ក្រសួងពាណិជ្ជកម្មបានលើកឡើងថា រដ្ឋាភិបាលកម្ពុជាតែងតែប្រកាន់ខ្ជាប់នូវការដាក់ទណ្ឌកម្មទៅលើប្រទេសកូរ៉េខាងជើង ពាក់ព័ន្ធនឹងពាណិជ្ជកម្មរបស់ជនជាតិនេះក្នុងប្រទេសកម្ពុជា។
ការលើកឡើងនេះជាការឆ្លើយតបនឹងការចុះផ្សាយរបស់សារព័ត៌មានមួយ ដែលលើកឡើងថា មានក្រុមហ៊ុនកូរ៉េខាងជើងកំពុងផ្សាយពាណិជ្ជកម្មដោយបើកចំហអំពីការគ្រប់គ្រងរបស់ខ្លួនលើភោជនីយដ្ឋានបណ្តាក់ទុនរួមគ្នានៅក្រៅប្រទេស ដោយមានទីតាំងនៅប្រទេសចិន និងនៅកម្ពុជា។ នេះបើតាមសេចក្តីប្រកាសព័ត៌មានរបស់ក្រសួងពាណិជ្ជកម្ម ចុះថ្ងៃទី ២៧ ខែកុម្ភៈ។
ក្រសួងពាណិជ្ជកម្មបានបដិសេធចោលទាំងស្រុងចំពោះព័ត៌មាន ដែលបានចុះផ្សាយដោយសារព័ត៌មានឈ្មោះ NK News ដែលជាគេហទំព័រព័ត៌មានរបស់អាមេរិក ដែលនិយាយអំពីកូរ៉េខាងជើង ហើយក្រសួងបញ្ជាក់ថា ពុំមានការចុះបញ្ជីពាណិជ្ជកម្មឱ្យក្រុមហ៊ុនដែលមានឈ្មោះ Tongnam Trading Company ឬក្រុមហ៊ុន Tongnam Transport JV Co. Ltd នោះទេ។
សេចក្តីប្រកាសព័ត៌មានបញ្ជាក់ថា៖ «ក្រសួងពាណិជ្ជកម្មតែងតែអនុវត្តយ៉ាងហ្មត់ចត់តាមសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ (UNSC) និងលិខិតបទដ្ឋានគតិយុត្តជាធរមានរបស់កម្ពុជា ដោយបានលុបចេញពីបញ្ជីពាណិជ្ជកម្មនិងបទគ្រប់អាជីវកម្ម ដែលពាក់ព័ន្ធធុរជនកូរ៉េខាងជើងចំនួន ១៦ ក្រុមហ៊ុនសហគ្រាស នៅក្នុងឆ្នាំ ២០១៩ និងឆ្នាំ ២០២២ ហើយបានបន្តសហការយ៉ាងជិតស្និទ្ធជាមួយក្រសួងការបរទេសនិងសហប្រតិបត្តិការអន្តរជាតិ និងក្រសួងស្ថាប័នពាក់ព័ន្ធអនុវត្តនូវប្រភេទទណ្ឌកម្មផ្សេងៗ ដូចដែលមានចែងក្នុងសេចក្តីសម្រេចរបស់ UNSC»។
កាលពីឆ្នាំ ២០១៧ ក្រុមប្រឹក្សាសន្តិសុខអង្គការសហប្រជាជាតិបានសម្រេចដាក់ទណ្ឌកម្មទៅលើកូរ៉េខាងជើង ដោយតម្រូវឱ្យរដ្ឋជាសមាជិកបញ្ឈប់ប្រតិបត្តិការរកលុយរបស់ជនជាតិកូរ៉េខាងជើងនៅក្រៅប្រទេស។ កម្ពុជាបានបិទភោជនីយដ្ឋានកូរ៉េខាងជើងមួយចំនួន ដែលប្រតិបត្តិការនៅក្នុងប្រទេសដើម្បីគោរពតាមការដាក់ទណ្ឌកម្មអន្តរជាតិ។
សាស្ត្រាចារ្យវិទ្យាសាស្ត្រនយោបាយ លោក ឯម សុវណ្ណារ៉ា លើកឡើងថា កម្ពុជាត្រូវអនុវត្តតាមសេចក្តីសម្រេចរបស់អង្គការសហប្រជាជាតិឱ្យបានពេញលេញ ដោយហេតុថា កម្ពុជាត្រូវពឹងផ្អែកទាំងនយោបាយការបរទេស និងពាណិជ្ជកម្មលើសហគមន៍អន្តរជាតិ។
លោកថ្លែងថា៖ «ដូច្នេះទីផ្សារដែលកម្ពុជាពឹងអាស្រ័យហ្នឹង បើសិនកម្ពុជាមិនធ្វើតាមលំអាន ឬបទបញ្ញត្តិទណ្ឌកម្មអន្តរជាតិទេ យើងប្រឈមនឹងបញ្ហាច្រើនណាស់។ អ៊ីចឹងកម្ពុជាខ្ញុំគិតថា មិនជម្រើសយកបញ្ហាហ្នឹងទេ ហើយកម្ពុជាធ្វើបានច្រើនហើយ ប៉ុន្តែយើងគួរតែពង្រឹងឬក៏បញ្ជាក់បន្ថែមទៀតនូវបញ្ហាដែលយើងនូវខ្វះ ឬក៏ចន្លោះកន្លែងណា»។
គួរបញ្ជាក់ថា ប្រទេសកម្ពុជាមានទំនាក់ទំនងល្អជាយូរមកហើយជាមួយកូរ៉េខាងជើង ជាពិសេសក្នុងអំឡុងពេលសម្តេចព្រះរមរតនៈកោដ្ឋ នរោត្តម សីហនុ នៅមានព្រះជន្ម៕
វេទិកាបញ្ចេញមតិ