ពួកទាហានជើងទឹកស.រ.អា.បានត្រូវបញ្ជូនទៅដាក់ពង្រាយនៅក្នុងផ្នែកខាងជើងនៃប្រទេសស៊ីរីដើម្បីជួយវាយយកមកវិញនូវក្រុង Raqqa ពីពួកជនសកម្មប្រយុទ្ធរដ្ឋឥស្លាម។
កាសែត Washington Post ដែលបានរាយការណ៍មុនគេអំពីការដាក់ពង្រាយទាហានអាមេរិកាំងទាំងនេះ បានផ្សាយថា ការទៅដល់នៃកងកាំភ្លើងធំជាការបង្កើនច្រើនក្រាស់ក្រែលនៃការប្រើប្រាស់កងកម្លាំងធម្មតារបស់ស.រ.អា.នៅក្នុងប្រទេសស៊ីរី។ គ្មានការប្រកាសជាផ្លូវការទេ ក៏ប៉ុន្តែពួកមន្ត្រីយោធាបានបញ្ជាក់ប្រាប់ទីភ្នាក់ងារព័ត៌មានឯទៀតៗថា ការដាក់ពង្រាយទាហានទាំងនេះជាការពិតមែន។ កងអង្គភាពមួយនៃកាំភ្លើងធំរបស់កងទ័ពជើងគោកស.រ.អា.បានទៅដល់កន្លែងនោះហើយ។
ពួកទាហានជើងទឹកក៏បានត្រូវបញ្ជូនទៅកាន់ក្រុង Manbij ឋិតនៅចម្ងាយប្រមាណ១៣៨គ.ម.ទិសពាយ័ព្យនៃក្រុង Raqqa ដែលជារដ្ឋធានីប្រកាសដោយខ្លួនឯងរបស់ពួករដ្ឋឥស្លាម។ គេមានជំនឿថា មានយុទ្ធជនរដ្ឋឥស្លាម៤ពាន់នាក់នៅក្នុងក្រុង Raqqa។
ក្រសួងការពារជាតិស.រ.អា.បានពណ៌នាបេសកកម្មនៅក្នុងក្រុង Manbij ថា ជាបេសកកម្មមួយដើម្បី «ធានារ៉ាប់រងជាថ្មី និងបញ្ចៀស» ភាគីនានានៅក្នុងមូលដ្ឋានកុំឱ្យវាយប្រហារគ្នា។
រហូតមកដល់ពេលនេះ ស.រ.អា.បានកម្រិតចំនួនទាហានខ្លួននៅលើដីក្នុងប្រទេសស៊ីរីតែត្រឹមកងកម្លាំងបំពេញកិច្ចប្រតិបត្តិការពិសេសចំនួន៥០០នាក់ដើម្បីគាំទ្រកងកម្លាំងប្រជាធិបតេយ្យស៊ីរីដែលទ្រទ្រង់ដោយស.រ.អា.ដែលជាសម្ព័ន្ធភាពមួយនៃកងកម្លាំងអារ៉ាប់ និង Kurde ប្រយុទ្ធប្រឆាំងនឹងពួករដ្ឋឥស្លាម៕
