ស៊ីរី​ចង់​មាន​ទំនាក់ទំនង «យុទ្ធសាស្ត្រ» ជាមួយ​អ៊ុយក្រែន ខណៈ​អ៊ុយក្រែន​ប្ដេជ្ញា​ផ្ដល់​ជំនួយ​ស្បៀង​អាហារ​បន្ថែម

ប្រទេស​ស៊ីរី​សង្ឃឹម​ថា​នឹង​មាន «ភាព​ជា​ដៃគូ​យុទ្ធសាស្ត្រ» ជាមួយ​នឹង​ប្រទេស​អ៊ុយក្រែន។ នេះ​បើ​យោង​តាម​សេចក្ដី​រាយការណ៍​របស់​ទីភ្នាក់ងារ​សារព័ត៌មាន Reuters ដែល​យោង​លើ​ការ​បញ្ជាក់​របស់​រដ្ឋមន្ត្រី​ការបរទេស​ថ្មី​របស់​ស៊ីរី។ ការ​បញ្ជាក់​នេះ​បាន​ធ្វើឡើង​ស្របពេល​ដែល​អ៊ុយក្រែន​ឈាន​ទៅ​កសាង​ទំនាក់ទំនង​ជាមួយ​នឹង​ថ្នាក់ដឹកនាំ​អ៊ិស្លាម​ថ្មី​របស់​ស៊ីរី​ចំពេល​ដែល​ឥទ្ធិពល​របស់​រុស្ស៊ី​បាន​ថមថយ។

រដ្ឋមន្ត្រី​ការបរទេស​ដែល​ទើប​តែងតាំង​ថ្មី​របស់​ស៊ីរី​លោក Asaad Hassan al-Shibani បាន​ប្រាប់​រដ្ឋមន្ត្រី​ការបរទេស​អ៊ុយក្រែន​លោក Andrii Sybiha ថា៖ «ភាព​ជា​ដៃគូ​យុទ្ធសាស្ត្រ​រវាង​យើង​និង​អ៊ុយក្រែន​ក្នុង​កម្រិត​នយោបាយ សេដ្ឋកិច្ច និង​សង្គម និង​ភាព​ជា​ដៃគូ​ផ្នែក​វិទ្យាសាស្ត្រ​នឹង​កើតមាន»។

លោក​បាន​បន្ថែម​ថា៖ «ជា​ការពិត ប្រជាជន​ស៊ីរី​និង​ប្រជាជន​អ៊ុយក្រែន​មាន​បទពិសោធន៍​ដូច​គ្នា​និង​ការ​ឈឺចាប់​ដូច​គ្នា​ដែល​យើង​បាន​ឆ្លងកាត់​អស់​រយៈពេល ១៤ ឆ្នាំ»។ លោក​ថ្លែង​ដូច្នេះ​ចង់​ប្រៀបធៀប​រវាង​សង្គ្រាម​ស៊ីវិល​ដ៏​ឃោរឃៅ​នៅ​ស៊ីរី​ពី​ឆ្នាំ ២០១១ ដល់​ឆ្នាំ ២០២៤ និង​ការ​ដណ្ដើម​កាន់កាប់​របស់​រុស្ស៊ី​នូវ​ទឹកដី​អ៊ុយក្រែន​ដែល​ឈាន​ដល់​ការ​ឈ្លានពាន​ពេញ​ទំហឹង​លើ​អ៊ុយក្រែន​នៅ​ឆ្នាំ ២០២២។

លោក Sybiha ដែល​បាន​ជួប​ជាមួយ​នឹង​មេដឹកនាំ​ថ្មី​របស់​ស៊ីរី​លោក Ahmed Mal-Sharaa នៅ​ក្នុង​ទីក្រុង​ដាម៉ាស​កាលពី​ថ្ងៃ​ចន្ទ​ផងដែរ​នោះ បាន​និយាយ​ថា​អ៊ុយក្រែន​នឹង​បញ្ជូន​ជំនួយ​ស្បៀង​អាហារ​បន្ថែម​ទៀត​ទៅកាន់​ប្រទេស​ស៊ីរី​បន្ទាប់ពី​ជំនួយ​ម្សៅ​ចំនួន ២០ ជើង​ត្រូវ​គេ​រំពឹង​ថា​នឹង​បញ្ជូន​ដល់​ស៊ីរី​នៅ​ថ្ងៃ​អង្គារ​នេះ។

ប្រធានាធិបតី​អ៊ុយក្រែន​លោក Volodymyr Zelenskyy បាន​ប្រកាស​កាលពី​ថ្ងៃ​សុក្រ​សប្ដាហ៍​មុន​អំពី​ការ​បញ្ជូន​ជំនួយ​ស្បៀង​អាហារ​ដំណាក់កាល​ដំបូង​របស់​អ៊ុយក្រែន​ទៅ​កាន់​ប្រទេស​ស៊ីរី​ដែល​មាន​ម្សៅ​ស្រូវ​សាឡី​ចំនួន ៥០០ តោន។ នេះ​គឺ​ជា​ផ្នែក​មួយ​នៃ​គម្រោង​ផ្ដួចផ្ដើម «ធញ្ញជាតិ​ពី​អ៊ុយក្រែន» បែប​មនុស្សធម៌​ក្រោម​កិច្ច​សហប្រតិបត្តិការ​ជាមួយ​នឹង​កម្មវិធី​ស្បៀង​អាហារ​ពិភពលោក​របស់​អង្គការ​សហប្រជាជាតិ៕