Kulamakhansila akoBulawayo amabili kuphela aseveze inotho yawo emphakathini phakathi kwangamatshumi amabili lasitshiyagalolunye, 29.
Ababili laba nguMnu Rodney Jele loMnu Arnold Batirai, njalo bangamalunga ebandla leMDC njengawo wonke amakhansila akoBulawayo.
Inkokheli yalelibadla ibikwa ibixwayise amakhansila wonke ukuthi ame kancane ekuvezeni inotho yawo kunhlanganiso yezakhamizi eyeBulawayo Progressive Residents Association.
Kodwa lanxa bengacacanga ngenotho abalayo, uJele loBatirai babikwa belobele inhlanganiso le ngamunye beveza abalakho.
“Sisungule uhlelo lokuchaya inotho yethu kodwa akubanjwa ngamandla ukuthi umuntu enze lokhu,” kutsho ukhansila Jele.
“Khathesi asikavunyelwa libandla lethu ukuthi sikwenze lokhu, okwamanje umuntu uyazikhethela. Kuzathi sekuvunyelwa ngemva kwamaviki amabili. Izakhamizi zifuna inkokheli iveze inotho yayo ukuze kwenqatshelwe inkohlakalo.”
Isakhamuzi sakoBulawayo uNkosikazi Patricia Tshabalala uthe kubalulekile ukuthi okhansila bonke baveze inotho yabo.
“Ngokubona kwami lokhu kukhanya kuyinto engasoze iphathwe ngendlela eqondileyo. Kuzafihlwelwa uzulu. Kukhanya njalo into le ilawulwa yi-party. Ukhansila uJele usitshele ukuthi umuntu kafoswa ukuthi aveze alakho, okutsho ukuthi bazakwala abangafuniyo,” kutsho uNkosikazi Tshabalala.
Amazwi akhe agcizelelwe ngesinye njalo isakhamuzi sakoBulawayo uMnu Nkosikhona Ndebele.
“Amakhansila kumele wonke aphume publicly ukuze atshengise ukuthi angene evele ethweleni. Sokufanele bonke bakhulume batshengise ukuzimisela,” kutsho uMaNdebele.
