Inhlanganiso yaboDokotela abalwela ilungelo loluntu eye Zimbabwe Association of Doctors for Human Rights – ZADHR ithi sivumbulule umkhankaso kahulumende wokubagcona esebenzisa imbiko evela kumaphephandaba akhe lemisakazo kulandela ukwethula ugwalo oluveza izehlakalo abathi zenziwa nguhulumende ezama ukufihla ubufakazi obuveza ukuthi amasotsha yiwo mpela abulala abantu eHarare ekutshengiseleni okwenziwa phezu kokwethulwa kwempumela yokhetho.
Odokotela laba bathi icebo likahulumende lokuxubanisa ubufakazi alisoze liguqule okwenzakala eHarare mhlaka 1 Ncwabakazi okumunyethwe lugwalo lwabo abasanda lwethula ngoLwesine.
Omunye wabaphatheka ekulotshweni kwayo li report ethiwa “ ZIMBABWE: A NEW ERA/ERROR? MEDICAL EVIDENCE OF POST ELECTION VIOLENCE IN ZIMBABWE ” u Dr Norman Matara uthi imizamo kahulumende ayisoze iguqule iqiniso lokuba amasotsha yiwo adubula abantu. Odokotela laba bathi insoli zikahulumende zazama ukuvikela odokotela ukuthi balobe ukuthi abantu abafayo babulawa ngenhlamvu zombhobho lokunye okunenginengi.
Umqondisi wenhlanganiso ye Growth Edge Development Programme uMnu. Zisunko Ndlovu uthi uhulumende kumele angethuseli abethula ubufakazi kukhomeshini ecwayisisa ngokwenzakala lapho kudutshulwa abantu eHarare ekhokhelwa nguMnu. Kgalema Motlanthe ukuze kuphume iqiniso uqobo lwalo.
Odokotela laba batshele lumsakazo ukuba abantu ababelimala besiyadinga ukwelatshwa ezibhedlela babhekana lohlupho olugoqela ukwethuselwa kwabodokotela.
Bazise njalo ukuthi bafuna ukuthi abenza lesi siga bajeziswe.
Imisakazo lamaphephandaba kahulumende athe ngemva kokwethulwa kwe report yabodokotela laba yahle yaphanga yathi basebenzelana lebandla leMDC. Bona odokotela bayakulandula lokhu besithi lo ngumkhankaso nje kuphela owokubagcona
