ការស្ទង់មតិក្រោយការបោះឆ្នោតរបស់បណ្តាញផ្សាយព័ត៌មានជប៉ុន បាន ព្យាករណ៍ថា គណបក្សចម្រុះដែលកំពុងដឹកនាំប្រទេសរបស់នាយករដ្ឋមន្រ្តី Shinzo Abe បានទទួលជ័យជំនះយ៉ាងលើសលប់នៅក្នុងការបោះឆ្នោតសភាជាន់ទាបមុនពេលកំណត់របស់ជប៉ុន។
បណ្តាញផ្សាយព័ត៌មានជប៉ុន បានចេញផ្សាយការព្យាករណ៍នេះដោយផ្អែកលើការស្ទង់មតិភ្លាមៗក្រោយពីការបោះឆ្នោតបានបិទនៅរសៀលថ្ងៃអាទិត្យនេះ។ការព្យាករណ៍ បង្ហាញថា គណបក្សប្រជាធិបតេយ្យសេរីដែលកំពុងកាន់អំណាច និងគណបក្សដៃគូ Komeito នឹងឈ្នះបានទទួលសំឡេងភាគច្រើន២ភាគ៣ នៅក្នុងសភាជាន់ទាបដែលមានអំណាចនោះដែរ។
លោកនាយករដ្ឋមន្រ្តី Abe បានអំពាវនាវឲ្យមានការបោះឆ្នោតមុនពេលកំណត់រយៈពេល២ឆ្នាំដើម្បីទទួលបានអាណត្តិថ្មីសម្រាប់យុទ្ធសាស្រ្ត Abenomics របស់លោកនៃការធ្វើកំណែទម្រង់សេដ្ឋកិច្ចនិងរចនាសម្ព័ន្ធ។
ក្រុមអ្នកបោះឆ្នោតថ្មី ផ្តល់អំណាចដល់នាយករដ្ឋមន្រ្តី Abeរយៈពេល៤ឆ្នាំទៀតដើម្បីអនុវត្តការធ្វើកំណែទម្រង់ដ៏លំបាក រួមមានការកាត់បន្ថយបំណុលដ៏សន្ធឹកសន្ធាប់និងការរៀបចំឡើងវិញផ្នែកកសិកម្មរបស់ជប៉ុន៕
