លោក Keith Ellison អគ្គរដ្ឋអាជ្ញាប្រចាំរដ្ឋមីនីសូតា (Minnesota) នឹងបង្កើនបទចោទប្រកាន់លើមន្ត្រីប៉ូលិសម្នាក់ដែលត្រូវបានបញ្ឈប់ពីការងារ គឺលោក Derek Chauvin ក្រោយពីត្រូវបានចោទប្រកាន់ពីបទឃាតកម្មកម្រិតទី២ ពាក់ព័ន្ធនឹងការស្លាប់របស់បុរសអាមេរិកាំងដើមកំណើតអាហ្រ្វិកម្នាក់ គឺលោក George Floyd។
បន្ថែមលើនេះ អគ្គរដ្ឋអាជ្ញាប្រកាសពីការចោទប្រកាន់លើមន្ត្រីប៉ូលិសបីនាក់ផ្សេងទៀត ដែលបានពាក់ព័ន្ធនឹងករណីស្លាប់របស់លោក Floyd ដែលបណ្តាលឲ្យមានការធ្វើបាតុកម្មទាំងអហិង្សា និងហិង្សា នៅទូទាំងសហរដ្ឋអាមេរិកផងដែរ។ នេះបើយោងតាមកាសែត Star Tribune ដែលជាកាសែតដ៏ធំជាគេបង្អស់ប្រចាំរដ្ឋមីនីសូតា។
លោក George Floyd អាយុ៤៦ឆ្នាំ បានស្លាប់បន្ទាប់ពីលោក Derek Chauvin អតីតមន្ត្រីប៉ូលិសស្បែកស បានសង្កត់ជង្គង់របស់លោក លើករបស់លោក Floyd ក្នុងរយៈពេលជាង ៨នាទី កាលពីថ្ងៃទី២៥កន្លងទៅ។ ហេតុការណ៍នេះបង្កឲ្យមានការខឹងសម្បារសារជាថ្មីម្តងទៀត លើអំពើសាហាវឃោរឃៅរបស់ប៉ូលិសលើសហគមន៍ពលរដ្ឋអាមេរិកាំងដើមកំណើតអាហ្វ្រិក ដែលជាបញ្ហាដ៏ក្តៅគគុកមួយ នៅក្នុងសហរដ្ឋអាមេរិក។ ហេតុការណ៍នេះកើតឡើងរយៈពេល ៥ ខែ មុនការបោះឆ្នោតប្រធានាធិបតីអាមេរិកអាណត្តិថ្មី ឈានមកដល់នៅខែវិច្ឆិកាខាងមុខនេះ។
លោក Derek Chauvin អាយុ៤៤ឆ្នាំ ត្រូវបានបញ្ឈប់ពីការងារ និងត្រូវបានចោទប្រកាន់ពីបទឃាតកម្មកម្រិតទី៣ និងបទមនុស្សឃាតដោយអចេតនាកម្រិតទី២ កាលពីសប្តាហ៍មុន។ បទឃាតកម្មកម្រិតទី២ ដែលជាការបង្កើនបទចោទប្រកាន់ពីបទឃាតកម្មកម្រិតទី៣ អាចឲ្យអតីតមន្ត្រីប៉ូលិសរូបនេះ ជាប់ពន្ធនាគាររយៈពេលយ៉ាងហោចណាស់ ៤០ ឆ្នាំ គឺ ១៥ ឆ្នាំ លើសពីទម្ងន់ទោសសម្រាប់បទឃាតកម្មកម្រិតទី៣។
មន្ត្រីប៉ូលិសបីនាក់ផ្សេងទៀតរួមមានលោក Thomas Lane លោក J. Alexander Kueng និងលោក Tou Thao ដែលពាក់ព័ន្ធនឹងការស្លាប់របស់លោក Floyd ត្រូវបានចោទប្រកាន់ពីបទជួយ និងរួមគំនិតក្នុងអំពើឃាតកម្ម។ នេះបើយោងតាមប្រភពព័ត៌មានដែលកាសែត Star Tribune បានដកស្រង់សម្តីក្នុងសេចក្តីរាយការណ៍របស់ខ្លួន។
មកទល់ពេលនេះ មិនទាន់មានការផ្តល់ព័ត៌មានបន្ថែមពីការិយាល័យរបស់លោកអគ្គរដ្ឋអាជ្ញា Ellison នៅឡើយទេ។ មេធាវីការពារក្តីឲ្យមន្ត្រីប៉ូលិសពាក់ព័ន្ធបីនាក់ ដែលត្រូវបានចោទប្រកាន់ មិនអាចទាក់ទងបានទេនៅថ្ងៃនេះ។
ក្នុងរយៈពេលមួយសប្តាហ៍កន្លងទៅនេះ ក្រុមបាតុករនៅទូទាំងសហរដ្ឋអាមេរិកបានទាមទារឲ្យមានការចោទប្រកាន់លើមន្ត្រីប៉ូលិសទាំងបីនាក់នេះ ខណៈពួកគេបន្តការដើរក្បួនបង្ហាញក្តីខឹងសម្បាររបស់ពួកគេ ដែលក្នុងករណីខ្លះបានបណ្តាលឲ្យមានការបំផ្លិចបំផ្លាញ និងការគាស់លួចជាច្រើននៅតាមទីក្រុងធំៗនៅសហរដ្ឋអាមេរិក៕
