ពិធីបុណ្យចូលឆ្នាំចិន ដែលត្រូវគេហៅថាជាបុណ្យនិទាឃរដូវនៅក្នុងប្រទេសចិន ជាប្រពៃណីតែងត្រូវគេប្រារព្ធយ៉ាងអធិកអធម ដោយមានការរៀបតុដាក់ម្ហូបអាហារនិងអាំងប៉ាវដែលមានដាក់លុយសម្រាប់ក្មេងៗ។ ហើយក៏មានការដុតលុយក្រដាសដើម្បីធានាថា សូម្បីតែដូនតាក៏អាចដឹងពីវិបុលភាពរបស់កូនចៅក្នុងឆ្នាំកន្លងទៅ។
ប៉ុន្តែនៅប៉ុន្មានឆ្នាំថ្មីៗនេះ ការថយចុះកំណើនសេដ្ឋកិច្ចរបស់ចិន បានផ្លាស់ប្តូរបរិយាកាសក្នុងអំឡុងពេលបុណ្យចូលឆ្នាំចិន។ ពលរដ្ឋវ័យក្មេងកំពុងពិនិត្យឡើងវិញនូវប្រពៃណីពីបរមបុរាណ ខណៈពួកគេស្វាគមន៍ឆ្នាំថ្មីឆ្នាំម្សាញ់ ដោយពិចារណាពីកម្មវីធីដែលចំណាយតិចជាងមុន សម្រាប់ពិធីបុណ្យជាតិរបស់ចិនដែលមានរយៈពេល៨ថ្ងៃនេះ។
អ្នកធ្វើការផ្នែកច្បាប់ម្នាក់អាយុ៣០ឆ្នាំដែលរស់នៅទីក្រុងសៀងហៃ ដោយសុំមិនបញ្ចេញឈ្មោះ ព្រោះខ្លាចមានការសងសឹងពីអាជ្ញាធរ បានប្រាប់វីអូអេថា ហាងដែលលក់គ្រឿងតែងលម្អសម្រាប់ពិធីបុណ្យ ហាក់មានភាពស្ងាត់ជ្រងំដ៏ចម្លែកនៅក្នុងឆ្នាំនេះ។
លោកថា មនុស្សម្នាហាក់ដូចជា មិនទិញរបស់ថ្លៃៗ ហើយមិនសូវឱ្យអាំងប៉ាវ ទោះឱ្យអាំងប៉ាវក៏មិនច្រើនដូចឆ្នាំមុនៗដែរ។
លោកប្រាប់វីអូអេថា ជាទូទៅលោកតែងឱ្យអាំងប៉ាវដែលមានប្រាក់១៤០ដុល្លារទៅក្មួយស្រី ប៉ុន្តែនៅឆ្នាំនេះ លោកឱ្យអាំងប៉ាវត្រឹម៩០ដុល្លារដល់នាង។
ការធុញថប់នឹងស្ថានភាពសេដ្ឋកិច្ចនេះក៏ត្រូវបានគេបង្ហាញនៅលើបណ្តាញសង្គមចិនដែរ ដោយមានប្រជាជនវ័យក្មេងបង្ហោះរូបភាពនិងមតិពណ៌នាអំពីសម្ពាធនិងការរិះគន់ដែលពួកគេជួបប្រទះក្នុងអំឡុងពិធីបុណ្យចូលឆ្នាំចិននេះ។
សូម្បីអាជ្ញាធរក្នុងមូលដ្ឋានខ្លះក៏បានជំរុញឱ្យមានការសន្សំសំចៃ។ អាជ្ញាធរក្រុង Baise (ប៉ៃស៊) ខេត្ត Guangxi បានស្នើថាអាំងប៉ាវមិនគួរលើសពី៣ដុល្លារទេ។
លោក Sun Guoxiang សាស្ត្រាចារ្យនៅសាកលវិទ្យាល័យ Nanhua នៅកោះតៃវ៉ាន់ ថាប្រពៃណីនៅក្នុងពិធីបុណ្យចូលឆ្នាំចិនរងផលប៉ះពាល់ដោយកត្តាជាច្រើន ប៉ុន្តែបញ្ហាសេដ្ឋកិច្ចជាកត្តាធំជាងគេ។ លោកថាអនាគតនៃប្រពៃណីនានាក្នុងពិធីបុណ្យចូលឆ្នាំចិននឹងអាស្រ័យលើថាតើប្រទេសចិនអាចជម្នះលើបញ្ហាឱនភាពសេដ្ឋកិច្ចនេះបានឬទេ៕
ការលំបាកខាងសេដ្ឋកិច្ចប៉ះពាល់ដល់ការប្រារព្ធពិធីបុណ្យចូលឆ្នាំថ្មីនៅក្នុងប្រទេសចិន
វេទិកាបញ្ចេញមតិ