ក្រុមមន្ត្រីនិយាយថាខ្មាន់កាំភ្លើង ដែលលាក់ខ្លួននៅក្នុងអគារមួយក្បែរស្ថានកុងស៊ុលឥណ្ឌាក្នុងទីក្រុង Mazar-i-Sharif ភាគខាងជើងប្រទេសអាហ្វហ្គានីស្ថាននៅថ្ងៃច័ន្ទនេះ នៅតែបន្តបាញ់តដៃ ជាមួយកងកម្លាំងសន្តិសុខអាហ្វហ្គានីស្ថាន។
ក្រុមប្រដាប់អាវុធ ដែលគេមិនទាន់ស្គាល់អត្តសញ្ញាណនៅឡើយនោះ បានប៉ុនប៉ងវាយប្រហារទៅលើស្ថានកុងស៊ុលឥណ្ឌានោះកាលពីថ្ងៃអាទិត្យ នៅពេលដែលពួកគេ បានបាញ់កាំភ្លើងនិងផ្លោងគ្រាប់បែក ចូលក្នុងតំបន់ជុំវិញស្ថានកុងស៊ុលនោះ។
អ្នកនាំពាក្យម្នាក់របស់អភិបាលក្រុងនៅទីនោះថ្លែងថា ខ្មាន់កាំភ្លើងបានបាញ់ផ្លោងគ្រាប់រ៉ុក្កែតចេញពីអគារមួយទល់មុខស្ថានកុងស៊ុលនោះ ដោយបង្កឲ្យមានការបាញ់គ្នារវាងកងកម្លាំងសន្តិសុខនិងក្រុមប្រដាប់អាវុធទាំងនោះ។
យ៉ាងហោចណាស់ មានជនស៊ីវិលម្នាក់ បានរងរបួសនៅក្នុងការប៉ះទង្គិចគ្នាដោយអាវុធនោះ។ ប៉ុន្តែមិនទាន់មានការអះអាងទទួលខុសត្រូវពីភាគីណាមួយ ចំពោះការវាយប្រហារនេះនៅឡើយទេ៕
