Lanxa kulama-ward angamatshumi amabili lasitshiyagalolunye kuphela koBulawayo, abantu ababhalisele ukuncintisa kukhetho lwamakhansila alelidolobho bedlula amakhulu amathathu.
Lokhu kuvezwe yisiphathamandla seZimbabwe Electoral Commission uNkosikazi Sithembiso Khuphe ekugqitshweni kohlelo lokubhalisa abantu abancintisayo ekuseni namuhla ngo1:30am.
“Abantu abalethe amaphepha abo bangu338. Kulabanye abangaphumelelanga ngenxa yokuthi bebefuna ukumela ama-ward abangahlali kuwo," kutsho uMaKhupe.
Wengeze wathi bakhona njalo abanye abehluleke ukubhalisa ngoba amagama abo ebengekho kuluhlu lwabavoti.
Umthetho uthi ukuze umuntu ancintise kukhetho, kumele abe ebhalisile kuluhlu lwe-voters’ roll.
Abanengi babancintisayo bebekhala ngokuphuza kweZEC ukubabhalisa. Omunye wabo ngozancintisa ku-ward 8 uMnu Alfred Dzirutwe olilunga leMDC-T.
