របាយការណ៍ស្រាវជ្រាវថ្មីមួយបានរកឃើញថាមានកុមារកម្ពុជាជាងពាក់កណ្ដាលធ្លាប់ទទួលរងអំពើហិង្សាយ៉ាងហោចណាស់មួយទម្រង់នៅមុនពេលដែលពួកគេមានអាយុ១៨ឆ្នាំ។ ហើយមានកុមារកម្ពុជាប្រមាណជាមួយភាគបួនទទួលរងការរំលោភបំពានផ្លូវចិត្ដ និង៥ភាគរយ ទទួលរងការរំលោភបំពានផ្លូវភេទមុនអាយុ១៨ឆ្នាំ។
របាយការណ៍នេះរៀបចំឡើងដោយរាជរដ្ឋាភិបាលកម្ពុជាក្រោមជំនួយរបស់អង្គការសហប្រជាជាតិនិងសហរដ្ឋអាមេរិកហើយត្រូវបានចេញផ្សាយនៅថ្ងៃពុធនេះបន្ទាប់ពីធ្វើការស្រាវជ្រាវក្នុងឆ្នាំ២០១៣។
ការស្រាវជ្រាវផ្តោតលើកុមារនិងមនុស្សវ័យក្មេង ដែលមានអាយុពី១៣ ដល់២៤ឆ្នាំ ចំនួន ២.៣៧៦នាក់មកពីទូទាំងប្រទេសដោយស្នើឱ្យពួកគេប្រាប់ពីបទពិសោធអំពើហិង្សាផ្លូវកាយ ផ្លូវចិត្ដ និងផ្លូវភេទដែលពួកគេធ្លាប់ជួបប្រទះមុនអាយុ១៨ឆ្នាំ។
ការអង្កេតលើអំពើហិង្សាលើកុមារនៅកម្ពុជាបានបង្ហាញថា ជាធម្មតា កុមារទទួលរងការរំលោភបំពានលើផ្លូវកាយពីមនុស្សដែលពួកគេស្គាល់និងជឿទុកចិត្ដ ពោលគឺឪពុកម្ដាយ (ជាពិសេសម្ដាយ) និងគ្រូបង្រៀន (ជាពិសេសគ្រូប្រុស) តែម្ដង។ អ្នកជិតខាង មិត្ដភក្ដិ គូកំណាន់ និងសមាជិកគ្រួសារ ត្រូវបានរកឃើញថាជាអ្នកដែលប្រព្រឹត្ដការរំលោភបំពានផ្លូវភេទញឹកញាប់ជាងគេលើកុមារ - ពោលគឺមិនមែនជាជនចម្លែកដែលកុមារមិនស្គាល់នោះទេ។
តំណាងពិសេសរបស់អគ្គលេខាធិការអង្គការសហប្រជាជាតិទទួលបន្ទុកអំពើហិង្សាលើកុមារ លោកស្រី ម៉ាតា សានតូប៉េស បានបញ្ជាក់នៅក្នុងសេចក្តីប្រកាសព័ត៌មានថា៖ «ការលុបបំបាត់រាល់ទម្រង់នៃអំពើហិង្សាលើកុមារ ត្រូវតែជាសូចនាករស្នូលមួយនៃការលើកកម្ពស់សេវាសង្គមរបស់ជាតិ។ សូចនាករនេះគួរតែជាព័ត៌មានយោង សម្រាប់គ្រប់វិស័យទាំងអស់របស់រដ្ឋាភិបាល សម្រាប់ការរៀបចំថវិកាផង និងយន្ដការសម្របសម្រួលដែលពាក់ព័ន្ធ ដោយមានការដាក់ចេញនូវផែនការ ពិនិត្យតាមដាន និងវាយតម្លៃច្បាស់លាស់ ដើម្បីវាយតម្លៃវឌ្ឍនភាព និងរក្សានូវជោគជ័យដែលសម្រេចបានកន្លងមក»៕
