Amabhanga abikwa esiba lenzunzo ethe xaxa kungakhathalekile lokuwohloka komnotho welizwe. Kodwa izisebenzi zamabhanga zimathonsi kuholo lazo. Kunje izisebenzi zalamabhanga ziyatshengisela zikhonona kakubi ngokuphathwa kubi emsebenzini.
Isimo somnotho welizwe lokhe siqhubeka sisiba sibi e Zimbabwe malanga wonke kodwa lokhu akuphazamisanga umsebenzi wamabhanga abika ethole inzuzo enhle lonyaka.
Amabhanga anjenge POSB abika ukuthi athole inzuzo ephezu kwezigidi eziyisitshiyangalombili, kodwa lokhu akuvezwa liholo elitholwa yizisebenzi ngaphandle kokwenzelwa idili lokujabulela leyo nzuzo.
Amalunga awe Zimbabwe Allied Bankers Union ehlangane lezinye inhlanganiso atshengisele eBulawayo athletics Club ngemva kokuba ibhanga lePOSB libike ngokuthola inzuzo yezigidi eziyisitshiyangalombili zamadollar kodwa lehluleka ukukhangela izikhalazo zezisebenzi zalo.
Izisebenzi zitshengisele ukudana ngesiphatho sala mabhanga njalo zithembise ukuqhubekela phambili ngalalohlelo lokutshengisela.
Umsekeli womkhokheli wenhlanganiso yezisebenzi zemabhanga eye ZIBAWU uNkosikazi Linda Phiri uthi ukutshengisela lokhu bakwenze bebona ukuthi amabhanga amanengi athole inzuzo enkuu lonyaka kodwa akazange akubone kuqakathekile ukuchathekela isilinganiso esithile ebantwini abenze athola leyo nzuzo.
“Ukutshengisela lokhu adekusenziwa emabhanga anjenge POSB, IDBZ leAgribank yikuthi amabhanga lawa a Delare amaProfits amanengi. Amabhanga lawa seDeclare amaProfits amanengi awasaniki izisebenzi imali efaneleyo,” kutsho uPhiri.
UNko. Phiri uqhubekele phambili ekhuluma ngokuphathwa kubi kwezisebenzi zesifazana emabhanga zona ezihlukunyezwa ngokwencansi ethi izisebenzi ezingomama azikhulumi ngoba zisesabela kulahlekelwa ngumsebenzi.
“Indaba leyi eyeSexual harassment ikts a cause of concern ngoba yinto eyenzakala ifihlwa ngoba abantu besesaba ukuphumela egcekeni besesaba ukuthi bengakhuluma bayahlukunyezwa emsebenzini,” kutsho uPhiri.
Umkhokheli wenhlanganiso eye Commercial Workers Union uNkosikazi Babra Tanyanyiwa usola umdlalo owenzelwe izisebenzi libganga le POSB lingaqakathekisi inhlalakahle yazo.
Kutsho uTanyanyiwa: “IBank leyi yayingayenza njani lumjaho okuthiwa yiFuna run zona izisebenzi zabo zilamba, kulezinto ezinengi ezenzakalayo ePOSB lapho esasitshengisela khona, kulobudlwangudlwangu ukudlwengula kabesifazana, kulendaba yokutshontshela amaStakeholders. Njalo kuleProfit enengi abayenzayo.”
Unko. Tanyanyiwa uqhubekele phambili esithi inhlanganiso yezisebenzi emhlabeni jikelele eye International Labour Organisation ilomthetho ewuhlelayo ozakhangela ukudlwengulwa kwabesifazana. Lumthetho uzamele ulandelwe ngamazwe wonke angamalunga eILO.
“Kulomthetho Siyathaba ngoba amaInternational Organisations anjengabo ILO kulomthetho olungiswayo obona ngeSexual Harassment ngoba yinto ekade ilokhe imbambathwa kodwa sekuzaba lomthetho ozabona ngalokhu,” kutsho uTanyanyiwa.
Umnumzana Bonginkosi Shoko osebenza kwelinye lamabhanga uthi bona bakhangelele ukuphathwa kuhle labo njengezisebenzi eziletha inzuzo enengi emsebenzini.
“Sikhangelele lathi ukuthi siphathwe kahle emsebenzini ngoba sisebenza gadalala njalo sibalutshwane. Impilo zethu sizichitha sisenza imisebenzi yabantu abanengi sibalutshwana,” kutsho uShoko.
Ukungaphathwa kuhle kwezisebenzi kuyinto esivamile ngenxa yokungatholakali kwemisebenzi elizweni njalo lokhu kubangela ukuhlukunyezwa ikakhulu kwabesifazana kwezoncansi.
Izisebenzi ezinengi ezikhulume lentathelizindaba yeStudio7 zalile ukuthi zizwakale zikhuluma ngoba zisesabela umsebenzi wazo njalo zitshengisela ukungathabi ngezehlakalo lezi
Amabhanga amanengi aqatsha abanengi ngama Contract amafitshane esenzela ukuthi behlale bengahlalisekanga emsebenzini okuyinto eletha ukudlwengulwa kwabesifazana ikakhulu abasakhulayo
Iholo labanengi bathi liphansi kakhulu nxa bekhangele ukuthi amabhanga la athola inzuzo engakanani ngakho bathi bazakuya eReserve bank ukuthi kwehliswe imali ezibhadalwa ngabantu abagcinisa imali zabo emabhanga nxa kusala ukuthi bekhuphulelwe iholo
