Inhlanganiso elwela ilungelo lentathelizindaba eye Zimbabwe Union of Journalists (ZUJ) isikhuthaze onozindaba ukuba bethule indaba eziveza indubo ezihlangana labantu ezigabeni hatshi ukuqaphela indaba zombusazwe kuphela.
Ekhuluma ngemva komhlangano owenzelwe e Harare lentathezindaba ezivela kumankampani atshiyeneyo uNombala we ZUJ uMnu Foster Dongozi ukhuthaze intathelizindaba ukuba ziqakathekise ukuloba lokusakaza indaba zikazulu.
Uthe kuyadanisa ukuthi indaba ezinengi ezibhalwa kumbe ukusakazwa zintathelizindaba kulezinsuku zikhangela kakhulu abantu abasezikhundleni lemahofisini hatshi abantu kazana.
UDongozi uthe ukungalobi indaba zikazulu kwenza indubo ezihlangana labantu abanengi zicine zisiba yinto yansuku zonke kungela maqhinga okuzilungisisa.
“ Thina njengenhlanganiso ye ZUJ silohlelo esilwenzayo. Ngaphansi kohlelo lolu zizabe sisebenzela eHarare, eManicaland lase Masvingp. Siyabe sifundisa intathezindaba ukuthi indaba zesigaba sihlaziywa njani. Ngengentathelzindaba zijayele ukulandela omama labobaba abasemahofisi,” kutsho uDongozi.
UDongozi uqhubeke esithi indaba ezihlupha uzulu ziyehlukana ngendawo kungakho kufuze intathezindaba zikunanzelele lokhu.
“Ngokubona kwethu lembuzo abakade beyibuza ungani sekungena. Okuphatha izakhamizi yiukthi indaba zitshiyene kuyisaya ngendawo. Kwezinye indawo emakhaya bakhala ngamadibha lokunye kuthi eHarare bakhala ngendaba zamanzi,” kutsho uDongzi.
Omunye okade enxuswe emhlanganweni lo ukuzokhuluma lentathelizindaba yisikhulumeli samapholisa uMnu Paul Nyathi yena okhuthaze intatheli ukuba zibhale indaba zenkohlakalo eyenziwa ngamapholisa.
UNyathi uphe isibonakaliso samapholisa abotshwe edolobheni le Marondera zinduna zabo ngemva kokubanjwa bethatha imali kubatshayeli lapho okumiswa khona izimota ku road block, esithi izinto ezinje yizo okumele zilotshwe zintatheli.
“Sihlangane lamapholisa bethatha imali kulabo abahamba ngezimota e Marondera. Sibone amapholisa angu ayisikhombisa bethatha imali, sizasebenzisa umthetho ukubagweba njalo sizabaxotsha emsebenzini. Sicela abatshayeli ukuba bengaphi amapholisa imali. Sizabopha abenza lokhu bonke. Intatheli kumele zisincedisa ukulwisa lokhu,” kutsho uNyathi.
Eyinye intatheli ekade isemhlanganweni lo ngu Mnu Leopold Munhende owe Newzimbabwe.com yena othi bafunde okukhulu ngokusebenza ezigabaeni.
Kutsho uMunhende: “Sifunde ukuthi nxa sibhala izindaba kufuze lathi sikhangele indaba ezenzakala ezigabeni kulokuthi silandelane lokombusazwe. Abantu yibo abazi okwenzakalayo ezigabeni zabo.”
I ZUJ izaqhubeka ifundisa intatheli elizweni lonke ukuze indaba ezikuzigaba zilotshwe lokusakazwa kabanzi.
