លោករដ្ឋមន្ត្រីការបរទេសស.រ.អា. Rex Tillerson បានទទួលការរិះគន់អំពីសេចក្តីសម្រេចមួយរបស់លោកក្នុងការមិនចូលរួមក្នុងការប្រជុំរបស់រដ្ឋមន្ត្រីការបរទេសនៃអង្គការអូតង់នៅខែក្រោយក្នុងក្រុងប្រ៊ុចសែល និងអំពីសេចក្តីប្រកាសមួយថាលោកនឹងធ្វើដំណើរទៅកាន់ប្រទេសរុស្ស៊ីនៅខែមេសា។
នៅក្នុងសន្និសីទកាសែតមួយកាលពីថ្ងៃអង្គារនៅឯក្រសួងការបរទេសស.រ.អា. លោក Mark Toner អ្នកនាំពាក្យស្តីទីនៃក្រសួងការបរទេសអាមេរិកាំងបានទទួលសំណួរមួយចំនួនពីពួកអ្នកសារព័ត៌មានអំពីការប្រជុំនេះនៃអង្គការអូតង់។ អ្នកកាសែតម្នាក់បាននិយាយថា មានគេនិយាយប្រាប់លោកថា អង្គការអូតង់បានស្នើកាលបរិច្ឆេទមួយចំនួនជូនលោកTillerson ដើម្បីឱ្យលោកអាចអញ្ជើញទៅចូលរួមក្នុងការប្រជុំនេះ ក៏ប៉ុន្តែកាលបរិច្ឆេទទាំងនេះបានត្រូវច្រានចោល។ លោក Toner បាននិយាយថា បញ្ហាគឺការកំណត់ពេលវេលាមិនត្រូវគ្នា។
លោក Toner បាននិយាយថា «យើងអរគុណដល់ការខិតខំប្រឹងប្រែងដើម្បីឱ្យលោករដ្ឋមន្ត្រី Tillerson អាចទៅចូលរួមក្នុងការប្រជុំនេះបាន។ ខ្ញុំអាចនិយាយថា យើងបានស្នើថ្ងៃខែជាជម្រើសដែលលោករដ្ឋមន្ត្រីអាចចូលរួមក្នុងការប្រជុំនេះបាន ហើយនៅពេលនេះថ្ងៃខែទាំងនេះកំពុងត្រូវពិចារណា។ ជាការមានសារៈសំខាន់ត្រូវចងចាំថា នេះមិនមែនជាការសម្រេចតែមួយរបស់ទីស្នាក់ការធំរបស់អង្គការអូតង់ទេ ក៏ប៉ុន្តែថ្ងៃខែនេះត្រូវសម្រេចដោយការមូលមតិគ្នារវាងប្រទេសជាសម្ព័ន្ធមិត្តទាំងអស់២៨»។
មន្ត្រីម្នាក់ទៀតនៃក្រសួងការបរទេសស.រ.អា.បាននិយាយថាលោក Tillerson នឹងធ្វើដំណើរទៅកាន់ប្រទេសអ៊ីតាលីក្នុងខែមេសាដើម្បីចូលរួមក្នុងការប្រជុំមួយនៃពួកប្រទេស G-20 ហើយបន្ទាប់មកលោកនឹងអញ្ជើញទៅកាន់ប្រទេសរុស្ស៊ី។
នៅក្នុងសន្និសីទកាសែតនេះ លោក Toner បានថ្លែងថា លោកមិនទាន់មានសេចក្តីប្រកាសជាផ្លូវការនៅឡើយទេអំពីដំណើរទស្សនកិច្ចរបស់លោក Tillerson ទៅកាន់ប្រទេសរុស្ស៊ី ហើយក៏មិនអាចនិយាយដែរថាតើលោកនឹងជួបជាមួយប្រធានាធិបតីរុស្ស៊ី Vladimir Putin ដែរឬបែបណាទេ៕
