Namuhla sigqiba udaba lokutshabalala kwamadamu enyakatho lasezansi yeMandebeleni kanye laseNkabazwe ngokukhangela umumo wedamu leGuyu, eliseGwanda South.
Idamu leGuyu ngelinye lamadamu aseleminyaka etshabalele eGwanda kodwa lanamuhla alikalungiswa. Lokhu kutshiye izakhamizi lezifuyo zithwele nzima ngoba kumele zitsholobele imango emide zisiyadinga amanzi.
Ukwakhiwa kwedamu elikhulu elikhangelelwe ukuqeda udubo lwamanzi kulumango eleTuli-Manyange lakho kusamile.
Isakhamuzi seSengezane uMnu Mandla Maseko uthi ukudubuka kwedamu leGuyu eminyakeni emibili edluleyo kutshiye izakhamizi zithwele amagabha avuzayo.
“Idamu leli belisincedisa kakhulu libamba iGuyu Area through iBusiness Centre, iInstitute, Guyu Police, ARDA Model D lizobamba izakhamizi zeSengezane village ezifuyweni,” kutsho uMaseko.
“Belisisiza ezinhlanzini sithola isitshebo, khathesi sekuwomile qha, inkomo ziphelile ziswela amanzi, ziyathi ziswele utshani zibe ziswela lamanzi, ziphelile vele iganga lonke leli liyanuka. Besifisa ukuthi nga uhulumende uyasinceda ngokusivusela amadamu.”
Ngaphandle kwamadamu adubukayo, izakhamizi zeMawane, eGwanda South zithi amadamu akulesisigaba abalisa eleNtepe elemaNdebeleni leleShamba kawasancedi kangako ngoba segqibelekile.
Esinye salezizakhamizi, uMnu Justine Dube uthi amadamu lawa akasabambi manzi, okudala ukuthi bahlale bebhekane lodubo lwamanzi lanxa kune izulu elinengi.
“Kulesisigaba asilawo amadamu aneleyo angabamba amanzi amanengi. Elinye vele seligqibelekile, amanzi afika abe yisiziba okweviki ezimbili kuphela,” uDube uchasisele umsakazo weStudio 7.
EGwanda North, eMatshetsheni lakho bakhala ngodubo lokugqibeleka kwamadamu. UKhansila kaWard 1 kulesisigaba uMnu Standford Nkala uthi manengi amadamu asegqibelekile esigabeni sakhe adinga ukugujwa.
Kutsho uNkala: “Amadamu ngingathi wonke akuWard 1 asewagqibelekayo adinga ukukhitshwa udaka agoqela idamu leVonkwe eMatshetsheni besekulandela eleNkazhe, eleHulube besekulandela elisetshenziswa yiIrrigation yeMasholomoshe.
“Yiwo amadamu asegqibelekile, ngingathi phose wonke nje amadamu akuWard 1 ngamadamu amadala ayakhiwa ngama 1960s amanye ngama1950s.”
Kulokuvumelana ekuthini udubo lokusilela kwamanzi emhlubulweni weGwanda South luzadlula lapho kuthe kwakhiwa idamu elikhulu leTuli-Manyange Dam kuElliot Bridge eNtepe.
Kodwa inengi lezakhamizi selilahle ithemba ngoba sekulomnyaka umsebenzi wakwakhiwa kwaleli damu umile. UDube uthi kumele uhulumende aphathe udaba lokwakhiwa kwalelidamu njengodaba olumqoka njalo oluphuthumayo.
“Ngabe uhulumende wethu uyahlala phansi asinakekele azwe izikhalazo zethu. Indawo leyi yindawo ewomileyo efuna ama-irrigation, so idamu leli kumele lilungiswe silime sikwanise ukuthola ukudla okweneleyo esigabeni sethu,” kutsho uMnu Dube.
Lingaphela ukwakhiwa, idamu leTuli-Manyange lizanceda kakhulu izakhamizi zeNtepe, Guyu, Ntalale, Chelesa, Sizhubane leManama kuthi indawo zokulima kuthelezwa amaIrrrigation aweSebasa leMankonkoni lawo azathola amanzi.
UKhansila kaWard 14 eGwanda South uMnu Miclas Ndlovu uthi usemnyameni ngesizatho sokungaqhutshwa komsebenzi kulelidamu.
“Okwakathesi sibili lakimi kumnyama nxa ngifika ngibuzisisa abanye kwakhanya ukuthi eyinye i-equipment yahamba ngapha eChimanimani, okwakathesi akulalutho olwenzakalayo,” kutsho uMnu Ndlovu.
Umphathintambo wezemali uMnu Mthuli Ncube uhlele izigidi ezifika phose ikhulu lamatshumi amathathu zamadola - $128million kuluhlu lwendleko kahulumende olwebudget yomnyaka ozayo, ezasetshenziswa ukwakha lelidamu.
Osaphethe isihlalo sikasikomitshi weGwanda uMnu Judge Dube uthi uzulu kumele abekezele.
Idamu leTuli-Manyange ayisikho ukuthi kumile kumbe akusela msebenzi ozakwenziwa ngokuqondisisa kwami, umsebenzi wokwakhiwa kwesakhiwo esikhulu esinga ngalesiyana ngumsebenzi othatha isikhathi njalo ofuna imali enengi,” kuchasise uDube.
Izakhamizi zithi uhulumende kumele abophe ziqine alungise amadamu ngokuphangisa ukuze zenelise ukubamba amanzi engaka gelezeli kuNgulukudela.
Umanjinela omkhulu wogatsha lukahulumende olubona ngokulondolozwa lokugejwa kwamadamu olweZimbabwe National Water Authority (Zinwa), uMnu Peter Makwarimba utshele iStudio 7 ukuthi bayakwazi ukuthi amadamu amanengi eMatabeleland laseMidlands adinga ukuvuselelwa.
“Kungaba lomkhankaso ovela ebantwini, lathi kuyasisiza njengeZinwa nxa sesikhulumisana lohulumende. Kumele bakhankase ukuthi uhulumende ahlele imali yokulungisa idamu labo,” kutsho uMakwarimba.
Izansi yeMandebeleni yiso isigaba esome ukwedlula zonke izigaba zelizwe ngoba sithola amanzi amalutshwana ngomnyaka.
