ចិនកំពុងការពារខ្លួនទប់ទល់នឹងការចោទប្រកាន់ថាខ្លួនកំពុងបង្ហូរទំនិញដែលមានតម្លៃថោកៗរបស់ខ្លួននៅក្នុងទីផ្សារប្រទេសថៃនិងកំពុងប៉ះពាល់ដល់ពាណិជ្ជកម្មក្នុងស្រុក។
នៅក្នុងការចុះផ្សាយលើគណនី Facebook ផ្លូវការមួយកាលពីថ្ងៃទី៤ ខែកញ្ញា ស្ថាន ទូតចិននៅក្នុងប្រទេសថៃបានបញ្ជាក់ថាពាណិជ្ជកម្មរវាងប្រទេសទាំង២ ទទួលបាន «ផលប្រយោជន៍ទៅវិញទៅមកនិងឈ្នះ ឈ្នះ»។
សេចក្តីថ្លែងការណ៍របស់ស្ថានទូតចិនបានបញ្ជាក់ថា«ទំនិញជិត៨០ភាគរយដែលថៃនាំចូលមកពីចិនជាទ្រព្យសម្ភារៈបរិក្ខានិងទំនិញពាក់កណ្តាលសម្រេចដែលត្រូវប្រើប្រាស់សម្រាប់ផលិតកម្មនិងបន្ថែមតម្លៃមុនពេលត្រូវនាំចេញ»។
សេចក្តីថ្លែងការណ៍នោះបានបន្ថែមទៀតថាភាគច្រើនដែលហៅថាទំនិញថោកៗនោះ«ជាផលិតផលដែលត្រូវប្រើប្រាស់នៅក្នុងជីវភាពប្រចាំថ្ងៃ ម្ហូបអាហារ ផលិតផលសុខភាព សម្លៀកបំពាក់ជាដើមដែលមានតម្លៃមិនដល់១០ភាគរយផងនៃតម្លៃទំនិញសរុបដែលនាំចូលមកពីចិន»។
សេចក្តីថ្លែងការណ៍នោះបានកើតមានឡើងបន្ទាប់ពីថៃបានប្រកាសវិធានការថ្មីដើម្បីប្រយុទ្ធប្រឆាំងការហូរចូលដ៏ច្រើនសន្ធឹកសន្ធាប់នូវការនាំចូលទំនិញរបស់ចិនដែលគំរាមកំហែងផ្នែកការផលិតរបស់ខ្លួន។
កាសែត Bankok Post បានរាយការណ៍កាលពីថ្ងៃទី២៨ ខែសីហាថាឧបនាយករដ្ឋមន្ត្រីនិងជារដ្ឋមន្ត្រីពាណិជ្ជកម្មថៃលោក Phumtham Wechayachai បាននិយាយថារដ្ឋាភិបាល នឹងបង្កើតក្រុមការងារដែលរួមមានក្រសួងចំនួន២៨ ដែលនឹងជួបគ្នាជារៀង២សប្តាហ៍ម្តងដើម្បីពិនិត្យមើលឡើងវិញនូវបទបញ្ជានានាដើម្បីទប់ស្កាត់ការគំរាមកំហែងនូវការនាំចូលទំនិញថោកៗរបស់ចិនដល់សេដ្ឋកិច្ចទន់ខ្សាយរួចទៅហើយនេះ។
សហព័ន្ធឧស្សាហកម្មថៃកាលពីពេលមុនបានព្រមានថាទំនិញចិនថោកៗអាចបណ្តាលឱ្យ«ប៉ះពាល់យ៉ាងខ្លាំង»នៅក្នុងប្រទេសថៃនិងនៅក្នុងតំបន់ ហើយថាផលិត ផលនាំចូលតម្លៃថោកនៅឆ្នាំ២០២៣បានធ្វើឱ្យមានការបិទរោងចក្រជិត២ពាន់៕
