អគ្គលេខាធិការគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ ហៅកាត់ថា SEA Games (ស៊ីហ្គេម) លើកឡើងថា កម្ពុជានឹងប្រកួតកីឡាគុនខ្មែរក្នុងស៊ីហ្គេមឆ្នាំ ២០២៣ ជាមួយបណ្តាប្រទេសផ្សេងៗទៀត ដោយមិនមានកីឡាករមកពីប្រទេសថៃចូលរួម ក្រោយមានការមិនពេញចិត្តក្នុងការប្រើឈ្មោះកីឡាគុនខ្មែរ តែមិនមែន Muay Thai។
លោក វ៉ាត់ ចំរើន អគ្គលេខាធិការគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ (CAMSOC) និងជាអគ្គលេខាធិការគណៈកម្មាធិការជាតិអូឡាំពិកកម្ពុជា (NOCC) ប្រាប់ VOA នៅថ្ងៃពុធនេះថា កម្ពុជាបានសម្រេចប្រើឈ្មោះកីឡាគុនខ្មែរ សម្រាប់ការប្រកួតកីឡាស៊ីហ្គេម ដែលកម្ពុជាធ្វើជាម្ចាស់ផ្ទះនាខែឧសភាខាងមុខ ដោយសារគុនខ្មែរជាអត្តសញ្ញាណរបស់ជាតិខ្មែរ។
លោកថ្លែងថា៖ «គុនខ្មែររបស់យើងគឺជាឈ្មោះដើមរបស់ក្បាច់គុនខ្មែរ អត្តសញ្ញាណជាតិរបស់យើង ហើយជាសិល្បៈក្បាច់គុន គេហៅថា យុទ្ធគុនមួយដែលមានចំណាស់ មានដូនតាយើង មានចម្លាក់មានអី។ អ៊ីចឹងវាជារបស់យើង បើយើងធ្វើជាម្ចាស់ផ្ទះ យើងត្រូវតែរៀបចំដើម្បីបំពេញការពេញចិត្តរបស់ប្រជាជាតិរបស់យើង របស់ខ្មែរយើង។ អ៊ីចឹងយើងអត់មានអីប៉ះពាល់ជាមួយនឹងប្រទេសផ្សេងៗទៀតទេ»។
លោក វ៉ាត់ ចំរើន បានបញ្ជាក់បន្ថែមថា បើទោះបីជាថៃមិនបញ្ជូនកីឡាករមកចូលរួមការប្រកួតគុនខ្មែរក្នុងកីឡាស៊ីហ្គេមក្តី ក៏នៅមានប្រទេសយ៉ាងហោចណាស់បួនបានកំណត់មកចូលរួម ហើយក៏មានប្រទេសមួយចំនួនទៀតកំពុងពិភាក្សាក្នុងការត្រៀមមកចូលរួមផងដែរ។
បើតាមលោក វ៉ាត់ ចំរើន ប្រទេសទាំងនោះ រួមមានប្រទេសឡាវ វៀតណាម មីយ៉ាន់ម៉ា ឬភូមា ម៉ាឡេស៊ី ហ្វីលីពីន និងប្រទេសឥណ្ឌូណេស៊ីជាដើម។
ការលើកឡើងរបស់អគ្គលេខាធិការគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ កើតមានឡើង បន្ទាប់ពីភាគីថៃមិនពេញចិត្តនឹងការប្រើពាក្យគុនខ្មែរក្នុងកីឡាស៊ីហ្គេម ដោយពួកគេចង់ឲ្យមានការកំណត់ជាឈ្មោះ «Muay Thai» ទៅតាមកីឡាដែលជាតំណាងជាតិរបស់ថៃ។
សារព័ត៌មាន AFP បានស្រង់សម្តីរបស់លោក Charoen Wattanasin អនុប្រធានគណៈកម្មាធិការជាតិអូឡាំពិកថៃ ដែលថា ប្រទេសថៃនឹងមិនបញ្ជូនកីឡាករមកចូលរួមការប្រកួតកីឡាគុនខ្មែរ ក្នុងស៊ីហ្គេមលើកទី ៣២ នៅកម្ពុជាឡើយ។
បើតាមលោក វ៉ាត់ ចំរើន បើទោះបីជាថៃមិនបញ្ជូនកីឡាករមកចូលរួមកីឡាគុនខ្មែរក្តី ក៏ពួកគេនៅតែបញ្ជូនកីឡាករមកចូលរួមការប្រកួតកីឡាផ្សេងៗទៀត ក្នុងស៊ីហ្គេមលើកទី ៣២ នេះ។
ការប្រកួតកីឡាស៊ីហ្គេមលើកទី ៣២ ឆ្នាំ ២០២៣ ដែលកម្ពុជាធ្វើជាម្ចាស់ផ្ទះនេះ នឹងប្រារព្ធធ្វើឡើងនៅរាជធានីភ្នំពេញ ចាប់ពីថ្ងៃទី៥ ដល់ថ្ងៃទី១៧ ខែឧសភា ឆ្នាំ២០២៣៕
