Minyaka yonke umhlaba wonke jikelele uyamanyana unanza insuku ezilitshumi lasithupha zokukhankasela ukumisa udlakela bobulili ikakhulu obuqondiswe kwabesifazane.
Lokhu kwenziwa ukuze abantu balimukisane benqabela loludlakela lokuphana amandla lendlela zokuthi banelise ukuluvikela loludlakela.
Intathelizindaba yeStudio 7 uBathabile Masuku ukhulume lenhlaaganiso ye Emthonjeni Women’s Forum (EWF) mayelana lalamalanga alumkhankaso
Ukuphathana ngocuku emakhaya kanye lasemisebenzini ngokwehlukana kobulili, okubizwa kuthiwa yiGender Based Violence, kuluhlupho olukhulu esigabeni ikakhulu nxa sikhangele abesifazane abakhanya isikhathi esinengi bengenelisi ukuzivikela kulokhu. Abanye bangabe betshaywa kumbe behlukunyezwa emacansini emisebenzi kanye lasemakhaya abo.
UMelissa Nomakhosi Ndlovu owe Emthonjeni Womens Forum uyachasisa ukuthi udlame lwe GBV luza njani.
“Ku16 days of activism against GBV sikhangelele kakhulu ukuthi sixoxisane sixhumane lomphakathi ukuthi sikhulume ngodlame olwenzakala kubomama. Lokhu kwenzakala ngobulili ukuthi ngumama kumbe ngobaba. Kungenzakala kusukela ekukhiolweni kumbe indlela esihlalisana ngayo, ubudlwangudlwangu obenzakala ngekhaya,” kutsho uNdlovu.
Lonyaka ukukhankasa lokhu kukhangele kakhulu esigabeni semisebenzini lapho omama abahlukunyezwa khona ikakhulu emacansini. Unko. Melissa Ndlovu uyachasisa ngalokhu lokuqakatheka kolwazi lokwenqabela lezi zehlakalo.
“Lonyaka isixteen days of activism ikhangele kakhulu emsebenzini sikhangele kakhulu indaba zamacansi. Nxa udinga umsebenzi bayakucela ucansi, nxa ufuna ipromotion. Kuqakathekile ukuthi siding uncedo mayelana lalokhu,” kutsho uNdlovu.
Unkosikazi Duduzile Moyo onguCouncillor wedolobho lako Bulwayo uyachasisa ngembali yokubekwa kwensuku lezi lokuthi umsebenzi wakhe ugoqelani.
“UCouncellor ngumxoxisi wabantu abahlangane lodubo, omama behlukuluzwa ngezemacansini behlukuluzwa emzimbeni. Omama ngesintu sakithi kukhangelelwe ukuthi okwenzakala emdeni akumelanga kuphumele ngaphandle. NgoDecember 6 1989 kwenzakala iMontreal Canada lapha ujaha abulala khona abantu abanengi kanye lokuzibulala,” kutsho uMoyo.
Icounselling inika umuntu indawo ethuleyo ekhululekileyo ezayenza ukuthi akhulume konke alakho enhliziyweni yakhe. Impumela lengxoxo leyo ayiphumeli phandle ngaphandle nxa kulesizatho esiphezulu.
“Icouncelling itshukuthi umuntu ukhuluma okusenhliziyweni yakhe, akhululeke njalo esikuxoxa lapho kuphakathi kwami laye ngaphandle nxa kungafaka omunye engozini siyaxoxisana lamapholisa. Nxa kudingakala ukuthi umuntu abe lomkakhe siyababiza ikakhulu laba abanikwe irehabilitation Councelling,” kutsho uMoyo.
Abenhlanganiso ezitshiyeneyo ezilwela ilungelo lobulili bathi lolu dlakela aluhlaseli abesifazane kuphela, kukanti obaba labo bayahlaselwa lanxa inengi lingakhulumi ngalokhu mgceke.
