អ៊ីរ៉ង់បានធ្វើការវាយប្រហារដោយកាំជ្រួចមីស៊ីលទ្រង់ទ្រាយធំលើអ៊ីស្រាអែលនៅក្នុងការវាយប្រហារដ៏សំខាន់មួយនៃជម្លោះរយៈពេលមួយឆ្នាំរវាងអ៊ីស្រាអែលនិងក្រុមរណបក្នុងតំបន់របស់សាធារណរដ្ឋអ៊ីស្លាមអ៊ីរ៉ង់។
យោធាអ៊ីស្រាអែលបាននិយាយថាការវាយប្រហារដោយកាំជ្រួចមីស៊ីលរបស់អ៊ីរ៉ង់បានចាប់ផ្តើមនៅម៉ោងប្រហែល៧:៣០នាទីយប់ម៉ោងនៅក្នុងស្រុកកាលពីថ្ងៃអង្គារហើយបានបន្តប្រហែលកន្លះម៉ោង។ យោធាអ៊ីស្រាអែលបាននិយាយទៀតថាអ៊ីរ៉ង់បានបាញ់កាំជ្រួចមីស៊ីលប្រហែល១៨០គ្រាប់នៅក្នុងការវាយប្រហារនោះ។
បណ្តាញព័ត៌មានរដ្ឋអ៊ីរ៉ង់ IRNA បានចេញផ្សាយវីដេអូនៃការវាយប្រហារដោយកាំជ្រួចមីស៊ីលនេះនៅលើបណ្តាញតេឡេក្រាមរបស់ខ្លួន។ IRNA ក៏បានចេញផ្សាយសេចក្តីថ្លែងការណ៍ដោយនិយាយថាកងទ័ពកំពូលរបស់អ៊ីរ៉ង់គឺកងទ័ពឆ្មាំការពារបដិវត្តន៍អ៊ីស្លាមឬ IRGC បានវាយប្រហារទីដៅសន្តិសុខនិងស៊ើបការណ៍សម្ងាត់នៅក្នុងការសងសឹកចំពោះការធ្វើឃាតមេដឹកនាំហាម៉ាស់ប៉ាឡេស្ទីនលោក Ismail Haniyeh នៅក្នុងរដ្ឋធានីតេហេរ៉ង់កាលពីខែកក្កដាហើយនិងការសម្លាប់កាលពីពេលថ្មីៗនេះរបស់អ៊ីស្រាអែលដល់ពួកមេបញ្ជាការជាន់ខ្ពស់របស់ក្រុម Hezbollah លីបង់និងឆ្មាំការពារបដិវត្តិន៍អ៊ីស្លាមអ៊ីរ៉ង់ IRGC របស់ខ្លួន។
អ៊ីស្រាអែលបានធ្វើឃាតលោក Hassan Nasrallah ប្រធានក្រុម Hezbollah នៅក្នុងការវាយប្រហារមួយលើមជ្ឈមណ្ឌលទីបញ្ជាការក្រុងបេរុតភាគខាងត្បូងដែលសហរដ្ឋអាមេរិកចាត់ទុកជាក្រុមភេរវកម្មមួយកាលពីថ្ងៃសុក្រ។ ឧត្តមសេនីយ៍ត្រី Abbas Nilforoushanនៃឆ្មាំការពារបដិវត្តន៍អ៊ីស្លាមអ៊ីរ៉ង់ក៏ត្រូវបានសម្លាប់នៅក្នុងការវាយប្រហារនោះដែរ។ អ៊ីស្រាអែលមិនបានបញ្ជាក់ឬបដិសេធការសម្លាប់លោក Haniyeh នោះទេ។
ទីភ្នាក់ងារសារព័ត៌មាន IRNA បានបញ្ជាក់ថាការវាយប្រហារដោយកាំជ្រួចមីស៊ីលកាលពីថ្ងៃអង្គារលើអ៊ីស្រាអែលជាការវាយប្រហារបែបនេះលើកទី២ចេញពីទឹកដីអ៊ីរ៉ង់បន្ទាប់ពីការវាយប្រហារតាមអាកាសកាលពីខែមេសាដែលត្រូវយល់ព្រមដោយក្រុមប្រឹក្សាសន្តិសុខជាតិកំពូលរបស់អ៊ីរ៉ង់ដែលស្ថិតនៅក្រោមមេដឹកនាំកំពូលលោក Ayatollah Ali Khamenei។
យោធាអ៊ីស្រាអែលបាននិយាយថាជនស៊ីវិល១០លាននាក់បានស្ថិតនៅក្រោមការគំរាមកំហែងពីកាំជ្រួចមីស៊ីលអ៊ីរ៉ង់ដែលបានបន្លឺសារ៉ែននៅទូទាំងតំបន់ភាគខាងជើង កណ្តាលនិងខាងត្បូងអ៊ីស្រាអែល។
ប្រហែលកន្លះម៉ោងបន្ទាប់ពីការវាយប្រហារដោយកាំជ្រួចមីស៊ីលអ៊ីរ៉ង់បានចាប់ផ្តើម អ្នកនាំពាក្យយោធាអ៊ីស្រាអែលលោក Daniel Hagariបានប្រាប់ពួកអ្នកយកព័ត៌មានថាការវាយប្រហារបានបញ្ចប់ហើយជនស៊ីវិលអាចចាកចេញពីកន្លែងជ្រកពួនរបស់ខ្លួន។
លោកHagariបានពណ៌នាថាការវាយប្រហាររបស់អ៊ីរ៉ង់ជាការវាយប្រហារកាន់តែធំនិងខ្លាំងជាងការវាយប្រហារកាលពីខែមេសា។ ក៏ប៉ុន្តែ លោកបាននិយាយថាការខំប្រឹងប្រែងការពារដោយអ៊ីស្រាអែលនិងដៃគូរបស់ខ្លួនបាននាំឱ្យមានការបាញ់ស្ទាក់កាំជ្រួចមីស៊ីលអ៊ីរ៉ង់ជាច្រើន ដោយមានការប៉ះពាល់តិចតួចបានត្រូវរាយការណ៍នៅលើដី។ លោកបាននិយាយទៀតថាលោកមិនបានដឹងពីចំនួនមនុស្សស្លាប់ឬរងរបួសទេ ក៏ប៉ុន្តែ បានព្រមានដោយមិនបានបរិយាយលម្អិតថាអ៊ីរ៉ង់នឹងប្រឈមផលវិបាកទេ។
មន្ត្រីការពារជាតិសហរដ្ឋអាមេរិកម្នាក់បានប្រាប់វីអូអេថាកងទ័ពសហរដ្ឋអាមេរិកនៅក្នុងតំបន់បានការពារប្រឆាំងនឹងកាំជ្រួចមីស៊ីលដែលបាញ់ដោយអ៊ីរ៉ង់ដៅលើអ៊ីស្រាអែល៕
វេទិកាបញ្ចេញមតិ