Izakhamizi zemaphandleni sezikhuthaze uhulumende kanye lababalisi ukuthi bakhulumisane ngodaba lweholo ukuze abantwana bathole imfundo ezikolo.
Inengi lababalisi alikahambi ezikolo selokhu zavulwayo likhonona ngeholo eliphansi.
Esinye isakhamuzi seMawabeni, uNkosikazi Beatrice Ndlovu, ukhuthaza ababalisi ukuthi babekezele.
“Siyacela sibili kakhulu ukuthi ababalisi kabafundise abantwana, yebo lanxa isimo singamanga kahle kibo kodwa esikucelayo abakhulule imoya yabo izinto zizalunga,” kutsho uMandlovu.
Omunye njalo umzali, uNkosikazi Siphathisiwe Nkala oweSilikwe uthi uhulumende kumele anikeze ababalisi imali efaneleyo babuyele ezikolo.
“UHulumende ngabe uyanikeza amatitsha imali eyeneleyo esebenzayo bakwazi ukubuyela esikolo bayefundisa abantwabethu ngoba okwamanje sibhadale amaschool fees sithengile amabhuku amawunifomu yonke into iyadula abantwana abafundi abantwana batshona bedlala, uhulumende kazame iplan abanikeze lokhu abakufunayo babuyele emsebenzini,” kutsho uNkala.
Sixoxe lonabhala jikelele wenhlanganiso yababalisi eyeZimbabwe Teachers Association ZIMTA UMnu Tapson Nganunu Sibanda eseMawaza ngoLwesine lapho kubekwa umphathisikolo weGungwe Primary UMnu Thuso Mokoni.
USibanda uthi inengi lababalisi seliphenduke inhlekisa emphakathini ngenxa yobuyanga obudalwa liholo eliphansi, kungakho uthi ababalisi ngeke benelisa ukuya emsebenzini ngemali abayiholayo.
“Abantwabethu ikusasa ayikho kumnyama phambili njalo as long as uhulumende elokhu engalungisisi loludaba abantwabethu abala kusasa iphelile total du so thina sithi kalungisise khonapho ngoba asikho isizwe esinga developer singelamfundo,” kutsho uSibanda.
Inengi lababalisi lithi liyehluleka ukuhambisa abantwababo ezikolo zemaboarding ngoba zingayiholi imali efunwa yilezizikolo.