សហជីព និងពលរដ្ឋមួយចំនួននៅក្នុងទីក្រុងភ្នំពេញ បានស្នើឱ្យរដ្ឋាភិបាលជួយទប់តម្លៃប្រេងសាំងដែលកំពុងកើនឡើង គ្រាមិនទាន់មានសេចក្តីរាយការណ៍ពីភាគីរដ្ឋាភិបាលចំពោះកង្វះការផ្គត់ផ្គង់ប្រេងឥន្ធនៈនៅក្នុងប្រទេស។
នៅក្នុងសេចក្តីថ្លែងការណ៍របស់សហភាពសហជីពកម្ពុជាចុះថ្ងៃទី២២ ខែមិថុនា ឆ្នាំ២០២២ សហជីពដែលដឹកនាំដោយអ្នករិះគន់រដ្ឋាភិបាលមិនសំច័យមាត់ លោក រ៉ុង ឈុន បានលើកឡើងថា ក្នុងរយៈពេលឥឡូវនេះ តម្លៃប្រេងឥន្ធនៈហក់ឡើងខ្ពស់ ដែលធ្វើឱ្យប្រជាពលដ្ឋភាគច្រើនទទួលផលប៉ះពាល់យ៉ាងធ្ងន់ធ្ងរ ចំពោះជីវភាពរស់នៅប្រចាំថ្ងៃ។ សហជីពបន្ថែមថារដ្ឋាភិបាលមិនបានខ្វល់អំពីតម្លៃប្រេងឥន្ធនៈនេះឡើយ។
អាជីវករនៅតាមផ្លូវក្នុងខណ្ឌមានជ័យទីក្រុងភ្នំពេញមួយរូប គឺលោក លឹម តុល អាយុ៣២ឆ្នាំ កំពុងរងផលប៉ះពាល់ពីការហក់ឡើងនៃតម្លៃប្រេងសាំង។
លោក លឹម តុល ដែលមានកូនបីនាក់ក្នុងបន្ទុក ឱ្យដឹងថាតម្លៃប្រេងសាំងដែលកំពុងកើនឡើង បានធ្វើឱ្យការចំណាយលើទំនិញដែលលោកទិញពីឈ្មួញកណ្តាលមកលក់នោះកើនថ្លៃផងដែរ។
លោកនិយាយថា៖ «គេក៏ឆ្លើយដូចយើង ដូចគ្នា ថាអីវ៉ាន់ គេយកមកពីលើនោះ ក៏គេឡើងថ្លៃតាមហ្នឹងដូចគ្នា និយាយរួមពាក់ព័ន្ធនឹងរឿងសាំងនឹងហ្មង»។
អ្នកលក់កាបូប និងរបស់របរប្រើប្រាស់ជជុះរូបនេះ បន្ថែមថា នៅពេលឈ្មួញកណ្តាលដំឡើងថ្លៃទំនិញ លោកក៏ត្រូវបង្ខំចិត្តដំឡើងថ្លៃរបស់របរដែលលោកកំពុងដាក់លក់ផងដែរ។ ការណ៍នេះបានធ្វើឱ្យចំនួនអតិថិជនថយចុះ និងកំពុងធ្វើឱ្យជីវភាពប្រចាំថ្ងៃរបស់លោកស្ថិតក្នុងស្ថានភាពពិបាកមួយ ព្រោះត្រូវក្បិតក្បៀតលើការចាយវាយ។
លោក លឹម តុល និយាយថា៖ «ក្បិតក្បៀតច្រើន ពីមុនយើងលក់បាន យើងចាយតាមហ្នឹង តែឥឡូវចំណូលយើងរកបានតិច ក៏យើងចាយទៅតាមហ្នឹងដូចគ្នា។ ពីមុន ខ្ញុំលក់ពីរកន្លែង។ ប្រពន្ធខ្ញុំលក់មួយកន្លែង ខ្ញុំលក់មួយកន្លែង តែឥឡូវខ្ញុំឱ្យប្រពន្ធខ្ញុំ ធ្វើការរោងចក្រហើយព្រោះយើងទប់អត់ឈ្នះ ទីមួយបង់ម៉ូតូ ប៉ុន្តែបើធ្វើការរោងចក្រ យើងប្រាក់ខែទៀង តែយើងលក់អីចេះ អត់ទៀងទេ»។
តម្លៃប្រេងសាំងនៅទីក្រុងភ្នំពេញ កំពុងត្រូវបានដាក់លក់ក្នុងតម្លៃពីរផ្សេងគ្នា។ ប្រេងសាំងធម្មតាមានតម្លៃ៥.៨០០រៀលក្នុងមួយលីត្រ និងប្រភេទស៊ុបពែ មានតម្លៃ៦.៤០០រៀលក្នុងមួយលីត្រ។ ដោយឡែក ប្រេងម៉ាស៊ូត មានតម្លៃ ៦.៣០០រៀលក្នុងមួយលីត្រ។
តម្លៃប្រេងសាំងដែលកំពុងហក់ឡើងខ្ពស់ មិនធ្លាប់កើតពីមុនមក បាននាំឱ្យទំនិញគ្រប់មុខនៅលើទីផ្សារក៏មានតម្លៃហក់ឡើងខ្ពស់ដែរ ដែលធ្វើឱ្យប្រជាពលរដ្ឋខ្មែរ អ្នកមានប្រាក់ចំណូលទាប និងមធ្យម ទទួលរងនូវផលប៉ះពាល់យ៉ាងធ្ងន់ធ្ងរ ចំពោះជីវភាពប្រចាំថ្ងៃរបស់ពួកគាត់។ ក្នុងនោះគឺមានដូចជាមន្ត្រីរាជការ អាជីវករ កម្មករ អ្នកលក់ដូរមិនរៀបរយ និងកសិករជាដើម។ នេះបើតាមសេចក្តីថ្លែងការណ៍របស់សហភាពសហជីពកម្ពុជា។
សហជីពដដែលស្នើឱ្យរដ្ឋាភិបាលកម្ពុជាកាត់បន្ថយពន្ធលើការនាំចូលប្រេងឥន្ធនៈ និងបញ្ចេញកញ្ចប់ថវិកាជាតិ ដើម្បីទប់ស្កាត់ និងបញ្ចុះតម្លៃប្រេងឥន្ធនៈត្រឹមតម្លៃមួយសមរម្យ ក្នុងការសម្រួលដល់ការប្រើប្រាស់ និងជីវភាពរស់នៅរបស់ប្រជាពលរដ្ឋខ្មែរ បើទោះជាការកើនឡើងថ្លៃប្រេងឥន្ធនៈនេះជាប់ពាក់ព័ន្ធនឹងសង្គ្រាមនៅអ៊ុយក្រែន។
ប្រធានសហភាពសហជីពកម្ពុជា លោក រ៉ុង ឈុន ជឿថាតម្លៃប្រេងសាំងដែលឡើងយ៉ាងគំហុកនេះ កំពុងក្លាយជាបន្ទុកធ្ងន់មួយរបស់ប្រជាពលរដ្ឋខ្មែរ បន្ទាប់ពីពួកគាត់រងការវាយប្រហារយ៉ាងដំណំពីជំងឺឆ្លងកូវីដ១៩។
លោកប្រាប់វីអូអេនៅថ្ងៃសុក្រនេះថា៖ «យើងដឹងហើយ ប្រជាពលរដ្ឋជួបវិបត្តិសម័យកូវីដ ហើយទើបតែមាន ហៅថា ជីវភាពរើបៗឡើងវិញ។ ឥឡូវនេះត្រូវមកជាន់មួយតង់ទៀត គឺតម្លៃប្រេងឥន្ធនៈឡើងខ្ពស់ធ្វើឱ្យតម្លៃទីផ្សារ ម្ហូបអាហារសព្វគ្រប់សារពើហ្នឹង មានការហក់ឡើងខ្ពស់ទៅតាមហ្នឹងដែរ អាហ្នឹងដែលជាផលប៉ះពាល់យ៉ាងធ្ងន់ធ្ងរ ចំពោះពួកគាត់បាទ»។
ខណៈប្រេងសាំងកំពុងឡើងនេះ ប្រទេសមួយចំនួនដូចជាថៃ និងឡាវក្នុងតំបន់អាស៊ីអាគ្នេយ៍ បានប្រឈមនឹងកង្វះការផ្គត់ផ្គង់ប្រេង តែតម្លៃប្រេងសាំងមិនខ្ពស់ដូចនៅក្នុងប្រទេសកម្ពុជា និងសិង្ហបុរីទេ។ នេះបើតាមការកត់សម្គាល់របស់លោក រ៉ុង ឈុន។
មេដឹកនាំសហជីពរូបនេះនិយាយថាការទប់ស្កាត់តម្លៃប្រេងឥន្ធនៈមិនឱ្យកើនឡើងបន្តទៀត អាចធ្វើទៅបានបើរដ្ឋាភិបាលកម្ពុជាមានឆន្ទៈ។
លោកថ្លែងថា៖ «រដ្ឋាភិបាលមានលទ្ធភាព ក្នុងការបញ្ចុះ តម្លៃដែលហក់ឡើងខ្ពស់ហ្នឹង បើសិនជារដ្ឋាភិបាលមានចេតនានឹងដោះស្រាយបញ្ហាទាំងអស់នេះ ពីព្រោះបើយើងមើលប្រទេស ដែលជាសមាជិកអាស៊ានដូចគ្នា យើងឃើញថា កម្ពុជាយើង វាហក់ឡើងខ្ពស់ជាងគេហើយ បន្ទាប់ពីSingapore [សិង្ហបុរី]។ សិង្ហបុរី យើងឃើញតម្លៃខ្ពស់ ប៉ុន្តែបន្ទាប់មក គឺកម្ពុជាយើងហ្នឹង»។
វីអូអេមិនទាន់អាចទាក់ទងសុំការអត្ថាធិប្បាយពីលោក ជៀប សួរ អគ្គនាយកនៃអគ្គនាយកដ្ឋានប្រេងកាតនៅក្រសួងរ៉ែ និងថាមពលតាមទូរស័ព្ទនៅថ្ងៃសុក្រនេះ។ វីអូអេក៏មិនអាចទាក់ទងសុំការអត្ថាធិប្បាយពីក្រុមហ៊ុនផ្គត់ផ្គង់ប្រេងសាំងធំៗនៅកម្ពុជាមួយចំនួ ដូចជា Caltex, Total និង Sokimexទាំងតាមទូរ័សព្ទលើតុ និងសារអ៊ីមែល។
លោក លឹម តុល អ្នកលក់កាបូបជជុះ និយាយថា លោកចង់ឃើញរដ្ឋាភិបាលទប់ថ្លៃប្រេងសាំងមិនឲ្យឡើងខ្ពស់ទៀតផងដែរ ព្រោះលោកត្រូវចំណាយ១២.០០០រៀល លើសាំងដែលដាក់លក់តាមផ្លូវក្នុងមួយថ្ងៃសម្រាប់២លីត្រ។ លោកថាបើពលរដ្ឋរួមគ្នាច្រើនស្នើសុំលោកនាយករដ្ឋមន្ត្រី ហ៊ុន សែន នោះលោកនាយករដ្ឋមន្ត្រីនឹងពិចារណា។
លោកថ្លែងថា៖ «ទាល់តែប្រជាពលរដ្ឋទាំងអស់ស្នើសុំទាំងអស់គ្នា ឱ្យសម្តេចគាត់ មើលអាថ្លៃសាំងហ្នឹង។ ដូចខ្ញុំរឺម៉ក មួយថ្ងៃ២លីត្រ។ បងឯង២លីត្រគិតប៉ុន្មាន ២លីត្រ៨ពាន់ [រៀល] ហើយ អ៊ី!១លីត្រ៦ពាន់ ឥឡូវនេះខ្ញុំចាក់៦ពាន់ សាំងធម្មតា។ បើយើងចាក់ហ្គារ៉ាស៥.៨០០[រៀល]ទេ ប៉ុន្តែបើយើងចាក់តាមចិញ្ចើមថ្នល់គឺ៦ពាន់»។
កាលពីខែឧសភា ឆ្នាំ២០២២ លោកនាយករដ្ឋមន្រ្តី ហ៊ុន សែន បានថ្លែងថាប្រេងសាំងឡើងថ្លៃនៅទូទាំងពិភពលោក មិនមែនតែនៅប្រទេសកម្ពុជាឡើយ។ លោកផ្តាំផ្ញើទៅប្រជាពលរដ្ឋខ្មែរ កុំឱ្យចាញ់បោកការឃោសនាថាពេលជាប់ឆ្នោតនឹងធ្វើឱ្យសាំងចុះថ្លៃ។
គួរបញ្ជាក់ថាតម្លៃប្រេងសាំងបានបន្តហក់ឡើងខ្ពស់ក្នុងរយៈពេលប្រមាណ៤ខែចុងក្រោយនេះ គឺក្រោយការផ្ទុះសង្គ្រាមនៅប្រទេសអ៊ុយក្រែន កាលពីខែកុម្ភៈ ឆ្នាំ២០២២៕
