អ្នកនាំពាក្យក្រសួងយុត្តិធម៌បានលើកឡើងថា ក្រសួងកំពុងសិក្សាលម្អិតអំពីការបង្កើតច្បាប់មួយប្រឆាំងនឹងអំពើភេរវកម្ម។ ច្បាប់នេះមានគោលបំណងដាក់សម្ពាធទៅលើក្រុមមួយចំនួននៅក្រៅប្រទេសដែលរដ្ឋាភិបាលចាត់ទុកថាជា«ក្រុមជ្រុលនិយម» «ក្រុមជនអគតិ» និង«ក្រុមញុះញង់»។
លោក សេង ឌីណា អ្នកនាំពាក្យក្រសួងយុត្តិធម៌ ប្រាប់វីអូអេនៅថ្ងៃព្រហស្បតិ៍ថា ក្រសួងយុត្តិធម៌កំពុងសិក្សាលម្អិតលើទិដ្ឋភាពច្បាប់ជុំវិញការធ្វើច្បាប់នេះ ជាពិសេស ពិនិត្យលើជម្រើសរវាងការធ្វើវិសោធនកម្មច្បាប់ណាមួយដែលមានស្រាប់ និងការរៀបចំធ្វើច្បាប់ថ្មីតែម្តង។
មួយរយៈចុងក្រោយនេះ មន្រ្តីរដ្ឋាភិបាលជាន់ខ្ពស់មួយចំនួនបានលើកឡើងអំពីការជេរប្រមាថពីសំណាក់អ្នករិះគន់មួយចំនួនទៅលើថ្នាក់ដឹកនាំនៅកម្ពុជា។
កាលពីថ្ងៃទី៤ ខែកុម្ភៈ ឆ្នាំ២០២៥ លោក ហ៊ុន ម៉ានី រដ្ឋមន្រ្តីក្រសួងមុខងារសាធារណៈ និងជាកូនប្រុសរបស់លោក ហ៊ុន សែន ដែលបច្ចុប្បន្នជាប្រធានព្រឹទ្ធសភា បានបង្ហោះសារនៅលើហ្វេសប៊ុករបស់លោកថា លោកមិនអាចទទួលយកបាននូវទង្វើរបស់មនុស្សមួយក្រុមដែលលោកហៅថាជា«ជនអគតិមួយក្រុម» ចំពោះការប្រើប្រាស់ពាក្យពេចន៍អសុរស ប្រមាថសមាជិកក្រុមគ្រួសាររបស់លោក។
លោកលើកឡើងថា៖ «បើទោះពួកគេមិនទទួលស្គាល់នូវការលះបង់របស់ក្រុមគ្រួសារខ្ញុំ ក្នុងបុព្វហេតុជាតិ និងមាតុភូមិនាពេលកន្លងមក ក៏គួរពួកគេត្រូវទទួលស្គាល់នូវភាពចាស់ទុំរបស់ពួកគាត់ក្នុងសង្គមខ្មែរ ដែលមានអារ្យធម៌ថ្កុំថ្កើង និងថ្លៃថ្នូរដែរ»។
កាលពីខែវិច្ឆិកា ឆ្នាំមុន លោក ហ៊ុន សែន បានលើកឡើងអំពីលទ្ធភាពនៃការបង្កើតច្បាប់ដើម្បីដាក់អ្នកនយោបាយជំទាស់នៅក្រៅប្រទេស ដែលលោកចាត់ទុកថាជាក្រុមញុះញង់ឲ្យទៅជា«ក្រុមភេរវកម្ម»។
លោក អំ សំអាត នាយកទទួលបន្ទុកកិច្ចការទូទៅនៃអង្គការសិទ្ធិមនុស្សលីកាដូ ថ្លែងថា ការបង្កើតច្បាប់ណាមួយត្រូវមានការប្រមូលធាតុចូលពីគ្រប់ភាគីពាក់ព័ន្ធ និងពិគ្រោះយោបល់ឲ្យបានគ្រប់គ្រាន់ ដើម្បីធានាថា វាមានផលប្រយោជន៍ដល់សង្គមជាតិ និងប្រជាជន ហើយដើម្បីបញ្ចៀសការរិះគន់ថា ច្បាប់នេះបង្កើតឡើងដើម្បីគោលដៅនយោបាយណាមួយ៕
វេទិកាបញ្ចេញមតិ