ទីភ្នាក់ងារអង្គការសហប្រជាជាតិបានឱ្យដឹងថា វិបត្តិមនុស្សធម៌នៅតំបន់ហ្កាហ្សាបានវិវត្តកាន់តែអាក្រក់ខ្លាំងឡើងៗ ខណៈពេលដែលចំនួនជនស៊ីវិលដែលបានស្លាប់បន្តកើនឡើង ការសម្លាប់បុគ្គលិកផ្ដល់ជំនួយរបស់អង្គការសហប្រជាជាតិក៏បានឡើងដល់កម្រិតខ្ពស់មួយមិនធ្លាប់មានពីមុនមកផងដែរ ហើយទីក្រុងទាំងមូលត្រូវបានកម្ទេចដោយសារការទម្លាក់គ្រាប់បែកឥតឈប់ឈរ។ មនុស្សរាប់លាននាក់មិនអាចទទួលបានអាហារ ទឹក និងថ្នាំសង្កូវដើម្បីរស់រានមានជីវិតបានទេ។
លោក Jens Laerke អ្នកនាំពាក្យការិយាល័យសម្របសម្រួលកិច្ចការផ្ដល់ជំនួយរបស់អង្គការសហប្រជាជាតិ បានថ្លែងកាលពីថ្ងៃសុក្រ ទី ១០ ខែវិច្ឆិកា ថា៖ «ថ្ងៃនេះ ប្រសិនបើមានឋាននរកនៅលើលោក នោះគេនឹងដាក់ឈ្មោះតំបន់ភាគខាងជើងហ្កាហ្សាថាជាឋាននរកលោកិយ។ មនុស្សដែលជាប់គាំងនៅទីនោះ និងហេដ្ឋារចនាសំខាន់ៗសម្រាប់រស់រានមានជីវិតបានស្លាប់បាត់បង់អស់ហើយ។ ការស្រេកឃ្លាន ការអស់សង្ឃឹម ការបាត់បង់ទីជម្រក បានធ្វើឱ្យតំបន់នេះស្ថិតក្នុងភាពងងឹតសូន្យឈឹង»។
លោក Laerke បានថ្លែងបន្តទៀតថា៖ «តំបន់ហ្កាហ្សាទាំងមូលបានធ្លាក់ចូលទៅក្នុងភាពខ្មៅងងឹត ចាប់តាំងពីថ្ងៃទី១១ ខែតុលា មក នៅពេលដែលបណ្ដាញអគ្គិសនី ត្រូវបានកាត់ផ្ដាច់ ហើយប្រេងឥន្ធនៈមិនត្រូវបានអនុញ្ញាតឱ្យនាំចូលទៅទីនោះ»។
កងកម្លាំងអ៊ីស្រាអែលបានបិទខ្ទប់ទាំងស្រុងទៅលើតំបន់ហ្កាហ្សា ចាប់តាំងពីក្រុមហាម៉ាស់ដែលមានមូលដ្ឋាននៅតំបន់នេះ បានបើកការវាយប្រហារក្នុងទ្រង់ទ្រាយធំទៅលើភាគខាងត្បូងនៃប្រទេសអ៊ីស្រាអែល កាលពីថ្ងៃទី៧ ខែតុលា ដោយបានសម្លាប់មនុស្សអស់យ៉ាងហោចណាស់ចំនួន ១.៤០០នាក់។
ក្រុមហាម៉ាស់ក៏បានចាប់មនុស្សប្រមាណ ២៤០នាក់ជាចំណាប់ខ្មាំងក្នុងពេលដែលពួកគេវាយប្រហារផងដែរ ហើយកំពុងបន្តបាញ់គ្រាប់រ៉ុក្កែតចូលទឹកដីអ៊ីស្រាអែល។
ទោះបីជាអ៊ីស្រាអែលបានដកការហ៊ុំព័ទ្ធរបស់ខ្លួនទៅលើតំបន់ហ្កាហ្សាដោយអន្លើក៏ដោយ ក៏អ៊ីស្រាអែលនៅតែបដិសេធមិនឱ្យនាំប្រេងឥន្ធនៈចូលទៅដែនដីនេះដដែល ដោយអះអាងថា ក្រុមហាម៉ាស់នឹងប្រើប្រេងឥន្ធនៈទាំងនោះដើម្បីបម្រើឱ្យសកម្មភាពយោធា៕
ប្រែសម្រួលដោយលោក នៀម ឆេង
