PF.
“Yisifundo emuntwini wonke we Zimbbawe ukuthi kumele sibone ngelihlo lokuhlakanipha ukuba sihlutshwa yi ZANU PF engalandeli imthetho yelizwe. Lanxa sisithi sidinga elinye ibandla kumele abaphikisayo labo bebe belandele imithetho,” kutsho uMaphosa.
Unobhala webandla elikumanyano wamanadla awe Political Actors Dialogue (POLAD) ele United African National Council (UANC) uMnu Alphious Mapuranga uthi ibandla le MDC kumele lizinuke amakhwapha lingakacabangi okokubusa ilizwe.
“Izinto abahluphana ngazo yizinto abazifakela bodwa. Behluleka ukulandela isisekolo sabo. Ngabantu abafuna ukuvala ukwehluleka kwabo. Ukuthi laba bantu bebuse singathwala nzima, ngeke belandele isisekelo," kutsho uMapuranga.
Kodwa unobhala wabatsha ku MDC ekhokhelwa ngu Mnu Nelson Chamisa uMnu Gift Ostallos Siziba uthi okwenzakala kubandla leli yimisebenzi yebandla le ZANU PF.
“Sisiya phambnili into abantu okumele bebeyazi yikuthi sizaqhubeka phambili sisilwa ukuthi ilizwe lethu liyephambili. Asisoze simiswe ngamadale acaptured, icoiurt ithi oKhuphe yibo asebebusa, thina siyaphambili sizabe sibuza abantu ukuba bafuna senze njani,” kutsho uSiziba.
Kodwa omunye wabatsha osekela ibandla le ZANU PF, uMnu Mabutho Moyo uyakulandula lokhu, esithi iZANU PF kayilani lokulwisana okukubandla le MDC .
“ IZANU PF yayingekho iMDC ibumba isisekelo sombuso wabo. Sasingekho uTsvangirai efaka abakhokheli ababili ukuba bamsekele. Yayinto yabo njenge MDC. Okwenzakala lakhathesi emthethwandaba kakula okukodwa okukhunywa nge ZANU PF,” kutsho uMoyo.
Ngeviki edluleyo icele le MDC elikhokhelwa nguMaKhuphe elithiwa yi MDC-T lisuse abammeli bedale lephalamende abane abakucele elikhokhelwa nguChamisa eselithiwa yiMDC Alliance. Amalunga asusiweyo abalisa uMnu Charlton Hwende, uNkosikazi Thabitha Khumalo, uNkosikazi Lilian Timvelous lo Mnu Prosper Mutseyami.
Lokhu kwenze ukuba iMDC Alliance ikhiphe umbiko othi amalunga ayo awedale lephalamende azaphuma wonke edale lephalamende nxa icele likaMaKhuphe lingaqhubeka lisenzenje.
Ezinye ingcwethi kwezombusazwe zikhuthaza uMnu Chamisa ukuba asungule elakhe ibandla ahlube ijazi elithi MDC ngoba selimadabudabu.
