Inhlanganiso yeFEWSNET ithi imuli ezinengi enyakatho, ezansi kanye lentshonalanga yeZimbabwe seziqalisile ukulamba ngoba eziphaleni kungasela lutho.
Indawo eziphatheke kubi zigoqela iMatabeleland South, iMatabeleland North, iMasvingo, iMidlands kanye leManicaland.
Inhlanganiso le ithi umumo uzakuba mubi ngokuya kwesikhathi kuze kuyefika inyanga kaMbimbitho ngomnyaka ozayo.
Ithi njalo izulu lilakho ukuba lilutshwana ngomnyaka ozayo ngenxa yeyezi eliphazamisa umkhathi eleEl Niño, okuzabangela ukuthi indlala iqhubeke ibhahile.
Asenelisanga lokukhulumisana leziphathamandla zikahulumende ngaloludaba.
Abalimi beMatabeleland bona bathi sebedinga indlela ezintsha ezingathuthukisa isivuno sabo.
Oke waba ngumeli weNkayi South edale lephalamende uMnu Abednico Bhebhe uthi esigabeni sakhe ezinye imuli sezisidla kanye ngelanga.