Izulu eline ngolaka ngoMgqibelo langoMvulo lilomoya omkhulu lidilize imizi endaweni ezitshiyeneyo zezansi yeMatabeleland latshiya inengi libhekane lendleko zokwakha kutsha.
Izulu leli lichitheke endaweni ezibalisa iMawane, iMadihongola leLubhangwe labhidliza imizi. Liquphule izihlahla njalo kwalimala abanengi.
Izanusi zomkhathi bezike zaxwayisa abantu ukuthi baqaphele lelizulu kodwa inengi lithi belingacabangeli ukuthi belingaletha umonakalo ongaka.
Isakhamuzi seMawane uNkosikazi Busang Nyathi uthi yena wadilikelwa yindlu yamazenge ngemva kokuba umoya uthethe uphahla lwayo.
“Umoya wabuya wathatha amazenge konke kwadilika; ngithe ngiyaphuma endlini ngafica amazenge esephumile ngapho’nguzwa kuduma ngabona amazenge abomakhelwane esebuya,” kutsho uNkosikazi Nyathi.
Omunye okhala ezimathonsi nguNkosikazi Irene Moyo, esinye njalo isakhamuzi seMawane yena odilikelwe yizindlu ezigoqela eyamazenge ebiyakhwe ngezitina yaplastelwa ngesamende. UMaMoyo uthi basinde engozini enkulu.
