រដ្ឋាភិបាលប្រទេសម៉ាឡេស៊ីនៅល្ងាចថ្ងៃព្រហស្បតិ៍នេះ បានអនុញ្ញាតឲ្យអ្នកស្រី មូរ សុខហួរ អនុប្រធានគណបក្សសង្គ្រោះជាតិចូលក្នុងប្រទេសម៉ាឡេស៊ី បន្ទាប់ពីអ្នកស្រីត្រូវបានឃាត់ខ្លួននៅព្រលានយន្តហោះកូឡាឡាំពួរ អស់រយៈពេលជិត២០ម៉ោង។
អ្នកស្រី មូរ សុខហួរ អនុប្រធានគណបក្សសង្គ្រោះជាតិដែលត្រូវបានអាជ្ញាធរប្រទេសម៉ាឡេស៊ីឃាត់ខ្លួននៅព្រលានយន្តហោះកូឡាឡាំពួរ កាលពីយប់ថ្ងៃពុធ ប្រាប់ VOA នាល្ងាចថ្ងៃព្រហស្បតិ៍នេះថា អ្នកស្រីត្រូវបានប៉ូលីសអន្តោប្រវេសន៍ម៉ាឡេស៊ីឃាត់ខ្លួនតាំងពីយប់ថ្ងៃពុធរំលងអាធ្រាត្រ ដោយសារមានលិខិតហាមឃាត់ពីរដ្ឋាភិបាលខ្មែរ។
អ្នកស្រីបន្តថា ក្រោយការស៊ើបសួរអស់រយៈពេលជិត២០ម៉ោង អាជ្ញាធរក៏បានសម្រេចឲ្យអ្នកស្រី និងសកម្មជនគណបក្សសង្គ្រោះជាតិចំនួនពីរូបផ្សេងទៀត គឺកញ្ញា ងឹម គាថា និងលោក ស៊ាង លាងហេង ឲ្យចូលក្នុងប្រទេសម៉ាឡេស៊ី នៅម៉ោងប្រមាណជា៦ល្ងាចនេះ។
អ្នកស្រី មូរ សុខហួរ បន្តថា អ្នកស្រីនឹងចូលទៅជួបជាមួយរដ្ឋមន្រ្តីក្រសួងការបរទេសម៉ាឡេស៊ីនៅថ្ងៃសុក្រស្អែកព្រឹកនេះ ដើម្បីជជែកពាក់ព័ន្ធនឹងបញ្ហាលទ្ធិប្រជាធិបតេយ្យនៅកម្ពុជា។
«ពេលដែលខ្ញុំឆ្លងអន្តោប្រវេសន៍ គេប្រាប់ខ្ញុំថាខ្ញុំចូលអត់បានទេដោយសារខ្ញុំមានបញ្ជីខ្មៅ មានបញ្ជីខ្មៅនេះគឺបញ្ជីមកពីរដ្ឋាភិបាលលោក ហ៊ុន សែន។ ដល់ពេលដែលគេដឹងថាខ្ញុំមានកិច្ចជំនួបជាមួយក្រសួងការបរទេស គេឆែកអស់ហើយខ្ញុំនិយាយការពិត លោករដ្ឋមន្រ្តីក្រសួងការបរទេសក៏បានបញ្ជាក់ថា ខ្ញុំត្រូវជួបជាមួយគាត់ អញ្ចឹងឃើញថា ម៉ាឡេគេយកច្បាប់របស់គេជាច្បាប់ធំ»។
បន្ទាប់ពីប៉ូលីសអន្តោប្រវេសន៍ម៉ាឡេស៊ីបានឃាត់ខ្លួនអ្នកស្រី មូរ សុខហួរ ដើម្បីសួរនាំ នៅព្រឹកថ្ងៃព្រហស្បតិ៍នេះ ក្រុមសមាជិកសភាអាស៊ានដើម្បីសិទ្ធិមនុស្ស បានអំពាវនាវឲ្យប្រទេសសមាជិកអាស៊ានទាំងអស់ គោរពការប្តេជ្ញាចិត្តរបស់អាស៊ានចំពោះលទ្ធិប្រជាធិបតេយ្យ និងសិទ្ធិមនុស្ស និងអំពាវនាវឲ្យដោះលែងអ្នកស្រី មូរ សុខហួរ ភ្លាមៗដោយឥតលក្ខខណ្ឌ។
VOA បានព្យាយាមទាក់ទងសុំការអត្ថាធិប្បាយពី លោក Dato’ Saifuddin Abdullah រដ្ឋមន្រ្តីក្រសួងការបរទេសម៉ាឡេស៊ី ប៉ុន្តែលោកមិនព្រមឆ្លើយតប។
យ៉ាងណាក្តី លោក Dato’ Saifuddin Abdullah បានផ្តល់សម្ភាសន៍ដល់ក្រុមអ្នកយកព័ត៌មាននៅប្រទេសម៉ាឡេស៊ីនៅព្រឹកថ្ងៃព្រហស្បតិ៍នេះថា រដ្ឋាភិបាលម៉ាឡេស៊ីទទួលបានលិខិតស្នើឲ្យចាប់បញ្ជូនសកម្មជនគណបក្សប្រឆាំងរបស់កម្ពុជាទៅកាន់កម្ពុជាវិញ រួមទាំងអ្នកស្រី មូរ សុខហួរ ផង។
រដ្ឋមន្រ្តីក្រសួងការបរទេសម៉ាឡេស៊ី លោក Dato’ Saifuddin Abdullah បញ្ជាក់ថា ប៉ូលីសអន្តោប្រវេសន៍ម៉ាឡេស៊ីឃាត់ខ្លួនអ្នកស្រី មូរ សុខហួរ កាលពីពាក់ណ្តាលយប់ថ្ងៃពុធ ដើម្បីសួរនាំ។ ប៉ុន្តែលោកថា រដ្ឋាភិបាលម៉ាឡេស៊ីមិនធ្វើតាមការស្នើរបស់ភាគីបរទេសណាមួយនោះទេ។
លោកបញ្ជាក់ថា៖ «យើងមិនស្ថិតក្នុងតួនាទីចាប់បញ្ជូនខ្លួននរណាទេ ហើយយើងក៏មិនចូលចិត្តធ្វើដូច្នោះដែរ។ យើងធ្វើការសម្រេចចិត្តដោយខ្លួនឯង មិនមែនដោយសារការស្នើសុំ ឬការជ្រៀតជ្រែកណាមួយពីបរទេសទេ»។
ក្រោយរដ្ឋាភិបាលម៉ាឡេស៊ីអនុញ្ញាតឲ្យអ្នកស្រី មូរ សុខហួរ ចូលក្នុងប្រទេសម៉ាឡេស៊ី លោក Teddy Baguilat សមាជិកក្រុមប្រឹក្សាភិបាលសភាអាស៊ានដើម្បីសិទ្ធិមនុស្សបានស្វាគមន៍ចំពោះការសម្រេចចិត្តនេះ។ លោកថា ការណ៍នេះនឹងជំរុញប្រទេសថៃ និងបណ្តាប្រទេសអាស៊ានទាំងអស់ អនុញ្ញាតឱ្យលោក សម រង្ស៊ី ចូលទៅក្នុងប្រទេស ដើម្បីគោរពសិទ្ធិមនុស្សជាមូលដ្ឋាន។
លោកសរសេរតាមន័យដើមថា៖«លោក ហ៊ុន សែន គួរតែទទួលបានសារនេះយ៉ាងច្បាស់ ហើយការធ្វើទុក្ខបុកម្នេញរបស់គាត់ទៅលើក្រុមនយោបាយប្រឆាំង នឹងមិនអាចដូចអ្វីដែលគាត់ចង់បាននោះទេ។ ជំនួសមកវិញ លោក ហ៊ុន សែន គួរតែដោះលែងសកម្មជនអហិង្សាកម្ពុជាទាំងអស់ ដែលកំពុងត្រូវបានឃុំខ្លួនដោយចោទប្រកាន់ពាក់ព័ន្ធនឹងនយោបាយ និងអនុញ្ញាតឱ្យមានអ្នកនយោបាយប្រឆាំងដោយស្របច្បាប់»។
កាលពីសប្តាហ៍មុន អាជ្ញាធរថៃបានបញ្ជូនអ្នកស្រី មូរ សុខហួរ ចេញទៅវិញ នៅពេលដែលអ្នកស្រីទៅដល់ព្រលានយន្តហោះក្នុងទីក្រុងបាងកក ប្រទេសថៃ។
អ្នកស្រីបានធ្វើដំណើរបន្តទៅប្រទេសឥណ្ឌូនេស៊ី និងចាកចេញពីប្រទេសនេះ នៅយប់ថ្ងៃទី៦ ខែវិច្ឆិកា ទៅកាន់ម៉ាឡេស៊ី បន្ទាប់ពីស្ថានទូតកម្ពុជានៅប្រទេសឥណ្ឌូណេស៊ី ស្នើឲ្យអាជ្ញាធរប្រទេសនេះចាប់អ្នកស្រី ប៉ុន្តែសំណើនេះត្រូវបរាជ័យ។
នៅថ្ងៃទី៦ ខែវិច្ឆិកា នេះ ក្រសួងការបរទេសកម្ពុជាបានចេញលិខិតបន្ទាន់មួយទៅកាន់ស្ថានទូតកម្ពុជាប្រចាំប្រទេសផ្សេងៗ ដើម្បីឲ្យឯកអគ្គរាជទូតកម្ពុជាជូនដំណឹងទៅរដ្ឋាភិបាលប្រចាំប្រទេសទាំងនោះអំពីការដកហូតសិទ្ធិប្រើប្រាស់លិខិតឆ្លងដែនកម្ពុជារបស់មន្រ្តីគណបក្សប្រឆាំងចំនួន១២នាក់។ មន្ត្រីទាំងនោះរួមមាន អ្នកស្រី មូរ សុខហួរ លោក ហូរ វ៉ាន់ លោក អេង ឆៃអ៊ាង លោក ឡុង រី លោក ម៉ន ផល្លា លោក សោ ចាន់ដេត លោក គង់ សភា លោក ហេង ដាណារ៉ូ លោក វ៉ាន់ ណារិទ្ធ លោក ញឹម គឹមហ៊ុយ លោក អ៊ីសា ឧស្មាន និងលោក ដាង ចំរើន។
រដ្ឋាភិបាលកម្ពុជាក៏បានសរសេរលិខិតទៅបណ្តាប្រទេសជាសមាជិកអាស៊ាន ស្នើកុំអនុញ្ញាតឲ្យលោក សម រង្ស៊ី និងបក្ខពួកឆ្លងកាត់ប្រទេសទាំងនោះ ដើម្បីចូលមកកម្ពុជា។
នាយឧត្តមសេនីយ៍ ខៀវ សុភ័គ អ្នកនាំពាក្យក្រសួងមហាផ្ទៃប្រាប់ VOA ថា រដ្ឋាភិបាលសម្រេចដកហូតលិខិតឆ្លងដែនរបស់មន្រ្តីគណបក្សប្រឆាំងទាំង១២នាក់ ដោយសារពួកគេមានដីកាតាមចាប់ខ្លួនរបស់តុលាការកម្ពុជា។
រហូតមកដល់ពេលនេះ មានអ្នកគាំទ្រ និងសកម្មជនគណបក្សសង្រ្គោះជាតិប្រមាណជា៦០នាក់ត្រូវបានឃុំខ្លួន និងចោទប្រកាន់ពាក់ព័ន្ធនឹងបទរួមគំនិតក្បត់ជាតិ ក្រោយពួកគេប្រកាសគាំទ្រការវិលត្រឡប់មកវិញរបស់លោកសម រង្ស៊ី ដែលប្រកាសចូលមកកម្ពុជាវិញនៅថ្ងៃទី៩ ខែវិច្ឆិកានេះ បន្ទាប់ពីលោកបាននិរទេសខ្លួនទៅក្រៅប្រទេសអស់ជាង៥ឆ្នាំ។
រដ្ឋាភិបាលកម្ពុជានិយាយថា លោក សម រង្ស៊ី មានគម្រោងចូលមកផ្ដួលរំលំរដ្ឋាភិបាលបច្ចុប្បន្ន៕
