Abantu abadutshulwe ngamasotsha bafa ekutshengiseleni kwabasekeli bomanyano weMDC Alliance eHarare ngoLwesithathu bayisitshupha.
Amapholisa ebetshele intathelizindaba ukuthi bathathu kuphela abafileyo.
Kodwa isikhulumeli samapholisa uNkosikazi Charity Charamba utshele intathelizindaba njalo ngoLwesine ukuthi kufe abayisithupha.
Wengeze wathi abalimeleyo balitshumi lane njalo kubotshwe abangamatshumi amabili lasithupha abacatshangelwa ukuthi baphatheke ekutshisweni kwezimota ezigoqela ezebandla leZanu PF.
UNkosikazi Charamba uthe njalo balokhu bedinga isicukuthwane seMDC Alliance uMnu Tendai Biti phezu kodlakela lolu.
Umkhokheli weAlliance uMnu Nelson Chamisa wethekelele abanye abalimeleyo esibhedlela seParirenyatwa ngoLwesine emini njalo uhlangane lemuli zabanye abafileyo.
Abafileyo bagoqela abantu ekade bezihambela nje abangelani lokutshengisela kwamalunga eMDC Alliance lokhu ngoLwesithathu esola iZimbabwe Electoral Commission esithi iqilibezele kukhetho.
Ingcwethi kwezombusazwe uMnu Dinizulu Macaphulana ngomunye wabasole ucuku lwamasotsha lolu.
