Umongameli webandla leZAPU umuyi uDumiso Dabengwa, ubekwe namhla emangweni weManxeleni eNtabazinduna lanxa ubemele angcwatshwe emathuneni eHeores Acre eHarare.
Kube lokuxokozela ngemva kokuba umkhokheli webandla leMDC, uMnu. Nelson Chamisa lenduna uKhayisa Ndiweni beke bancitshwa ithuba lokukhuluma kodwa bathe beliphiwe basola uMongameli Emmmerson Mnangagwa ngokungazi emncwabeni weqhawe lesizwe.
Inkokheli zomdabu, amalunga ebandla elibusayo eSouth Africa, ele Umkhonto Wesizwe, kanye labammeli benkokheli zakwamanye amazwe, amabandla ezombusazwe ehlukeneyo, amalunga engatsha zikahulumende kanye lozulu bebathegwaqa enkundleni yeNtabazinduna bezovalelisa umuyi.
Umongameli welizwe uEmmerson Mnangagwa ubengekho ngoba ethe imuli kamuyi yathi ifuna ukumbeka ingasindwanga ngabokuza.
Kodwa umfanekiso kaMnangagwa obuphanyekwe lapho kade kuhlezi abahlonitshwa umgangalise abanye abathi kanti vele ubufakelwani.
UMnangagwa ubemelwe ngumphathintambo wesabelo seMatabeleland uMnu. Richard Moyo. UMoyo uthe balusizi ngokulahlekelwa nguDabengwa owayelodumo ngesikhathi sempi ngebizo elithi Black Russian, kulandela ilizwe lapho aqeqetsha khona ezokucupha kungatsha zebutho.
“Silusizi kakhulu ukuthi sibuthene lapha ukuzobeka njalo sivalelisa omunye wethu uDr Dumiso Dabengwa owayesaziwa ngebizo elithi Black Russian. UDabengwa walwa impi njalo wasebenza lengatsha ezinengi zikaHulumende. Umufi wafela ukubambana uthando kanye lentuthuko,” kutsho uMoyo.
Umgcwabo lo ubulenkulungwane zabantu abebethwale ngamabhasi kanye lezimota ezehlukeneyo.
Omunye walabo abebekhona ngumqeqeshi wezenguqu umnumzana Ndumiso Gumede, othiukukhothama kukaDabengwa kuyadanisa. Ethi uDabengwa uhambe kungakaqediswa uphenyo lokuthi sibekwazi ukuthi kwahambanjani kumbuqazwe weGukurahundi.
“Silokudana okukhulu ngokukhothama komuntu obeqakatheke kangaka elizweni lethu eleZimbabwe langemsebenzi yakhe. Simanzi ngemsebenzi yakhe ayenze etshiya ubunandi bokubanguntanga esiya empini. Ngalokho eZimbabwe siyaphambanisa imbali yethu kodwa sesitshelwa ngabeSouth Africa abangafihli lutho sebesitshela ukuthi abaqala ukulwa ngoDabengwa,” kutsho uGumede.
Laloba bekulokudonselana kokuqhutshwa kohlelo lokubekwa kukaDabengwa lapho obekungani induna uKhayisa kanye lomongameli webandla leMDC uNelson Chamisa abasoze baphiwa ithuba lokukhuluma, ababili laba bacine bekhuluma endlini kaDabengwa eyokucina.
Induna uNhlanhlayamangwe Ndiweni uthe ukungabuyi emgcwabeni okwenziwenguMongameli welizwe kutshengisa ukuthi umumo welizwe awumanga kuhle.
“Indoda ekhulunywe emsakazweni ukuthi liqhawe kodwa abanye bakhethe ukuthi bangalugxobi lapha. Ngilusizi kakhulu ngoba abakhokheli bethu bakhethe ukungagxobi lapha ukuthi bezobona ukuthi iqhawe silibeke njani. Lokhu kuyakhuluma ukuthi ilizwe lethu alimanga kahle,” kutsho uNdiweni.
Umongameli weMDC uNelson Chamisa usekelane lenduna uKhayisa ethi ulokudana kakhulu ngokungabuyi kwabakhokheli belizwe ethi uDabengwa ngubaba ubemele ukubambana njalo obesebeke ithemba kwabasakhulayo owakutshengisa ngokumsekela.
“Mina inhliziyo yami ibuhlungu ngendaba yokuthi abanye abakhokhela ilizwe abakho ababuyanga ukuthi sinike iqhawe lamaqhawe lethu inhlonipho yokucina. Ngiyazama ukukhuluma isiNdebele ngoba ubaba uDabengwa wayemele ukubambana. He was humble and he represented all of us,” kutsho uChamisa.
UMuyi ubhubhele eNairobi kweleKenya NgoLwesine lweviki edluleyo esedlula evela kwelatshwa umkhuhlane wenso kwele India. Umuyi utshiye umkakhe uNkosikazi Zodwa Dabengwa, abantwana abahlanu kunye labazukulu abambalwa.
