Libatshila umoya abalandeli balo iqembu le Highlanders lona elithe ngokudliwa ngele Chicken Inn nge 3 ka 2 ngeSonto lehla layahlala endaweni yetshumi engalaneni yemiklomelo.
Abalandeli beqembu le Highlanders bacine sebeziculela becela umqeqetshi waleliqembu uBongani Mafu ukuba azwe izikhalazo zabo ehlukane leqembu le Bosso lona eselibalelwa kumaqembu angagunyulwa kusigaba saphezulu ekupheleni kwemidlalo yalonyaka.
Iqembu le Highlanders lihlezi kundawo yetshumi lilemiklomelo engamatshumi amabili lanhlanu (25) ngemva kokudlala imidlalo engamatshumi amabili lanye (21).
Phezu kwengalane kuhlezi iqembu le Chicken Inn elilemiklomelo engamatshumi amane lantathu (43) ngemva kwalo kuleqembu le Dynamos lona elinqobe ele How Mine nge 1 ka nya ngeSonto.
Iqembu le DeMbare lilemiklomelo engamatshumi amathathu lathoba munwe munye (39) kuthi kundawo yesithathu kuleqembu le FC Platinum elitshaye ele Triangle nge 1 ka nya ngeSonto lona elilemiklomelo engamatshumi amathathu lathoba minwe mbili (38).
Iqembu le Triangle likundawo yesine lilemiklomelo engamatshumi amathathu lesithupha (36) lona lilandelwa ngamaqembu athi ele Harare City lele How Mine wona alemiklomelo engamatshumi amathathu lanye (31) ngalinye.
Kundawo yesikhombisa kuhlezi iqembu le Caps United elilemiklomelo engamatshumi amathathu (30) ngemva kwalo kuhlezi amaqembu athi ele Hwange kanye lele Chapungu wona alemiklomelo engamatshumi amabili lathoba minwe mbili (28).
Iqembu le ZPC Kariba lisendaweni yetshumi lanye lilemiklomelo engamatshumi amabili lanye (21) njalo lilingene ngemiklomelo leqembu le Buffaloes.
Kundawo ezine ezingaphansi kwengalane kutholakala amaqembu athi ele Flame Lily, ele Tsholotsho lele Whawha, wona alemiklomelo elitshumi lathoba minwe mbili (18), kuthi iqembu elijeke amanye engalaneni ngele Dongo Sawmills elilemiklomelo elitshumi lesikhombisa (17).
........................................................................
Sikhangele imidlalo yenguqu edlalwe kwamanye amazwe;
NgaseNgilandi isimo sengalane sikhomba ukuba iqembu le Manchester City yilo elihlezi endaweni yakuqala lilemiklomelo elitshumi lambili (12) ngemva kokudlala imidlalo emine.
Ngemva kwalo kutholakala iqembu le Crystal Palace lona elilemiklomelo eyithoba munwe munye lona lilandelwa ngele Leicester lele Swansea alemiklomelo eyithoba minwe mbili.
Amaqembu alodumo athi ele Manchester United, ele Arsenal kanye lele Liverpool alemiklomelo eyisikhombisa iqembu ngalinye.
Elizweni le South Africa amaqembu athi ele Kaizer Chiefs kanye lele Ajax Cape Town yiwo angene kusigaba se final eyomncintiswano we MTN8 ngemva kokuba iChiefs inqobe ele Bloemfontein Celtic kwathi ele Ajax latshaya ele Bidvest Wits nge 1 ka nya okutsho ukuba lawa maqembu anqobe nge 2 ka 1 nxa sekuhlanganiswa lempumela eyemidlalo wehlandla lakuqala yona eyaphela zingutshiki lobhanqa 1 ka 1.
..........................................................
Sikhangele umdlalo wokugijima;
Umdlali wase Zimbabwe uGivemore Mudzinganyama uphutshe ekundawo yesithathu kumjaho wamakhilomitha alitshumi kumncintiswano we Mandela Marathon oqhutshelwe elizweni le South Africa ngeSonto edluleyo.
Onqobe kulumjaho ngu Elroy Gelant oyisizalwane se South Africa.
Kumjaho we half marathon umdlali we Zimbabwe uRabson Chigara uqede ekundawo yethoba minwe mbili kuthi ku marathon ngokwayo uMike Fokorani uqede ekundawo yesihlanu kwathi uMunyaradzi Jari yena waphutsha ekundawo yesikhombisa.
Onqobe ku marathon ngu Matela Makhetha odabuka elizweni le Lesotho kuthi onqobe ku half marathon ngu Lucky Mohale owase South Africa.
Kucele labesifazane u Tabitha Tsatsa uphutshe ekundawo yesine ku marathon kwathi u Lizih Chokore uqede ekundawo yethoba minwe mbili ngemva kwakhe kulodadewabo uChiedza yena elandelwa ngu Monica Kativhu oqede ekundawo yetshumi.
Onqobe ku marathon kucele labesifazane ngu Selam Abere Alebachew oyisizalwane se Ethiopia.