Umeli weMelika eZimbabwe uMnu Brian Nichols wethekelele enkundleni yeAmagugu International Heritage Center, eMatopo ngoLwesithathu lapho asungule khona ugwalo olujonge ukulondoloza amasiko esintu olulesihloko esithi ''Preservation of Ndebele Art and Architecture.
UNichols ubuke umsebenzi wokucomba lokwakhiwa kwezindlu zesintu esithi kuyinto enhle njalo elondloloza imisebenzi yaMaNdebele ebibhekane lokutshabalala.
“Kuhle ukuthi lina boMama lenze umsebenzi omkhulu kangaka wokulondoloza imisebenzi yenu yesintu; ngilitshayela ihlombe ngoba lenze okuhle kuloluhlelo. Silitholise imali engatsho lutho kodwa ugwalo lolu lumumethe okudlula leyomali, ngilitshayela ihlombe,” kutsho uMnu Nichols.
UMqondisi weAmagugu International Heritage Center, uMnu. Pathisa Nyathi uthe bayathaba ngokuthi amasiko lemikhuba lobuciko baMaNdebele buvezwe obala balondolozwa.
‘'Siyathaba ukuba amasiko, lemikhuba yethu, ubuciko baMaNdebele buvezwe obala baphuma okukhulu yikuthi bulondoloziwe ukuze labo abazazalwa, abazakuza sinasekho bazakuthola kukhona kungufakazi yikho esikuthandayo sibili,” kutsho uNyathi.
Ugwalo lolu lulotshwe ngoncedo lwemali engena kunkulungwane zamadola ezingamatshumi amane lasikhombisa ephiwe iAmagugu Heritage Center yiMelika phansi kohlelo lweUSA Ambassodors Fund for Cultural Preservation.
Uhlelo lokucomba izindlu ngobuciko luphathwa ngoMama beMatopo, lapho uAmb. Nichols ayebuka khona imizi eyanqoba lonyaka phansi komncintiswano weMy Beautiful Home.
UNichols uthembise ukuphenduka lemuli yakhe njalo kukhefu elizayo azobukisisa lezizindlu ejabulela ukulondolozwa kwamasiko esintu.
