ទីភ្នាក់ងារនានារបស់អង្គការសហប្រជាជាតិប្រចាំនៅកម្ពុជាបានចេញសេចក្ដីប្រកាសមួយដែលក្នុងនោះបានស្នើឱ្យអាជ្ញាធរកម្ពុជាបញ្ចេញជាសាធារណៈនូវទិន្នន័យទាំងស្រុងនៃការឆ្លងជំងឺកូវីដ១៩ចូលពន្ធនាគារដ៏ចង្អៀតណែននៅកម្ពុជា។
សេចក្ដីប្រកាសព័ត៌មានរបស់អ.ស.ប.ដែលចេញផ្សាយនៅថ្ងៃសុក្រនេះបានឱ្យដឹងថា អ.ស.ប.ដែលបានផ្ដល់ជំនួយដល់អគ្គនាយកដ្ឋានពន្ធនាគារក្រសួងមហាផ្ទៃនូវសម្ភារៈអនាម័យមួយចំនួនតាមការស្នើសុំនោះក៏មិនមានទិន្នន័យក្នុងដៃអំពីចំនួនពន្ធនាគារនិងអ្នកជាប់ឃុំដែលបានឆ្លងនោះដែរ។
រដ្ឋាភិបាលកម្ពុជាមិនបានបញ្ជាក់ទេថាចំនួនឆ្លងក្នុងពន្ធនាគារមានប៉ុន្មានករណី តែបើតាមអ្វីដែលមន្ត្រីធ្លាប់ប្រាប់ប្រព័ន្ធផ្សព្វផ្សាយនានាគឺមានយ៉ាងហោចណាស់១៥៨ករណីនៅពន្ធនាគារខេត្តព្រះសីហនុពន្ធនាគារខេត្តកណ្ដាលនិងមណ្ឌលអប់រំកែប្រែទី១(ម១)នៃពន្ធនាគារព្រៃស។
អង្គការឃ្លាំមើលសិទ្ធិមនុស្សអន្តរជាតិធំៗចំនួនពីរគឺHuman Rights Watch និងAmnesty International បានអះអាងកាលពីថ្ងៃអាទិត្យកន្លងទៅថា ខ្លួនមានទិន្នន័យផ្ទៃក្នុងរបស់រដ្ឋាភិបាលដែលថា ចំនួនឆ្លងមានរាប់រយករណីហើយកំពុងរាលដាលចូលមន្ទីរឃុំឃាំងមួយទៀតគឺពន្ធនាគាររាជធានីភ្នំពេញ(គុកPJ)។
លោកនុត សវនាអ្នកនាំពាក្យអគ្គនាយកដ្ឋានពន្ធនាគារមិនបានលើកទូរស័ព្ទវីអូអេស្នើសុំការបំភ្លឺនិងឆ្លើយតបទេនារសៀលថ្ងៃសុក្រនេះ។លោកធ្លាប់ច្រានចោលការអះអាងរបស់អង្គការ Human Rights Watch និង Amnesty International។
ជំនួយដែលអ.ស.ប.បានបញ្ជូនទៅឱ្យអគ្គនាយកដ្ឋានពន្ធនាគារនោះមានថ្នាំរាប់ម៉ឺនបន្ទះស្មើនឹងរាប់សិបម៉ឺនគ្រាប់និងសម្ភារៈប្រឆាំងកូវីដរួមមានសម្លៀកបំពាក់ពេទ្យយ៉ាងច្រើនសន្ធឹកសន្ធាប់។
អ.ស.ប. ក៏បានស្នើឱ្យរដ្ឋពិចារណាឡើងវិញនិងចាត់ទុកការឃុំខ្លួនរង់ចាំសវនាការជាជម្រើសចុងក្រោយដើម្បីបន្ធូរបន្ថយបន្ទុកពន្ធនាគារដែលគិតត្រឹមដំណាច់ខែធ្នូមានអ្នកជាប់ឃុំប្រមាណ៤ម៉ឺននាក់៕
