កិច្ចប្រតិបត្តិការនាវាចរនិងតាមអាកាសកើនឡើងកាលពីពេលថ្មីៗនេះរបស់ចិននៅជិតប្រទេសហ្វីលីពីន ជប៉ុននិងកោះតៃវ៉ាន់ជាផ្នែកមួយនៃការប៉ុនប៉ងរបស់រដ្ឋាភិបាលក្រុងប៉េកាំងដើម្បីស្ទង់ស្ទាបការតាំងចិត្តរបស់សហរដ្ឋអាមេរិកដើម្បីគាំទ្រសម្ព័ន្ធមិត្តនៅក្នុងតំបន់ឥណ្ឌូប៉ាស៊ីហ្វិក។ នេះបើតាមពួកអ្នកវិភាគ។ ពួកគេបានកត់សម្គាល់ថាសកម្មភាពដែលបានកើនឡើងកើតមានឡើងនៅពេលដែលរដ្ឋាភិបាលក្រុងតូក្យូនិងក្រុងវ៉ាស៊ីនតោនប្រុងប្រៀបការបោះឆ្នោតក្នុងប៉ុន្មានសប្តាហ៍ខាងមុខនេះ។
លោក Stephen Nagy ជាអ្នកជំនាញខាងសន្តិសុខក្នុងតំបន់នៅឯសាកលវិទ្យាល័យ International Christian ក្នុងប្រទេសជប៉ុនបាននិយាយថា«ចិនមើលឃើញឱកាសដើម្បីសាកល្បងការតាំងចិត្តរបស់សហរដ្ឋអាមេរិកដល់តំបន់ដ៏ធំនេះ។ ដូច្នេះ ការណ៍នេះកំពុងបញ្ជូនសញ្ញាមួយដល់រដ្ឋាភិបាលក្រុងវ៉ាស៊ីនតោនថាតើពួកគេព្យាយាមដើម្បីវិនិយោគច្រើនថែមទៀតក្នុងប្រទេសហ្វីលីពីននិងទំនាក់ទំនងផ្សេងទៀតនៅក្នុងសមុទ្រចិនខាងត្បូងឬទេ រដ្ឋាភិបាលក្រុងប៉េកាំង នឹងព្យាយាមដើម្បីធ្វើឱ្យសន្តិសុខរបស់ពួកគេកាន់តែស្មុគ្រស្មាញនិងសមត្ថភាពរបស់ពួកគេដើម្បីរៀបចំចាត់ចែងបញ្ហាជាច្រើននៅពេលតែមួយ»។
នាវាឆ្មាំការពារដែនសមុទ្រចិននិងហ្វីលីពីនបានបុកគ្នាយ៉ាងហោចណាស់ក៏២ដងដែរចាប់តាំងពីខែមុននៅជិតប្រជុំកោះ Sabina Shoal ក្នុងសមុទ្រចិនខាងត្បូង។ Sabina Shoal លាតសន្ធឹងនៅក្នុងតំបន់សេដ្ឋកិច្ចផ្តាច់មុខរបស់ហ្វីលីពីនឬ EEZ ក៏ប៉ុន្តែ រដ្ឋាភិបាលក្រុងប៉េកាំងនិយាយថាតំបន់ថ្មប៉ប្រះទឹកដែលលិចក្នុងទឹកជាផ្នែកមួយនៃទឹកដីរបស់ខ្លួន។
ការប៉ះទង្គិចគ្នានៅពេលថ្មីៗបំផុតនេះបានកើតឡើងភ្លាមៗកាលពីរសៀលថ្ងៃសៅរ៍ ទី៣១ ខែសីហាកន្លងទៅ។ វីដេអូដែលបានចេញផ្សាយដោយបណ្តាញទូរទស្សន៍រដ្ឋចិន CCTV និងឆ្មាំការពារដែនសមុទ្រហ្វីលីពីនបានបង្ហាញថានាវាឆ្មាំការពារដែនសមុទ្រចិនបានបើកបុកនាវាហ្វីលីពីន។ ភាគីនិមួយៗបានចោទប្រកាន់គ្នា«ពីការមានចេតនា»ដែលបណ្តាលឱ្យមានការបុកគ្នានេះ។
ក្នុងខណៈនោះដែរ ក្រសួងការពារជាតិជប៉ុនបាននិយាយថាយន្តហោះយោធាចិនមួយគ្រឿងបានរំលោភដែនអាកាសរបស់ជប៉ុនជាលើកដំបូងនៅថ្ងៃទី២៦ ខែសីហាហើយនាវាស្ទង់មួយគ្រឿងរបស់ចិនបានទន្ទ្រានចូលក្នុងផ្ទៃទឹកភាគនិរតីរបស់ជប៉ុនកាលពីថ្ងៃទី៣១ ខែសីហាកន្លងមកនេះ៕
វេទិកាបញ្ចេញមតិ