Seliphendukile njalo idola leMelika.
Uhulumende uthi ilizwe selivunyelwa njalo ukusebenzisa limali kanye leyakwamanye amazwe emiswe ukusebenza ngoNhlangula nyakenye.
Embikweni awethule izolo ntambama, usibalukhulu webhanga elikhulu lelizwe eleReserve Bank of Zimbabwe uMnu John Mandugya uthe uhulumende uthethe lelinyathelo ngenjongo yokwehlisa umthelela womkhuhlane weCoronavirus.
UMangudya uthe idola leMelika elilodwa lilesisindo samadola eZimbabwe angamatshumi amabili lanhlanu, 1:25.
Uthe imizamo le izancedisa ekulwisaneni leCoronavirus, yona esibulele abantu abedlula inkulungwane ezingamatshumi amabili, 24,000, emhlabeni jikelele, okugoqela oyedwa eZimbabwe.
Ukuphenduka kwemali yakwamanye amazwe lokhu kutsho ukuthi yiloba ngubani olebhizimusi usengabhadalisa ngayo.
Le yinto ebikhuthazwa ngabanye besithi idola leZimbabwe yilo elibulala umnotho welizwe. Ingcwethi kwezenotho zithi amanye abhizimusi alakho ukuqala ukwala ukwamukela imali yeZimbabwe.
Enye yengcwethi lezi uMnu Masimba Kuchera utshele iStudio 7 ukuthi okwenziwe nguhulumende lokhu kuveza ukuthi usekubonile ukuthi idola leZimbabwe alisebenzi.
Siphinde saxoxa njalo labezombusazwe. Siqale ngesiphathamandla sebandla leZanu PF njalo ongusomabhizimusi, uMnu Joseph Tshuma othi lokhu kungaba yinto enhle alubana uhulumende ethe wakuphatha kuhle.
Ilunga leMDC ekhokhelwa nguMnu Nelson Chamisa uMnu Edwin Ndlovu, laye ongusomabhizimusi yena uthe ukuphendukiswa kwalimali yinto ebivele ikhuthazwa libandla lakhe.