លោកប្រធានាធិបតីសហរដ្ឋអាមេរិក ដូណាល់ ត្រាំ មានគម្រោងធ្វើជាម្ចាស់ផ្ទះរៀបចំទទួលប្រធានាធិបតីស៊ី ជីងពី នៃប្រទេសចិនដើម្បីចូលរួមសន្និសីទកំពូលរយៈពេល២ថ្ងៃនៅវិមានរបស់លោកក្នុងរដ្ឋ Florida នៅតាមបណ្តោយឆ្នេរមហាសមុទ្រអាត់ត្លង់ទិក ដែលជាជំនួបលើកទីមួយរវាងមេដឹកនាំពិភពលោកទាំង២។
ទាំងរដ្ឋាភិបាលក្រុងវ៉ាស៊ីនតោននិងរដ្ឋាភិបាលក្រុងប៉េកាំងមិនបានបញ្ជាក់ពីសន្និសីទកំពូលនៅឯគេហដ្ឋាន Mar-a-Lago របស់ប្រធានាធិបតីត្រាំនោះទេ ក៏ប៉ុន្តែបណ្តាញរាយការណ៍របស់សហរដ្ឋអាមេរិកបានរាយការណ៍ថា ជំនួបរវាងមេដឹកនាំទាំងពីរដែលមានសេដ្ឋកិច្ចធំជាងគេបង្អស់របស់ពិភពលោកនោះ បានត្រូវគ្រោងធ្វើឡើងពីថ្ងៃទី៦និងថ្ងៃទី៧ ខែមេសា។
របាយការណ៍បានប្រាប់ឲ្យដឹងទៀតថា លោករដ្ឋមន្រ្តីការបរទេសសហរដ្ឋអាមេរិក Rex Tillerson ត្រូវគេរំពឹងនឹងបញ្ចប់គម្រោងសម្រាប់ជំនួបរវាងប្រធានាធិបតីត្រាំនិងប្រធានាធិបតីស៊ីនៅពេលដែលលោកបំពេញទស្សនកិច្ចនៅទីក្រុងប៉េកាំងនៅចុងសប្តាហ៍នេះ។ ក្រសួងការបរទេសចិនបានប្រាប់ឲ្យដឹងកាលពីថ្ងៃអង្គារថា «ប្រទេសទាំង២មានការប្រាស្រ័យទាក់ទងគ្នាដ៏ជិតស្និទ្ធអំពីការផ្លាស់ប្តូររវាងមេដឹកនាំទាំង២នេះ»។
លោក Sean Spicer អ្នកនាំពាក្យសេតវិមាន បាននិយាយកាលពីថ្ងៃចន្ទថា ប្រធានាធិបតី ត្រាំ និងប្រធានាធិបតី ស៊ី នឹងពិភាក្សាការគំរាមកំហែងបណ្តាលមកពីកម្មវិធីអភិវឌ្ឍន៍អាវុធនុយក្លែអ៊ែរបស់កូរ៉េខាងជើង ហើយនិងការសាកល្បងកាំជ្រួចមីស៊ីល និងបញ្ហាផ្សេងៗទៀត។
លោកប្រធានាធិបតីត្រាំ ជារឿយៗបានអំពាវនាវដល់ប្រទេសចិនឲ្យទប់សកម្មភាពដ៏គគ្លើនរបស់កូរ៉េខាងជើង ដោយចង្អុលបង្ហាញពីឥទ្ធិពលរបស់រដ្ឋាភិបាលក្រុងប៉េកាំងលើរបបមេដឹកនាំកូរ៉េខាងជើង Kim Jong Un។
សហរដ្ឋអាមេរិក ក៏បានសំដែងនូវការជំទាស់ប្រឆាំងរបស់ខ្លួនដល់ការបង្កើតកោះសិប្បនិមិត្តរបស់រដ្ឋាភិបាលក្រុងប៉េកាំងនៅក្នុងសមុទ្រចិនខាងត្បូងដែលជារឿយៗបានបញ្ជូននាវាចំបាំងរបស់ខ្លួនទៅដែលទឹកអន្តរជាតិនៅជិតប្រជុំកោះទាំងនោះដែលជាការបង្ហាញនូវកម្លាំងនៅក្នុងតំបន់៕
