Kuliviki kuhlelo lweWoza Friday sileqembu elilodumo elicula umculo weMbube ele Black Umfolosi, elisanda kugqiba umnyaka ka2014 ngohambo lokuyacula kwamanye amazwe olubikwa luphumelele okwamagama.
Iqembu le Black Umfolosi lithi libe lohambo oluhle olokuya elizweni le Canada lapho elibe lemibukiso etshiye izizalwane zalelolizwe zimanzi te ngenjabulo.
UDube uthi umdlalo wabo othiwa Umhlaba uthokozise kakhulu abantu be Canada. Lumdlalo ukhuthaza abantu ukuba bangatshaphazi umhlaba abahlezi kuwo ukuze lezizukulwane ezilandelayo ziwuthole usesimeni esihle.
Lumdlalo ubuhlanganiswa lengoma ezitsheyeneyo ezigoqqqela eziculwe ngolimi lwesintu ezinye ezidume umhlaba jikelele ezifana lethi Imbube kanye lethi Nkosi Sikelela.
UDube uthi lonyaka bazaphindela njalo kwele Canada ngenyanga kaNtulikazi ngoba kulendawo abangasenelisanga ukuyafika kuzo loba nje kwakuhlelwe ukuba bayekhona.
Iqembu le Black Umfolosi libunjwe ngomnyaka ka 1982 libunjwa ngamajaha ayefunda esikolo se George Silundika.
UDube lo Sotsha Moyo yibo abaseleyo eqenjini kulabo ababumba iqembu njalo uDube uthi bazayala belokhu beqhubekela phambili ngomculo ikanti lonyaka kulamathuba okuba leliqembu liphumelele okumangalisayo.
Nyakenye bathole imendulo kumkhosi weZima ngengoma yabo ethiwa Summertime.
