ប្រធានាធិបតីជាប់ឆ្នោតលោក Donald Trump ព្យាយាមម្តងទៀតកាលពីថ្ងៃអង្គារ ដើម្បីពន្យារពេលកាត់ទោសរូបលោកក្នុងសំណុំរឿងបង់លុយបំបិតមាត់ ដោយបានស្នើតុលាការសាលាឧទ្ធរណ៍ញូវយ៉កឲ្យអន្តរាគមន៍ ពេលលោកប្រយុទ្ធដើម្បីបញ្ចៀសដំណាក់កាលចុងក្រោយនៃការកាត់ទោសរូបលោក មុនពេលលោកឡើងកាន់តំណែងជាប្រធានាធិបតីអាមេរិកម្តងទៀត។ នេះបើយោងតាមទីភ្នាក់ងារសារព័ត៌មាន AP។
លោក Trump បានដាក់បណ្តឹងឧទ្ធរណ៍នេះ មួយថ្ងៃក្រោយពីចៅក្រមជំនុំជម្រះលោក Juan M. Merchan បានបដិសេធសំណើរបស់លោក Trump ឲ្យព្យួរកាលកំណត់នូវការកាត់ទោសរូបលោក ហើយបានបញ្ជារឲ្យបន្តសំណុំរឿងនេះតាមកាលកំណត់នៅថ្ងៃសុក្រនេះ។
លោក Trump កំពុងព្យាយាមស្នើសុំបទបញ្ជារគ្រាអាសន្នដែលអាចឲ្យរូបលោករួចផុតពីការកាត់ទោស ក្នុងពេលលោកប្តឹងឧទ្ធរណ៍លើការសម្រេចរបស់លោកចៅក្រម Merchanកាលពីសប្តាហ៍មុន ក្នុងការតម្កល់សាលក្រមជាប្រវត្តិសាស្ត្រនេះ។ ការជជែកដេញដោលផ្ទាល់មាត់ ត្រូវបានរំពឹងថានឹងធ្វើនៅពីមុខចៅក្រមតែម្នាក់នៅល្ងាចថ្ងៃអង្គារម៉ោងនៅសហរដ្ឋអាមេរិក ដែលទំនងជាអាចចេញសេចក្តីសម្រេចមិនយូរប៉ុន្មានបន្ទាប់ពីនោះ។
មេធាវីការពារក្តីឲ្យលោក Trump លោក Todd Blanche បានសរសេរក្នុងឯកសារបណ្តឹងឧទ្ធរណ៍ថា ការសម្រេចដ៏ឆាប់រហ័ស មានភាពចាំបាច់«ដើម្បីបង្ការការរំលោភបំពានដែលកំពុងកើតឡើង»លើសិទ្ធិរបស់លោក Trump ដែលការពារដោយរដ្ឋធម្មនុញ្ញ «និងការគំរាមកំហែងធ្វើឲ្យរអាក់រអួល»ដល់ដំណើរការផ្ទេរតំណែងប្រធានាធិបតី។
សល់មិនដល់ពីរសប្តាហ៍ទៀតប៉ុណ្ណោះ មុនស្បថចូលកាន់តំណែង លោក Trump ទំនងជាក្លាយជាប្រធានាធិបតីដំបូងគេដែលឡើងកាន់តំណែង ដោយមានទោសពីបទឧក្រិដ្ឋ។ បើការកាត់ទោសដោយចៅក្រម មិនបានកើតឡើងមុនអាណត្តិទី២របស់លោកចាប់ផ្តើមនៅថ្ងៃទី២០ ខែមករាខាងមុខនេះទេ នោះអភ័យឯកសិទ្ធិប្រធានាធិបតីអាចព្យួរការកាត់ទោសនេះរហូតទាល់តែលោកចប់អាណត្តិ៕
ប្រធានាធិបតីជាប់ឆ្នោតលោក Donald Trump ព្យាយាមម្តងទៀតដើម្បីពន្យារពេលកាត់ទោសរូបលោកនៅថ្ងៃសុក្រខាងមុខពីបទបង់លុយបំបិតមាត់
វេទិកាបញ្ចេញមតិ