មេធាវីការពារក្តីរបស់កញ្ញា សេង ធារី បានស្នើឲ្យអង្គការសហប្រជាជាតិទទួលយកសំណុំរឿងឃុំឃាំងដោយខុសនីតិវិធីរបស់មេធាវីនិងសកម្មជនសិទ្ធិមនុស្សខ្មែរអាមេរិកាំងរូបនេះ ដែលកំពុងជាប់ឃុំនៅខេត្តព្រះវិហារ។ នេះបើតាមសេចក្តីប្រកាសមួយ ដែលវីអូអេទទួលបានកាលពីថ្ងៃព្រហស្បតិ៍។ សេចក្តីប្រកាសនេះធ្វើឡើង មុនលោក Joe Biden ប្រធានាធិបតីសហរដ្ឋអាមេរិក ធ្វើដំណើរមកដល់ប្រទេសកម្ពុជា នៅព្រឹកថ្ងៃសៅរ៍ស្អែកនេះ។ លោក Jared Genser បានអះអាងនៅក្នុងសេចក្តីប្រកាសនោះថា ការស្នើដាក់សំណុំរឿងនេះទៅកាន់ក្រុមការងាររបស់អង្គការសហប្រជាជាតិបានធ្វើឡើង បន្ទាប់ពីរដ្ឋាភិបាលសហព័ន្ធអាមេរិកមិនបានចាត់វិធានការច្បាស់លាស់អ្វីមួយ ដើម្បីជួយដល់ករណីកាត់ទោសនិងឃុំខ្លួនរបស់ កញ្ញា សេង ធារី ដែលក្រុមសកម្មជនសិទ្ធិមនុស្សបានចាត់ទុកថា ធ្វើឡើងដោយគ្មានភស្តុតាងនិងមិនត្រឹមត្រូវតាមនីតិវិធីនោះ៕
ថ្មី៖ លោក Joe Biden ប្រធានាធិបតីសហរដ្ឋអាមេរិក បានចាកចេញពីទីក្រុង Sharm el-Sheikh ប្រទេសអេហ្ស៊ីប ហើយកំពុងធ្វើដំណើរតាមយន្តហោះប្រធានាធិបតី Air Force One នាយប់ថ្ងៃសុក្រ ទី ១១ ខែវិច្ឆិកា ឆ្ពោះទៅកាន់រាជធានីភ្នំពេញ ប្រទេសកម្ពុជា ដើម្បីចូលរួមកិច្ចប្រជុំកំពូលអាស៊ាន។ លោកនឹងទៅដល់អាកាសយានដ្ឋានអន្តរជាតិភ្នំពេញ នៅព្រឹកថ្ងៃសៅរ៍ ប្រហែលម៉ោង ៨:៣០ នាទីព្រឹក ម៉ោងនៅក្នុងប្រទេសកម្ពុជា។
លោក Biden គឺជាប្រធានាធិបតីអាមេរិកកំពុងកាន់តំណែងទី ២ ដែលធ្វើដំណើរមកប្រទេសកម្ពុជាដើម្បីចូលរួមកិច្ចប្រជុំកំពូលអាស៊ាន និងកិច្ចប្រជុំកំពូលពាក់ព័ន្ធ ក្នុងពេលកម្ពុជាកាន់តួនាទីជាប្រធានអាស៊ានប្តូរវេន។ កាលពីឆ្នាំ ២០១២ លោក Barack Obama ដែលជាប្រធានាធិបតីកាន់តំណែងនាពេលនោះ បានធ្វើដំណើរទៅកម្ពុជាដើម្បីចូលរួមកិច្ចប្រជុំថ្នាក់តំបន់និងសកលលោកនេះ។
គួរបញ្ជាក់ថា នៅរាជធានីភ្នំពេញ លោកប្រធានាធិបតី Joe Biden នឹងជួបពិភាក្សាក្នុងជំនួបទ្វេភាគីជាមួយនាយករដ្ឋមន្ត្រីកម្ពុជា លោក ហ៊ុន សែន អំពីសារៈសំខាន់នៃអព្យាក្រឹតភាពរបស់អាស៊ាន និងសណ្តាប់ធ្នាប់ក្នុងតំបន់ ដែលផ្អែកតាមរដ្ឋធម្មនុញ្ញអាស៊ាន។ បន្ទាប់មក លោក Biden នឹងចូលរួមកិច្ចប្រជុំកំពូលអាមេរិក-អាស៊ាន ដោយលោកអាចនឹងត្រូវគេរំពឹងថា នឹងធ្វើសេចក្តីថ្លែងការណ៍មួយ។ ក្រៅពីនេះ លោកក៏នឹងជួបពិភាក្សាក្នុងជំនួបត្រីភាគីជាមួយលោក Fumio Kishida នាយករដ្ឋមន្ត្រីជប៉ុន និងលោក Yoon Suk-yeol ប្រធានាធិបតីកូរ៉េខាងត្បូងផងដែរ៕
ទស្សនាទិដ្ឋភាពនៃការធ្វើដំណើរមកដល់រាជធានីភ្នំពេញរបស់ប្រធានាធិបតីសហរដ្ឋអាមេរិកលោក Joe Biden និងគណៈប្រតិភូអាមេរិក ដើម្បីចូលរួមកិច្ចប្រជុំកំពូលអាស៊ាន អាមេរិក និងកិច្ចប្រជុំកំពូលពាក់ព័ន្ធនានា។
មេដឹកនាំអាស៊ានមកពី ៩ ប្រទេសលើកលែងមីយ៉ាន់ម៉ា បានជួបពិភាក្សាគ្នាជាមួយនាយករដ្ឋមន្ត្រីជប៉ុនលោក Fumio Kishida ប្រធានាធិបតីកូរ៉េខាងត្បូងលោក Yoon Suk-yeol និងលោក Li Keqiang នាយករដ្ឋមន្ត្រីចិន នៅក្នុងកិច្ចប្រជុំកំពូលអាស៊ានបូកបីលើកទី ២៥ នៅរាជធានីភ្នំពេញ ប្រទេសកម្ពុជា នាព្រឹកថ្ងៃសៅរ៍នេះ។ កិច្ចពិភាក្សារវាងមេដឹកនាំទាំងនេះ ផ្តោតសំខាន់លើសន្តិសុខ និងកិច្ចសហប្រតិបត្តិការក្នុងតំបន់ឥណ្ឌូប៉ាស៊ីហ្វិក និងតំបន់អាស៊ី ខណៈភាពតានតឹងនៅឧបទ្វីបកូរ៉េ កោះតៃវ៉ាន់ និងសមុទ្រចិនខាងត្បូងនៅតែជាបញ្ហាប្រឈម៕
