ដោយ Caroline Arbour
នៅក្នុងប្រទេស អេស្ប៉ាញ (Spain) ព័ត៌មានលម្អិតថ្មីៗចេះតែបន្តលេចឡើងនៅក្នុងរឿងអាស្រូវពុករលួយ ដែលសាយភាពទៅដល់ជួរថ្នាក់ដឹកនាំកំពូលរបស់គណបក្សកាន់អំណាច។ ក្រុមអ្នកវិភាគមួយចំនួនជឿថា រឿងរ៉ាវរបស់ លោក បាសេណាស (Bárcenas) និងករណីជាច្រើនផ្សេងទៀតនៃភាពមិនស្មោះត្រង់ខាងនយោបាយដែលបានលេចឡើង អាចបង្កបញ្ហាដល់ការរើបឡើងវិញផ្នែកសេដ្ឋកិច្ចរបស់ប្រទេសនេះ។ មានភស្តុតាងមួយចំនួនកាលពីសប្តាហ៍មុន ដែលថា ការលាតត្រដាងកាលពីពេលថ្មីៗនេះ កំពុងធ្វើឲ្យរង្គោះរង្គើដល់ការជឿទុកចិត្តរបស់ក្រុមអ្នកវិនិយោគ នៅពេលដែលតម្លៃប្រាក់បំណុលរបស់អេស្ប៉ាញបានកើនឡើង បន្ទាប់ពីស្ថេរភាពល្អបង្គួរក្នុងរយៈពេលជាច្រើនខែកន្លងមកនេះ។ បរាជ័យណាមួយរបស់អេស្ប៉ាញអាចបង្កឱ្យមានការប៉ះទង្គិចនៅទូទាំងតំបន់ដែលប្រើប្រាស់ប្រាក់អឺរ៉ូ។ Caroline Arbour រាយការណ៍សម្រាប់វីអូអេ ពីទីក្រុង ស៊ីវីល (Seville) ។
នៅពេលដែលកាសែតអេស្ប៉ាញ អែល ប៉ែស (El País) បានបោះពុម្ពផ្សាយបញ្ជីគណនេយ្យចេញចូលដែលសរសេរដោយដៃ កាលពីពីរសប្តាហ៍មុន ដែលបានបង្ហាញថា គណបក្សគ្រប់គ្រងអំណាច Partido Popular បានប្រតិបត្តិការមូលនិធិប្រកបដោយភាពមិនស្អាតស្អំអស់រយៈពេលជាច្រើនឆ្នាំ ដោយបានផ្តល់ផលប្រយោជន៍ដល់ក្រុមមន្ត្រីជាន់ខ្ពស់របស់បក្ស ដូចជាលោកនាយករដ្ឋមន្ត្រី ម៉ារីយ៉ាណូ រ៉ាជយ (Mariano Rajoy)។ គណបក្សនេះបានវាយបកមកវិញ ដោយបានចោទសួរអំពីយថាភាពនៃបញ្ជីនេះ។
នៅក្នុងសប្តាហ៍នេះ កាសែត អែល ប៉ែស បានរាយការណ៍ថា អ្នកជំនាញខាងពិនិត្យអក្សរសរសេរដោយដៃបានបញ្ជាក់ថា ឯកសារនេះមានភាពពិតប្រាកដ ហើយគ្មានសញ្ញាណណាមួយបញ្ជាក់ពីការកែច្នៃនោះទេ។
បន្ថែមពីនេះទៀត មានការលាតត្រដាងដែលថា គណបក្សនេះបានបន្តរហូតដល់ខែធ្នូរ ដើម្បីធ្វើការបង់ប្រាក់បំណាច់ការងារទៅឱ្យមនុស្សម្នាក់ ដែលស្ថិតនៅចំកណ្តាលនៃរឿងអាស្រូវនេះ គឺអតីតហិរញ្ញិករបស់គណបក្សនេះ។
ប្រការនេះហើយ ទើបសូម្បីតែ លោក ឡូវីស បាសេណាស (Luis Bárcenas) ក៏ស្ថិតនៅក្រោមការស៊ើបអង្កេតដែរ ចាប់តាំងពីឆ្នាំ២០០៩មកម៉្លេះ។
វាគ្រាន់តែជារឿងរ៉ាវមួយថ្មីបំផុត ក្នុងចំណោមការចោទប្រកាន់អំពីអំពើពុករលួយយ៉ាងច្រើន ដែលបានក្លាយជាចំណងជើងសារព័ត៌មាននៅក្នុងប្រទេសអេស្ប៉ាញ នៅក្នុងរយៈពេលប៉ុន្មានខែថ្មីៗនេះ ដោយបានធ្វើឱ្យវិធានការរឹតបន្តឹងផ្នែកសេដ្ឋកិច្ចក្លាយទៅជាគ្រាប់ថ្នាំយ៉ាងល្វីងដែលពិបាកនឹងលេបណាស់សម្រាប់ប្រជាពលរដ្ឋអេស្ប៉ាញ។
លោក ជីសើស លីហ្សកាណូ (Jesús Lizcano) ជាប្រធាននៃអង្គការតម្លាភាពអន្តរជាតិរបស់អេស្ប៉ាញ និងជាសាស្ត្រាចារ្យផ្នែកសេដ្ឋកិច្ចនៅឯសាកលវិទ្យាល័យស្វ័យភាពម៉ាឌ្រីត (Autonomous University of Madrid)។
លោកថ្លែងថា រឿងអាស្រូវក្នុងអំពើពុករលួយពិតជាបានប៉ះពាល់ដល់មុខមាត់របស់អេស្ប៉ាញ និងមិនបានជួយដល់ការទាក់ទាញមូលធនបរទេសឡើយ។
ប៉ុន្តែលោក លីហ្សកាណូ ជឿជាក់ថា ឥទ្ធិពលជារួមទៅលើទំនុកចិត្តរបស់ក្រុមអ្នកវិនិយោគនឹងមានកម្រិត។
លោកបានកត់សម្គាល់ឃើញថា នៅក្នុងតារាងបញ្ជីអំពើពុករលួយចុងក្រោយបំផុតរបស់អង្គការតម្លាភាពអន្តរជាតិ ប្រទេសអេស្ប៉ាញស្ថិតក្នុងលេខរៀងទី៣០ នៅក្នុងចំណោម១៧៦ប្រទេស។
លោកថ្លែងថា លេខរៀងនេះមិនអាក្រក់ពេកនោះទេ ទោះបីជានៅមានចំណុចដែលត្រូវកែលម្អក៏ដោយ។
ទោះជាយ៉ាងនេះក្តី ក្រុមអ្នកវិភាគទីផ្សារមួយចំនួនបានទស្សទាយមើលពីពេលវេលាដ៏លំបាកនៅពេលខាងមុខ។
ព័ត៌មានស្តីពីរឿងរ៉ាវរបស់ បាសេណាស បានបង្កឲ្យតម្លៃប្រាក់បំណុលរបស់អេស្ប៉ាញកើនឡើងបន្តិចកាលពីសប្តាហ៍មុន។
តម្លៃប័ណ្ណភាគហ៊ុនបន្តស្ថិតនៅក្នុងកម្រិតទាបនៅឡើយ ប៉ុន្តែ លោក ចូ រ៉ាន់ឌល (Joe Rundle) ប្រធានពាណិជ្ជកម្មរបស់មូលធន ETX នៅទីក្រុង ឡុងដ៍ (London) ថ្លែងថា តម្លៃនេះអាចឡើងដល់កម្រិតធ្ងន់ធ្ងរមួយ។
លោកនិយាយថា វិបត្តិក្នុងតំបន់ដែលប្រើប្រាស់ប្រាក់អឺរ៉ូ នៅមិនទាន់បញ្ចប់ទេ ហើយក្រុមអ្នកវិនិយោគអាចដាក់សម្ពាធទៅលើធនាគារកណ្តាលអឺរ៉ុប ដើម្បីចាត់វិធានការឲ្យបានច្បាស់លាស់ ដើម្បីបញ្ចប់វិបត្តិនេះ ជាមួយនឹងផែនការសង្គ្រោះ។
«ខ្ញុំគិតថា ហានិភ័យណាមួយ ទោះបីជាហានិភ័យខាងនយោបាយ ឬការធ្លាក់ចុះថែមទៀតផ្នែកសេដ្ឋកិច្ច នឹងធ្វើឲ្យទីផ្សារមានកម្លាំងជំរុញទៅដល់លទ្ធផលនេះដល់ទៅ៦ភាគរយ ដើម្បីពិនិត្យមើលថាតើមានតម្រូវការណាមួយសម្រាប់លោក ដ្រាហ្គី (Draghi) និងធនាគារកណ្តាលអឺរ៉ុប (ECB) ក្នុងការពិនិត្យមើលបញ្ហានេះពិតប្រាកដ។»
លោក រ៉ាន់ឌល និយាយថា កម្មវិធីជួយសង្គ្រាះនឹងមានផលវិបាក«យ៉ាងធំធេង»។
«ប្រទេសបារាំងពិតជាមិនស្ថិតនៅក្នុងជំហរមួយ ក្នុងការជួយសង្គ្រោះនោះទេ ហើយវានឹងធ្លាក់ទៅលើប្រទេសអាល្លឺម៉ង់ ក្នុងការសម្រេចចិត្តថាតើតំបន់ប្រើប្រាស់ប្រាក់អឺរ៉ូ នឹងមានរូបរាងយ៉ាងម៉េច នៅប៉ុន្មានឆ្នាំខាងមុខនេះ»។
ការជួយសង្គ្រោះប្រហែលជាអ្វីដែលទីផ្សារត្រូវការ ប៉ុន្តែវាមិនមែនជាអ្វីដែលទាំងប្រទេសអេស្ប៉ាញ និងអាល្លឺម៉ង់ចង់បាននោះទេ ហើយសម្លេងនៅក្នុងកិច្ចប្រជុំរវាងលោកនាយករដ្ឋមន្ត្រីអេស្ប៉ាញ រ៉ាជយ និងអក្នស្រីអធិការបតីអាល្លឺម៉ង់ អាន់ជឺឡា ម៉ាកែល (Angela Markel) កាលពីសប្តាហ៍មុន មានភាពវិជ្ជមាន។
កន្លងមក ប្រទេស អេស្ប៉ាញ កំពុងធ្វើការដើម្បីកែលម្អភាពជឿទុកចិត្តរបស់ខ្លួនឡើងវិញ។
រដ្ឋាភិបាលបានដាក់ស្នើច្បាប់តម្លាភាពកាលពីរដូវស្លឹកឈើជ្រុះមុន។
ហើយនៅក្នុងសប្តាហ៍នេះ លោកនាយករដ្ឋមន្ត្រី រ៉ាជយ បានបញ្ជាក់ថា ច្បាប់នេះនឹងមិនត្រឹមតែអនុវត្តចំពោះស្ថាប័នសាធារណប៉ុណ្ណោះទេ ប៉ុន្តែថែមទាំងសម្រាប់គណបក្សនយោបាយថែមទៀតផង។
ក្រុមអ្នករិះគន់បានអះអាងថា ច្បាប់នេះមានការពិបាកនៅក្នុងការអនុវត្តណាស់ ប៉ុន្តែថា ជាមួយនឹងការធ្វើវិសោធនកម្មមួយចំនួន វានឹងក្លាយទៅជាការចាប់ផ្តើមមួយដ៏ល្អ៕
ប្រែសម្រួលដោយ លី សុខឃាង
