ព្រះសង្ឃ Thich Nhat Hanh គឺជាអ្នកផ្ដល់ឱវាទទូន្មានអំពីទស្សនៈវិជ្ជាព្រះពុទ្ធសាសនាដែលបានបង្រៀនពិភពលោកអំពីសារៈសំខាន់នៃភាពស្ងប់ក្នុងចិត្ត។ ព្រះអង្គជនជាតិរៀតណាមរូបនេះបានសុគតកាលពីថ្ងៃទី ២២ ខែមករាកន្លងទៅនៅប្រទេសវៀតណាម។ ពិធីបុណ្យព្រះសពរបស់ព្រះអង្គត្រូវបានធ្វើឡើងរយៈពេល ៧ ថ្ងៃ នៅវត្ត Tu Hieu ក្នុងក្រុង Hue នៃខេត្ត Thua Thien Hue ប្រទេសវៀតណាម៕
កម្រងរូបភាព៖ អ្នកប្រតិបត្តិតាមឱវាទរបស់ព្រះសង្ឃ Thich Nhat Hanh ចូលរួមពិធីបុណ្យព្រះសពរបស់ព្រះអង្គ
១
ព្រះសពរបស់ព្រះសង្ឃ Thich Nhat Hanh ត្រូវបានសែងដាក់មឈូសនាថ្ងៃទី ១ នៃពិធីបុណ្យព្រះសពរបស់ព្រះអង្គ ដែលមានរយៈពេល ៧ ថ្ងៃ នៅវត្ត Tu Hieu ក្នុងក្រុង Hue នៃខេត្ត Thua Thien Hue ប្រទេសវៀតណាម។ ព្រះអង្គគឺជាអ្នកផ្ដល់ឱវាទទូន្មានអំពីទស្សនៈវិជ្ជាព្រះពុទ្ធសាសនាដែលបានបង្រៀនពិភពលោកអំពីសារៈសំខាន់នៃភាពស្ងប់ក្នុងចិត្ត។ ព្រះអង្គបានសុគតកាលពីថ្ងៃទី ២២ ខែមករាកន្លងទៅក្នុងព្រះជន្មាយុ ៩៥ ព្រះវស្សា។ ព្រះអង្គមានកំណើតនៅក្រុង Hue ប្រទេសវៀតណាម និងបានបួសជាព្រះសង្ឃកាលពីព្រះអង្គមានព្រះជន្មាយុ ១៦ ព្រះវស្សា។ ក្រោយពិធីបុណ្យព្រះសពបានបញ្ចប់ទៅ ព្រះសពរបស់ព្រះអង្គត្រូវបានបូជា ហើយធាតុរបស់ព្រះអង្គនឹងត្រូវយកទៅតម្កល់នៅតាមទីវត្តអារាមនានានៅលើពិភពលោក ដែលមានទំនាក់ទំនងផ្លូវការជាមួយវត្ត Plum Village ដែលព្រះអង្គបានបង្កើតនៅប្រទេសបារាំង។
២
ពិធីបុណ្យព្រះសពរបស់ព្រះអង្គ Thich Nhat Hanh មានការចូលរួមពីអ្នកប្រតិបត្តិតាមឱវាទរបស់ព្រះអង្គរាប់ពាន់នាក់មកពីប្រទេសវៀតណាមនិងជុំវិញពិភពលោក។ ពិធីនេះមានរយៈពេល ៧ ថ្ងៃ ដែលអ្នកចូលរួមត្រូវធ្វើសមាធិ និងដើរសមាធិ តាមកាលវិភាគដ៏ច្បាស់លាស់មួយ។ អ្នកប្រតិបត្តតាមឱវាទរបស់ព្រះអង្គ Thich Nhat Hanh ដែលមកពីវត្ត Plum Village ដែលមានទីតាំងនៅជុំវិញពិភពលោក ត្រូវបានអញ្ជើញឲ្យចូលរួមក្នុងពិធីរំឭកវិញ្ញាណក្ខន្ធបែបសមាធិនេះ ដែលហៅថា «ការគោរពវិញ្ញាណក្ខន្ធក្នុងចិត្តដោយស្ងប់ស្ងាត់» ដើម្បីថែរក្សាកេរតំណែលនៃការប្រៀនប្រដៅរបស់ព្រះអង្គឲ្យនៅគង់វង្ស ក្រោយពេលដែលព្រះអង្គបានធ្វើអនិច្ចធម្មទៅ។
៣
នៅក្នុងសន្និសីទសារព័ត៌មានមួយនៅទីក្រុង New York សហរដ្ឋអាមេរិក កាលពីថ្ងៃទី ១៦ ខែឧសភា ឆ្នាំ ១៩៦៦ ព្រះសង្ឃ Thich Nhat Hanh មានសង្ឃដីកាថា កសិករវៀតណាមមិនជឿថា ប្រធានាធិបតីអាមេរិកលោក Lyndon Johnson ពិតជាចង់បង្កើតសន្តិភាពជាមួយវៀតណាមឡើយ។ នៅពេលនោះ ព្រះអង្គ Thich Nhat Hanh គឺជាអ្នកគ្រប់គ្រងអត្ថបទផ្សាយនៃទស្សនាវដ្ដី Buddhist Weekly និងជាព្រឹទ្ធបុរសនៃមហាវិទ្យាល័យសិក្សាសង្គមនៃពុទ្ធិកសាកលវិទ្យាល័យ Van Hanh ក្នុងទីក្រុងសៃហ្គន (ទីក្រុងហូជីមិញបច្ចុប្បន្ន)។ ក្នុងអំឡុងពេលសន្និសីទសារព័ត៌មាននៅពេលនោះ ព្រះអង្គបានមានសង្ឃដីកាបន្ថែមថា ការបញ្ចប់សង្គ្រាមបានក្លាយជា «សេចក្ដីប្រាថ្នាដ៏សំខាន់បំផុតរបស់ប្រជាពលរដ្ឋវៀតណាម»។ ព្រះអង្គបានមានសង្ឃដីកាថា ព្រះអង្គជឿថា កសិករវៀតណាមស្លូតត្រង់ដែលត្រូវបានសម្លាប់ដោយទាហានអាមេរិក «មានចំនួនច្រើនជាងទាហានវៀតកុងទៅទៀត»។
៤
កាលពីថ្ងៃទី ៣១ ខែឧសភា ឆ្នាំ ១៩៦៦ ក្នុងអំឡុងសន្និសីទសារព័ត៌មានមួយនៅទីក្រុង Chicago ដែលធ្វើឡើងជាមួយព្រះសង្ឃ Thich Nhat Hanh លោក Marthin Luther King Jr. (ឆ្វេង) បានស្នើឲ្យមានការបញ្ឈប់ការទម្លាក់គ្រាប់បែកនៅប្រទេសវៀតណាម។ នាពេលនោះ ព្រះអង្គ Thich Nhat Hanh បានធ្វើដំណើរជុំវិញសហរដ្ឋអាមេរិកក្នុងយុទ្ធនាការជំរុញឲ្យសហរដ្ឋអាមេរិកបញ្ចប់សង្គ្រាមនៅវៀតណាម។ នៅឆ្នាំដដែលនោះ លោក Marthin Luther King Jr. បានស្នើឲ្យមានការផ្ដល់ពានរង្វាន់ណូបែលសន្តិភាពដល់ព្រះអង្គ Thich Nhat Hanh។ ពានរង្វាន់កិត្តិយសនេះបានធ្វើឲ្យព្រះអង្គនិរទេសព្រះកាយពីប្រទេសវៀតណាមទៅរស់នៅក្នុងប្រទេសបារាំងអស់រយៈពេល ៣៩ ឆ្នាំ។
៥
ព្រះសង្ឃ Thich Nhat Hanh កំពុងដឹកនាំការដើរសមាធិមួយនៅវត្ត Plum Village កាលពីឆ្នាំ ២០០២ ក្នុងខួប ២០ ឆ្នាំនៃការបង្កើតវត្តនេះឡើង។ ក្រោយពីនិរទេសខ្លួនចេញពីប្រទេសវៀតណាម ព្រះអង្គបានបង្កើតវត្ត Plum Village នេះ នៅឆ្នាំ ១៩៨២ នៅលើដីមួយកន្លែងក្បែរទីក្រុង Bordeaux ភាគនិរតីប្រទេសបារាំង។ វត្តនេះជាទីកន្លែងដែលព្រះអង្គបានចាប់ផ្តើមទេសនាទូន្មានអំពីទស្សនៈនៃភាពស្ងប់ក្នុងចិត្ត ដែលជាទស្សនៈមានការយល់ដឹងនៅជុំវិញពិភពលោកនៅពេលបច្ចុប្បន្ននេះ។ វត្ត Plum Village បានក្លាយជា «វត្តព្រះពុទ្ធសាសនាដ៏ធំនិងសកម្មបំផុតមួយនៅបស្ចិមលោក» ដោយបានទាក់ទាញអ្នកប្រតិបត្តិតាមរាប់ពាន់នាក់នៅជុំវិញពិភពលោកជារៀងរាល់ឆ្នាំឲ្យមកប្រតិបត្តិភាពស្ងប់ក្នុងចិត្ត។
៦
ព្រះសង្ឃ Thich Nhat Hanh អង្គុយជាមួយក្មេងៗមកពីប្រទេសហ៊្សកដានីកាលពីខែសីហា ឆ្នាំ ២០០៤ នៅវត្ត Plum Village ដែលព្រះអង្គបានបង្កើតឡើង។ វត្តនេះត្រូវបានគេទទួលស្គាល់ដោយសារវត្តនេះបានប្រឹងប្រែងសម្រួលឲ្យមានការពិភាក្សាគ្នារវាងជាតិសាសន៍ជ្វីហ្វនិងជាតិសាសន៍អារ៉ាប់នៅក្នុងប្រទេសអ៊ីស្រាអែល។ តាមរយៈកិច្ចប្រឹងប្រែងនេះ ព្រះអង្គ Thich Nhat Hanh បានបន្តយកចិត្តទុកដាក់លើការប្រឆាំងសង្គ្រាម ទោះក្រោយវៀតណាមបានបញ្ចប់សង្គ្រាមនៅឆ្នាំ ១៩៧៥ ក្តី។ ជាងនេះទៀត នៅក្រោយហេតុការណ៍ភេរវកម្មថ្ងៃទី ១១ ខែកញ្ញា លើសហរដ្ឋអាមេរិក ព្រះអង្គបានក្លាយជាអ្នកប្រឆាំងដ៏សកម្មនឹងការលុកលុយដែលដឹកនាំដោយសហរដ្ឋអាមេរិកនៅក្នុងប្រទេសអាហ្វហ្គានីស្ថាន និងអ៊ីរ៉ាក់។
៧
ព្រះសង្ឃ Thich Nhat Hanh ឆ្លើយសំណួររបស់អ្នកសារព័ត៌មាននៅវត្ត Bo De ក្នុងទីក្រុងហាណូយ ប្រទេសវៀតណាម កាលពីខែមករា ឆ្នាំ ២០០៥ ដែលជាពេលដែលព្រះអង្គបានធ្វើដំណើរត្រឡប់ទៅកាន់ប្រទេសវៀតណាមជាលើកដំបូង បន្ទាប់ពីបាននិរទេសខ្លួននៅប្រទេសបារាំង។ ព្រះអង្គបានដឹកនាំគណៈប្រតិភូដែលជាអ្នកប្រតិបត្តិតាមព្រះអង្គប្រហែល ២០០ នាក់ មកពីប្រទេសបារាំងនិងសហរដ្ឋអាមេរិក នៅក្នុងប្រទេសវៀតណាមរយៈពេល ៣ ខែ។ ក្រោយមក ព្រះអង្គបានធ្វើដំណើរទៅកាន់ប្រទេសវៀតណាមចំនួន ៤ លើកទៀត។
៨
នៅឆ្នាំ ២០០៧ ព្រះសង្ឃ Thich Nhat Hanh ដឹកនាំពិធីទេសនារំឭកវិញ្ញាណក្ខន្ធរយៈពេល ៣ ថ្ងៃ សម្រាប់អ្នកដែលត្រូវបានសម្លាប់ក្នុងសង្គ្រាមវៀតណាម នៅវត្តមួយកន្លែងក្នុងទីក្រុងហូជីមិញ។ ក្នុងអំឡុងពេលនោះ ថ្នាក់ដឹកនាំរដ្ឋាភិបាលកុម្មុយនីស្តវៀតណាមបានស្វាគមន៍សកម្មភាពរបស់ព្រះអង្គ។ ក៏ប៉ុន្តែ នៅឆ្នាំ ២០០៨ រដ្ឋាភិបាលវៀតណាមមិនពេញចិត្តនឹងសកម្មភាពរបស់ព្រះអង្គ ហើយរដ្ឋបាលមូលដ្ឋាននៃខេត្ត Lam Dong បានបង្ក្រាបសកម្មភាពជួបជុំគ្នារបស់អ្នកប្រតិបត្តិតាមព្រះអង្គនៅវត្ត Bat Nha ហើយពួកគេជាច្រើនបានភៀសខ្លួនទៅប្រទេសថៃ។
៩
ព្រះសង្ឃ Thich Nhat Hanh មានសង្ឃដីកាក្នុងអំឡុងពេលសន្និសីទអន្តរជាតិលើកទី ៤ ស្តីពីព្រះពុទ្ធសាសនា ក្នុងពិធីវិសាខបូជា នៅក្នុងទីក្រុងបាងកក ប្រទេសថៃ កាលពីខែឧសភា ឆ្នាំ ២០០៧។ ពិធីវិសាខបូជាប្រារព្ធធ្វើឡើងដើម្បីរំឭកដល់កំណើត ដំណើរត្រាស់ដឹង និងបរិនិព្វានរបស់ព្រះពុទ្ធ។ ក្នុងអំឡុងពេលព្រះអង្គមានព្រះជន្មាយុ ព្រះអង្គ Thich Nhat Hanh បានបង្រៀននៅសាកលវិទ្យាល័យ Columbia និងសាកលវិទ្យាល័យ Princeton នៅក្នុងសហរដ្ឋអាមេរិក។ កាលពីខែតុលា ឆ្នាំ ២០០៦ ព្រះអង្គត្រូវបានអញ្ជើញឲ្យមានសង្ឃដីកានៅទីស្នាក់ការកណ្តាលរបស់អង្គការយូណេស្កូ (UNESCO) ដែលនៅពេលនោះ ព្រះអង្គបានស្នើឲ្យមានវិធានការច្បាស់លាស់ដើម្បីបញ្ឈប់អំពើហិង្សា សង្គ្រាម និងការប្រែប្រួលអាកាសធាតុ។ កាលពីឆ្នាំ ២០១៣ ព្រះអង្គបានដឹកនាំព្រឹត្តិការណ៍ស្តីពីភាពស្ងប់ក្នុងចិត្តនៅក្រុមហ៊ុន Google នៅធនាគារពិភពលោក និងនៅមហាវិទ្យាល័យសុខាភិបាលនៃសាកលវិទ្យាល័យ Harvard នៅសហរដ្ឋអាមេរិក។
១០
អគ្គលេខាធិការគណបក្សសមាជឥណ្ឌា (Indian National Congress Party) លោក Rahul Gandhi ស្តាប់ព្រះអង្គ Thich Nhat Hanh មានសង្ឃដីកាក្នុងអំឡុងពេលកម្មវិធីសិក្សាមួយស្តីអំពីការដឹកនាំដោយភាពក្លាហាននិងសេចក្តីមេត្តា នៅក្នុងទីក្រុងញូវដែលី ប្រទេសឥណ្ឌា កាលពីខែតុលា ឆ្នាំ ២០១៨ ។ គិតត្រឹមពេលនោះ ព្រះអង្គ Thich Nhat Hanh បានបោះពុម្ពសៀវភៅជាង ១២០ ក្បាល ដែលភាគច្រើនត្រូវបានបកប្រែទៅភាសាជាច្រើន។ នៅសហរដ្ឋអាមេរិក សៀវភៅនានារបស់ព្រះអង្គត្រូវបានលក់អស់ជាង ៣ លានក្បាល។
១១
កាលពីឆ្នាំ ២០១៨ ព្រះសង្ឃ Thich Nhat Hanh បានវិលត្រឡប់ទៅប្រទេសវៀតណាមវិញ ដើម្បីសម្រេចតាមក្តីប្រាថ្នារបស់ព្រះអង្គនៅក្នុង «ការចំណាយពេលរស់នៅក្នុងប្រទេសកំណើតរបស់ព្រះអង្គរហូតដល់ថ្ងៃចុងក្រោយនៃជីវិតរបស់ព្រះអង្គ»។ ព្រះអង្គបានចំណាយពេល ៣ ឆ្នាំ ៣ ខែចុងក្រោយនៃជីវិតរបស់ព្រះអង្គរស់នៅក្នុងវត្ត Tu Hieu ដែលជាទីកន្លែងដំបូងដែលព្រះអង្គបានបួសជាព្រះសង្ឃ និងបានចាប់ផ្តើមដំណើរផ្ដល់ឱវាទទូន្មានអំពីភាពស្ងប់ក្នុងចិត្តដល់មនុស្សនៅជុំវិញពិភពលោក និងការតស៊ូមតិឲ្យមានសន្តិភាព។ បន្ទាប់ពីឆ្លងផុតពីជំងឺដាច់សរសៃឈាមក្នុងខួរក្បាលកាលពីឆ្នាំ ២០១៤ មក ព្រះអង្គ Thich Nhat Hanh បានទទួលការព្យាបាលពីមន្ទីរពេទ្យនៅក្នុងរដ្ឋ California សហរដ្ឋអាមេរិក និងសម្រាកព្យាបាលជំងឺនៅប្រទេសថៃ មុននឹងសម្រេចក្តីប្រាថ្នារបស់ព្រះអង្គដោយវិលត្រឡប់ទៅប្រទេសវៀតណាមដែលជាប្រទេសកំណើតរបស់ព្រះអង្គវិញ។