អគ្គមេបញ្ជាការនៃកងនាវាចម្បាំងស.រ.អានៅក្នុងមហាសមុទ្រប៉ាស៊ីហ្វិកបានចូលរួមក្នុងបេសកកម្មឃ្លាំមើលមួយនៅលើសមុទ្រចិនខាងត្បូងជាផ្នែកមួយនៃទស្សនកិច្ចមួយក្នុងប្រទេសហ្វីលីពីន។
កាលពីថ្ងៃអាទិត្យកងទ័ពជើងទឹកស.រ.អា បានចេញផ្សាយរូបថតបង្ហាញឲ្យឃើញលោកឧត្តមនាវី Scott Swift ជិះនៅក្នុងយន្តហោះ P-8A Poseidon មួយគ្រឿងនៅក្នុងបេសកកម្មឃ្លាំមើលមួយមានរយៈពេល៧ម៉ោង ដែលបានប្រព្រឹត្តទៅកាលពីថ្ងៃសៅរ៍។ គេមិនដឹងទេថា តំបន់ណាខ្លះបានឋិតនៅក្រោមបេសកកម្មឃ្លាំមើលនេះទេ។
ការហោះហើរដោយកងយន្តហោះឃ្លាំមើលរបស់ស.រ.អាជា ប្រភពនៃការដែលឲ្យប្រទេសចិនមួរម៉ៅ ពីព្រោះប្រទេសនេះបានទាមទារសមុទ្រចិនខាងត្បូងសឹងតែទាំងអស់ថាជារបស់ផងខ្លួន ហើយប្រទេសចិនមានជម្លោះខាងទឹកដីជាមួយប្រទេសមួយចំនួនផងដែរ ដោយមានរួមបញ្ចូលប្រទេសហ្វីលីពីន និងប្រទេសវៀតណាម។
ស.រ.អា ដែលបាននិយាយថា ខ្លួនមិនកាន់ជើងប្រទេសណាមួយក្នុងជម្លោះទាំងនេះ បានបង្កើនកិច្ចសហប្រតិបត្តិការសន្តិសុខក្នុងសមុទ្រជាមួយរដ្ឋាភិបាលក្រុងហាណូយ និងរដ្ឋាភិបាលក្រុងម៉ានីលកាលពីប៉ុន្មានឆ្នាំថ្មីៗនេះ។ រដ្ឋាភិបាលក្រុង វ៉ាស៊ីនតោនបាននិយាយថាគេត្រូវតែថែរក្សាសេរីភាពខាងនាវាចរណ៍នៅក្នុងតំបន់នោះ ហើយថាជម្លោះត្រូវតែដោះស្រាយដោយសន្តិវិធី៕
