Ikhansili yakoBulawayo iphakathi kokuvalela izakhamizi ezilezikwelede amanzi emizameni yokuzibamba ngamandla ukuthi zibhadale.
Lokhu sokutshiye inengi liphephela ezikotshweni, zona ezikhanya zisandelwa. Amanzi avele ayasisela koBulawayo ngoba esemalutshwana emadamu.
Inkulungwane zezakhamizi zikweleda ikhansili imali edlula izigidi ezilikhulu kuthi uhulumende yena ulesikwelede esifika inkulungwane ezingamatshumi ayisificaminwemibili.
Isakhamuzi selokitshi leMakokoba, uMnu Nisbet Sibanda, utshele iStudio 7 ukuthi uvalelwe amanzi phezu kwesikwelede samakhulu amane amadola.
Esinye njalo isakhamuzi seMakokoba, uNkosikazi Marble Nyoni uthe usesikha amanzi esikotshweni esikhatshana kulandela ukuvalelwa amanzi lokhu.
Udaba lokusilela kwamanzi koBulawayo solulesikhathi luhlupha.
Ngeviki edluleyo uMongameli Emmerson Mnangagwa utshele uzulu wakoBulawayo ukuthi ukwakhiwa kwedamu leGwayi-Shangai sekumqoka kibo ukuze udubo lokusilela kwamanzi okubhekane labantu eMaNdebeleni kuphele.
