Umlobi wemidlalo yokulingisa lembali odumileyo uMnu. Cont Mhlanga lamhlanje wethule ugwalo alulobayo olulesihloko esithi: Mthwakazi Wars: Izimpi Zikamthwakazi 1890-1983 olumumethe ingxoxo yembali kusukela ilizwe lingakathunjwa ngabahuquluzi benotho, selithunjiwe lalapho selithole uzibuse.
UMhlanga odume kakhulu ngokusungula umuzi wezokulingiswa, i-Amakhosi Cultural Centre, engumlobi njalo lomqondisi wemidlalo eminengi aphinde abe ngumlondi wembali wethule ugwalo lwake emkhosini owenzelwe enkundleni yeCity Hall koBulawayo.
Lolugwalo luveza izehlakalo ezithile ezembali yelizwe ezingakaze zilotshwe ngazo.
UMhlanga wethule imbali kamthwakazi echasisa ukuthi yena ngokwakhe wadabuka kuphi lokuthi isizwe sikaMthwakazi sona vele savela ngaphi.
“Ibala elithi Mthwakazi litsho ukuthi United Kingdom, ngama kingdom azibusayo amanengi angaphansi komuntu oyedwa, yikho uMzilikazi wayengasoNkosi, wayeliKhosi. Kulomehluko ikhosi lenkosi. UQueen Elizabethe kasiyoNkosi liKhosi, kulamaWelsh amaScot amaIrish azimele wodwa, yikho ke sokuzala ini, United Kingdom,” kutsho uMhlanga.
Unkosazana Thubelihle Moyo oweMakhosi Cultural Centre uthi imizamo yokuphawula imbali yesizwe luqakathekile kakhulu ekuyeni phambili kwabantu abatsha.
“Ukuze ngibe kwazi lapho engiyakhona kumela ngazi ihistory yami even yayi bad kumbe yayiGood kumele ngibeyazi. Njengabantu abatsha house sibe kwazi ukuzithuthukisa kumele sazi lapho esavela khona. Nxa sesikhangele ibhuku”Mthwakazi Wars” kulezimbi ezaliwayo but still azikho emabhukwini, kulezinto ezenziwa ngamaNdebele eziyiOral history azikho emebhukwini. Zingekho recognised zinjalo zisitshengisa ukuthi izinto leyana into ekade iyiOral history khathesi sibhaliwe phansi,” kutsho uMoyo.
Umnunzana Ben Moyo unobhala wezemfundo owenhlanganiso yezakhamizi eye Bulawayo Progressive Residents Association (BPRA) uthi lolugwalo lungezelela umthombo wolwazi olumayelana lembali yelizwe njalo ivela kubanikazi bayo limbali.
“Ugwalo lolu luqakathekile kimi ngoba lusinika imbali kaMthwakazi ekade ingalotshwanga kumbe ebilotshwe ngabanye abantu, ngoba imbali inhle ilotshwa ngabanikazi bayo. Ubaba umhlanga lapha ungomunye wabantu abazangezelela umthombo esizathapha khona thina losapho lwethu siwuthaphe kubanikazi bayo ngoba yonke into inhle ivela kubanikazi bayo,” kutsho uMoyo.
Unkosikazi Dorothy Ndlovu owenhlanganiso ye1893 Mthwakazi Restoration inhlanganiso emanyanisa zonke inhlanganiso zika Mthwakazi ezibalisa ezokholo, ezombusazwe lezinye uthi abantwana balakho ukufunda okunengi kuthi labadala ababengela lwazi bavuleke ingqondo mayelana ngembali ka Mthwakazi.
“Ebhukwini lapha abantwana bazafunda okunengi kakhulu ngoba kulokunye vele abantu abangeke babakwazi ukuze bazi ukuthi savela ngaphi ukuthi kuze kube lemthwakazi. Okunye kusuke kube engani kulenzondo ngani kulabantu abazonda ezinye inhlanga ngoba abanye kusuka angathi kuba yinzondo kodwa akumelanga kube yinzondo kume le abantu bafunisane. Thina silapha ngoba ibhuku liphuma koMthwakazi,” kutsho uNdlovu.
Omunye owake wasebenza lo Mhlanga uMnu. Memory Kumbota ubabaze kakhulu ukuzimisela kuka Mhlanga ngemisebenzi ayenzayo lokuthi konke akwethulayo uyabe eqale wacwayisisa ngokujulileyo andubana aphakulele umphakathi imibono esekelwa liqiniso.
“Ngisebenze lobaba uMhlanga kuTheatre iminyaka eminengi kakhulu, as you know he is the founder of Amakhosi. I-Theatre siyifunde kuye. One thing ekubamba ngobaba uMhlanga is the passion alayo ngento ayithandileyo. Uphakathi kweHistory, imbali yabantu leArts, He is a very good communicator and nxa ekuDirector uyabe ekufundisa. One good thing ngaye is ukuthi he is a good communicator and well researched,” kutsho uKumbota
Owacindezele lolugwalo, uMnu. Thabo Siziba usichasisele okunengi ngalolugwalo.
Obengumhlonitshwa yiNkosana yamaXhosa awe Zimbabwe, uMnu. McLeod Tshawe othethwe ngabaqoqe loluhlelo wabhodiswa uBulawayo wonke etshengiswa imbali ezatshiywa zakhiwe ngabathathela abensundu ilizwe ngomyaka ka1893 ezigoqela isakhiwo sakoHaddon and Sly, iPioneer House, kunye loPhawu luka Cecil John Rhodes oluse City Hall.