អគ្គនាយកដ្ឋានអន្តោប្រវេសន៍នឹងដាក់ឱ្យដំណើរការប្រព័ន្ធអេឡិចត្រូនិកសលាកបត្រចូលប្រទេសកម្ពុជាជាផ្លូវការនៅដើមខែកញ្ញានេះ សម្រាប់ភ្ញៀវទេសចរដែលមកទស្សនាប្រទេសកម្ពុជា។
ប្រព័ន្ធអេឡិចត្រូនិកសលាកបត្រចូលប្រទេសកម្ពុជា ឬ Cambodia e-Arrival ត្រូវបានរៀបចំឡើងដោយអគ្គនាយកដ្ឋានអន្តោប្រវេសន៍នៃក្រសួងមហាផ្ទៃ ជាមួយកិច្ចសហការជាមួយក្រសួងស្ថាប័នពាក់ព័ន្ធរួមមានអគ្គនាយកដ្ឋានគយ និងរដ្ឋាករកម្ពុជា និងអគ្គនាយកដ្ឋានបច្ចេកទេសសុខាភិបាល ដើម្បីរួមចំណែកទាក់ទាញភ្ញៀវទេសចរ វិនិយោគិន និងពង្រឹងសន្តិសុខ ក្នុងបរិបទឌីជីថល ដូចបានកំណត់ក្នុងយុទ្ធសាស្រ្តបញ្ចកោណរបស់រដ្ឋាភិបាលនីតិកាលទី៧ និងស្របតាមបរិបទនៃពិភពលោកដែលកំពុងមានភាពរីកចម្រើនផ្នែកបច្ចេកវិទ្យា។
ថ្លែងក្នុងសិក្ខាសាលាផ្សព្វផ្សាយអំពីការប្រើប្រាស់ប្រព័ន្ធ Cambodia e-Arrival កាលពីថ្ងៃទី៩ ខែសីហា ឆ្នាំ២០២៤ លោក ស សុខា រដ្ឋមន្រ្តីក្រសួងមហាផ្ទៃលើកឡើងថា ការបង្កើតប្រព័ន្ធ Cambodia e-Arrival នេះ អាចឆ្លើយតបបានទៅនឹងការវិវឌ្ឍផ្នែកបច្ចេកវិទ្យា ក្នុងដំណាក់កាលដែលរដ្ឋាភិបាលកំពុងយកចិត្តទុកដាក់ទាក់ទាញភ្ញៀវទេសចរ វិនិយោគិន និងធុរជនបរទេសឱ្យចូលមកទស្សនា និងធ្វើធុរកិច្ច ព្រមទាំងផ្តល់ភាពងាយស្រួលសម្រាប់ការគ្រប់គ្រងកិច្ចការសន្តិសុខ និងការគ្រប់គ្រងទិន្នន័យជនបរទេសនៅកម្ពុជា។
បើតាមសារដែលបង្ហោះក្នុងគេហទំព័ររបស់ក្រសួងមហាផ្ទៃ ក្រសួងបានដាក់ឱ្យអនុវត្តសាកល្បងប្រព័ន្ធ Cambodia e-Arrival ជាបណ្ដើរៗនៅអាកាសយានដ្ឋានអន្តរជាតិភ្នំពេញ សៀមរាបអង្គរ និងខេត្តព្រះសីហនុ ចាប់ពីថ្ងៃទី១ ខែមករា ដល់ថ្ងៃទី៣០ ខែមិថុនា ឆ្នាំ២០២៤ និងគ្រោងដាក់ឱ្យដំណើរការជាផ្លូវការនៅតាមបណ្ដាច្រកទ្វារអាកាសយានដ្ឋានទាំង៣នេះ នៅអំឡុងខែកញ្ញា ឆ្នាំ២០២៤ មុននឹងដាក់ឱ្យអនុវត្តតាមបណ្ដាច្រកទ្វារព្រំដែនអន្តរជាតិ និងច្រកទ្វារទ្វេភាគីផ្សេងទៀត។
វីអូអេមិនអាចសុំការអត្ថាធិប្បាយពីលោក សុខ សុមោនា អគ្គនាយករង និងជាអ្នកនាំពាក្យអគ្គនាយកដ្ឋានអន្តោប្រវេសន៍ និងអ្នកស្រី ឆាយ ស៊ីវលីន ប្រធានសមាគមទេសចរណ៍កម្ពុជា បានទេ។
ថ្លែងក្នុងពិធីសំណេះសំណាល និងពិសាភោជនាហារសាមគ្គីនៃមហាគ្រួសារសមាគមឧកញ៉ាកម្ពុជា និងសមាគមអ្នកអភិវឌ្ឍន៍លំនៅឋានកម្ពុជា លោកនាយករដ្ឋមន្រ្តី ហ៊ុន ម៉ាណែត លើកឡើងថា កម្ពុជាបានវិវត្តខ្លួនជាមួយនឹងបច្ចេកវិទ្យា ដែលនឹងដាក់ឱ្យប្រើប្រាស់ប្រព័ន្ធអេឡិចត្រូនិកសលាកបត្រចូលប្រទេសកម្ពុជា ឬហៅថា Cambodia e-Arrival ដើម្បីសម្រួលដល់ការមកដល់របស់ភ្ញៀវទេសចរចូលមកកាន់កម្ពុជា ដោយពុំចាំបាច់ចំណាយពេលបំពេញព័ត៌មានលើក្រដាសទៀតឡើយ។
លោកថ្លែងថា៖ «ឥឡូវយើងបានឯកភាព ហើយរៀបចំចេញជាប្រព័ន្ធអេឡិចត្រូនិចទាំងអស់ អ៊ីចឹងគាត់ចុះមក គាត់អាចទៅស្កេន គាត់ទៅស្កេនប៉ាស្ព័រគាត់។ មិនបាច់បំពេញទេឥឡូវ ទោះបីកន្លែងខ្លះគេមានប្រព័ន្ធអេឡិចត្រូនិចក៏ដោយ ប៉ុន្តែនៅអង្គុយវាយ[អក្សរ]មួយៗ តែឥឡូវនេះម្សិលម្ងៃខ្ញុំជាមួយឯកឧត្តម ជា វណ្ណដេត និងឯកឧត្តម សុខ វាសនា គាត់ថា ធ្វើបាន យកតែប៉ាស្ព័រមកស្កេន គឺព័ត៌មានហ្នឹងវារត់ចូលប្រព័ន្ធអេឡិចត្រូនិចតែម្តង ដោយមិនចាំបាច់អង្គុយវាយនាំតែយូរ»។
លោកបញ្ជាក់ទៀតថា រាល់ការបំពេញទម្រង់បែបបទចូលកម្ពុជា និងការបង់ប្រាក់ ឬពន្ធណាមួយរបស់ភ្ញៀវទេសចរនឹងត្រូវប្រើប្រាស់តាមប្រព័ន្ធអនឡាញទាំងអស់។
ក្នុងរយៈពេល៦ខែ នៃដើមឆ្នាំ២០២៤ ភ្ញៀវទេសចរអន្តរជាតិសរុបប្រមាណជា២លាន៦សែននាក់ បានមកទស្សនាប្រទេសកម្ពុជា ដែលចំនួននេះបានកើនឡើង២២%ធៀបនឹងឆ្នាំ២០២៣។ នេះបើតាមទិន្នន័យរបស់ក្រសួងទេសចរណ៍។
គ្រឹះស្ថានអង្គរដែលទទួលបន្ទុកក្នុងការស្រង់ស្ថិតិទេសចរ និងកត់ត្រាចំណូលដែលបានពីការលក់សំបុត្រចូលទស្សនារមណីយដ្ឋានអង្គរ បានឱ្យដឹងថា ក្នុងរយៈពេល៦ខែនៃឆ្នាំ ២០២៤ មានទេសចរចំនួនជាង ៥២ ម៉ឺននាក់ បានចូលមកទស្សនារមណីយដ្ឋានវប្បធម៌មួយនេះ។ ចំនួននេះកើនជាង ៣៥ ភាគរយ ធៀបនឹងរយៈពេលដូចគ្នានៅឆ្នាំ២០២៣ ហើយទទួលបានចំណូលជាង ២៤ លានដុល្លារ កើនជាង ៣៦ ភាគរយ ធៀបនឹងរយៈពេលដូចគ្នាកាលពីឆ្នាំមុន។
ជាមួយគ្នានោះ បើតាមមន្ត្រីជាន់ខ្ពស់នៃក្រសួងទេសចរណ៍ កម្ពុជារំពឹងថា ភ្ញៀវទេសចរអន្តរជាតិចំនួន៥លាននាក់នឹងធ្វើដំណើរមកកម្ពុជានៅឆ្នាំ២០២៥ ហើយចំនួនភ្ញៀវទេសចរអាចនឹងត្រឡប់មកវិញ ដូចមុនពេលមានជំងឺរាតត្បាតកូវីដ១៩។ យោងតាមចក្ខុវិស័យរបស់ក្រសួងទេសចរណ៍ ប្រហែលជាមិនដល់ឆ្នាំ២០២៨ កម្ពុជាអាចទទួលបានភ្ញៀវទេសចរអន្តរជាតិប្រមាណ ៨ លាននាក់ក្នុងមួយឆ្នាំ៕
វេទិកាបញ្ចេញមតិ