នាយករដ្ឋមន្ត្រីអ៊ីស្រាអែលលោក Benjamin Netanyahu បានរិះគន់យ៉ាងខ្លាំងដល់កិច្ចព្រមព្រៀងក្របខណ្ឌបរមាណូរបស់ក្រុមប្រទេសមហាអំណាចពិភពលោកជាមួយប្រទេសអ៊ីរ៉ង់ ដោយបាននិយាយថាកិច្ចព្រមព្រៀងនេះបន្សល់ទុកឲ្យ «រដ្ឋភេរវជនមួយនោះនូវហេដ្ឋារចនាសម្ព័ន្ធបរមាណូដ៏ធំធេងមួយ» ដែលនេះនឹងធ្វើឲ្យប្រទេសនោះមានអាវុធបរមាណូនៅទីបញ្ចប់។
ថ្លែងក្នុងកម្មវីធី Meet the Press របស់បណ្តាញទូរទស្សន៍អាមេរិកាំង NBC នាយករដ្ឋមន្ត្រីអ៊ីស្រាអែលរូបនេះ ដែលទើបជាប់ឆ្នោតជាថ្មីបាននិយាយកាលពីថ្ងៃអាទិត្យថា ដោយគ្មានការដាក់ទណ្ឌកម្មបច្ចុប្បន្នប្រឆាំងនឹងរដ្ឋាភិបាលក្រុង Tehran ទេនោះ ប្រទេសអ៊ីរ៉ង់នឹងមានប្រាក់រាប់ពាន់លានដុល្លារដើម្បី «បូមបញ្ចូល» ក្នុងម៉ាស៊ីនភេរវកម្មរបស់ខ្លួននៅទូទាំងពិភពលោកនិង «ច្បាំងដណ្តើមយកភូមិភាគមជ្ឈិមបូព៌ា»។
ថ្លែងកាលពីថ្ងៃសៅរ៍តាមទូរទស្សន៍របស់រដ្ឋនៃប្រទេសអ៊ីរ៉ង់ រដ្ឋមន្ត្រីការបរទេសអ៊ីរ៉ង់ Mohammad Javad Zarif បានមានប្រសាសន៍ថា រដ្ឋាភិបាលក្រុង Tehran អាចវិលត្រទ្បប់ទៅកាន់កម្រិតបច្ចុប្បន្ននៃសកម្មភាពបរមាណូរបស់ខ្លួន ប្រសិនបើបស្ចឹមប្រទេសដកថយចេញពីកិច្ចព្រមព្រៀងបរមាណូដែលមានកំណត់ត្រូវធ្វើឲ្យសម្រេចក្នុងខែមិថុនាខាងមុខនេះ៕
