NgoLwesibili bekulusuku lwesibili ilizwe livaliwe phansi kweziqondiso zikaMongameli Emmerson Mnangagwa, zokuvimba abantu ukuhambahamba behlale emizini yabo okwamaviki amathathu alandelayo, ukuze kwehliswe ukumemetheka lokuthelelanwa komkhuhlane weCOVID-19.
Kodwa koBulawayo uzulu ubanjwa ngamandla ukuphuma ezindlini esiyadinga amanzi ngoba abanye sebelensuku ezilitshumi impompi ziwomile qha.
Laloba uzulu ekhuthazwa ukuhlala endllini ukuze avikeleke ekutholeni umkhuhlane weCOVID-19 elokitshini leNkulumane uzulu uveze ukukhathazeka ngohlupho lwamanzi ethi aluba kwaqala kwalungisiswa ukuthi umuntu wonke afinyelele amanzi. Bathi kunzima ukuthi bawulandele umthetho bona bengela manzi.
Unkosikazi Kelly Mhlongo oyisakhamuzi sakoBulawayo uthi ukuswelakala kwamanzi kubakhiphe ezindlini ngoba kungahlaleki endlini kulengcekeza.
‘Iviki size yakwana amanzi elokhe engekho sicine sesiphuma ezindlini lathi sesiyakukha manzi esibhoraneni, besingasela ndaba lokuthi kule lock down ngoba endlini akuhlaleki kungela manzi.Akuphileki njalo amanzi engekho akusebenzeki so thina saphuma sesisiya kukha amanzi lasesibhoraneni abantu banengi badinga amanzi amanzi awakho ezindlini abantu badinga amanzi,’ kutsho uMhlongo.
Umnumzana Lucky Dube omunye wezakhamuzi uthi abantu balalele bahlala ezindlini njengokutshelwa kwabo.
"Umumo wona ngathi uthule mbijana sivuke ekuseni sisiyadinga amanzi. Mina ngokwami ngingenile etown kuthule akhona amapolisa here and there kodwa amapolisa akhona uwathola esemanengi ebuthene, kumapharmacy singenile bekulamaline kodwa abengekho makhulu kangako. Ezitolo zikhona ezivuliweyo kubo Choppies lo OK akula maline phandle abantu bapanic bayathenga Saturday le Sunday,” kutsho uDube.
Esinye njalo isakhamuzi sakoBulawayo umnunzana Dumile Boluboza uthi ukuvikela umkhuhlane lo ngokugeza izandla kuzabanzima ngokuswelakala kwamanzi.
“Akula manzi koBulawayo kodwa kulecorona virus sonke sisezindlini imvikela kuthiwa sigeze izandla siyazigeza ngani izandla singela manzi, sifuna amanzi okugeza umzimba, izandla. Njengoba kuthiwa sinathe iginger egudumalayo siyazivikela njani kuCorona singela manzi koBulawayo.”
Unkosikazi Mellisa Ncube oyisakhamuzi sakoBulawayo eNkulumane uthi bahlalele evalweni ngoba besaba ukuthi kuzamemetheka imikhuhlane eminengi.
“Amanzi asithwalise nzima lapha koBulawayo ngoba khathesi sisesikhathini esinzima okokuthi sekumele ukuthi yonke into oyenzayo uqale ugeze izandla. Amanzi akhona nanka awakho njalo izolo bebewalethile sebewavalile ngesikhathi esifitshane, ngapha sizama ukupractice ukuthi izandla zihlale zihlanzekile kungasomkhuhlane weCorona kuphela kodwa kuzaba lemikhuhlane etshiyeneyo so sihlalela evalweni khonapha," kutsho uNcube.
UMnu. Mike Ndiweni uthi abantu bahleli ezindlini kodwa uke wabona abanye belindele ukuthenga ukudla ezitolo ezivuliweyo.
Unkosikazi Sikhululekile Moyo ongukhansila kaward 17 uthi bakhangelele ukuthi uhlupho lwamanzi lwehle ngesikhathi lesi.
"Esikwenzayo njengoKhansila ukuthi abantu bonke bathole amanzi ngesikhathi selockdown yikuthi sesizamile ukuthi sinanzelele amareservoir levels amanzi ethu asesezingeni elihle, esikhangelele ukuthi wonke umuntu uzathola amanzi. Siqhubeka ngohlelo lwethu lwe 96 hours water shedding njengoba siyananzelela ukuthi isikhathi sezulu sesidlulile asingeke sithi izulu khona lizakuna amalevels ethu emadamu ayi 32% khathesi sikhangele njalo sikhangelele ukuthi ngenyanga ezayo kulelinye idamu esizalikhupha elizabe lingasasiniki amanzi so sizaqhubeka sisenza iwater shedding," kutsho uMoyo.
Umumo edolobheni lakoBulawayo uthule njalo inengi liazulu lilandele izixwayiso zikahulumende ukuthi bahlale ezindlini. Ezinye izitolo ezinkulu bezivuliwe abantu beyenelisa ukuthenga ukudla lokunye kodwa kungela kuphithiela njengensukwini nxa kuphakathi kweviki kunje.