Nyakenye abamabandla aphikisayo babambane labebandla elibusayo eleZanu PF labenhlaganiso ezizimeleyo besekela imizamo yebutho yokususa uMnu Robert Mugabe lohulumende wakhe embusweni.
Kodwa ngemva komnyaka ekhitshiwe uMugabe, imbono isiyehlukene; abanye sebezisola ngokusekela ibutho besithi impilo isilukhuni ngokuphindiweyo phansi kombuso kaMongameli Emmerson Mnangagwa.
Khepha abanye, ikakhulu abasekela ibandla leZanu PF, balokhu belethemba lokuthi umbuso kaMnangagwa uzaletha ubungcono empilweni kazulu.
“Umnyaka suphelile kodwa akula tshintsho; imali lokhe zingekho ebank. Ama-party aphezulu alokhe esilwa kodwa abantu balokhe bedubeka,” kutsho umholi webandla leDemocratic Opposition Party uMnu. Harry Peter Wilson.
Osakhulayo olilunga leMDC uMnu Discent Bajila utshele iStudio 7 ukuthi isifundo esikhulu uzulu asitholileyo kudaba lokuhluthunelwa kukaMugabe umbuso ngesokuthi ibutho kalimelanga lingenele kwezombusazwe.
“Isifundo esikhulu esihlangane laso ngesokuthi umbuso akulunganga ukuwuhluthula kusetshenziswa ibutho. Impilo kazulu isisesimeni esibi uma kuqathaniswa lomnyaka ophelileyo,” kutsho uBajila.
Amazwe akhe agcizelelwe nguMnu Tendai Gumbo owebandla leMavambo Kusile Dawn.
“Kungabe sokwedlule umnyaka abantu beZimbabwe bebambene bakhupha owayenguMongameli uMugabe. Bazikhupha phakathi kodubo bazifaka phakathi kolunye udubo. Ngabe baqhubeka bebambene bekhangela lo abamfakayo ukuthi wenza njani,” kutsho uGumbo ekhuluma leStudio 7.
Lanxa abamabandla aphikisayo kanye lozulu besithi umumo usumubi kakhulu ukwedlula lokho owawuyikho khona ngesikhathi sikaMugabe, amalunga ebandla leZanu PF ayakulandula lokhu.
“Khathesi seku-free ngoba izimota sezihamba free, akusamiswa izimota kuma-roadblocks. Kulomehluko omkhulu kakhulu ngoba imali emaBank suyake uyithole,” kutsho ilunga leZanu PF uNkosikazi Melinda Mbambo.
