អ្នកតំណាងរាស្រ្តអង់គ្លេសមួយរូប បានស្នើឱ្យប៉ូលីសធ្វើការស៊ើបអង្កេតភស្តុតាង ដែលលោក ចេមស៍ មឺដកហ៍ (James Murdoch) បានផ្តល់ឱ្យសមាជិករដ្ឋសភាអង់គ្លេស កាលពីដើមសប្តាហ៍នេះ។ កាលពីថ្ងៃអង្គារ កូនប្រុសរបស់មហាសេដ្ឋីសារព័ត៌មាន លោក រ៉ូភឺត មឺដកហ៍ (Rupert Murdoch) បានឆ្លើយទៅនឹងសំណួរ អំពីរឿងអាស្រូវលួចចូលស្តាប់ទូរស័ព្ទ នៅក្នុងបណ្តាញសារព័ត៌មានអង់គ្លេសមួយដែលច្រើនតែរាយការណ៍បំផ្លើស។ ក៏ប៉ុន្តែភស្តុតាងរបស់លោក តាំងពីពេលនោះ មក មានភាពផ្ទុយគ្នា។
លោក ចេមស៍ មឺដកហ៍ (James Murdoch) ប្រហែលជាសង្ឃឹមថានឹងបានបញ្ជាក់អំពីតួនាទីរបស់លោកនៅក្នុងរឿងអាស្រូវលួចស្តាប់ទូរស័ព្ទ បន្ទាប់ពីបានផ្តល់សក្ខីកម្មជូនក្រុមអ្នកតំណាងរាស្រ្តអង់គ្លេសកាលពីថ្ងៃអង្គារ។ ប៉ុន្តែ ឥឡូវនេះ សក្ខីកម្មរបស់លោកមានការប្រឆាំងជំទាស់ ហើយអ្នកតំណាងរាស្រ្តអង់គ្លេសមួយរូបនិយាយថា នេះគឺជារឿងមួយសម្រាប់ឲ្យប៉ូលីសធ្វើការស៊ើបអង្កេត។
លោក ដេវីដ កាមឺរ៉ន (David Cameron) នាយករដ្ឋមន្រ្តីអង់គ្លេស បានមានប្រសាសន៍ថា ការបញ្ជាក់បំភ្លឺគឺត្រូវតែធ្វើជាចាំបាច់។
«ជាក់ច្បាស់ណាស់ លោក ចេមស៍ មឺដកហ៍ (James Murdoch) មានសំណួរដែលត្រូវឆ្លើយនៅក្នុងរដ្ឋសភា ហើយខ្ញុំប្រាកដណាស់ថា លោកមុខជានឹងធ្វើ។ ហើយជាក់ច្បាស់ណាស់ដែលថា បណ្តាញព័ត៌មានអន្តរជាតិ (News International) មានបញ្ហាធំៗមួយចំនួនដែលត្រូវដោះស្រាយ និងរឿងស្មុគស្មាញមួយដែលត្រូវសម្អាត»។
រឿងរ៉ាវដ៏វែងដែលកំពុងតែមានបន្ត ទាក់ទងទៅនឹងសារព័ត៌មានរបស់អង់គ្លេសដែលនិយមផ្សាយរឿងបំផ្លើសឈ្មោះ ‘ព័ត៌មានៃពិភពលោក’ (News of the World)។ សារព័ត៌មាននេះត្រូវបានបិទទ្វារកាលពីដើមខែនេះ បន្ទាប់ពីមានការចោទប្រកាន់ថា ក្រុមអ្នកកាសែតនៃសារព័ត៌មាននេះ បានលួចចូលស្តាប់សម្លេងសារទូរស័ព្ទដោយខុសច្បាប់។
នៅពេលដែលការចោទប្រកាន់បានលេចឡើងជាលើកដំបូង ក្រុមនាយកប្រតិបត្តិបាននិយាយថា ការលួចចូលស្តាប់ត្រូវបានធ្វើឡើងដោយអ្នកកាសែត «ដែលមានអាកប្បកិរិយាមិនល្អ»តែមួយរូប ប៉ុន្តែចាប់តាំងពីពេលនោះមក វាបានបង្ហាញថា ការលួចចូលស្តាប់ប្រហែលជាបានរីកសាយភាយ ហើយទូរស័ព្ទរបស់មនុស្សប្រមាណ៤ពាន់នាក់ត្រូវគេលួចស្តាប់។
លោក ចេមស៍ មឺដកហ៍ (James Murdoch) ដែលជាប្រធានសាជីវកម្មសារព័ត៌មាន (News Corporation) នៅក្នុងទ្វីបអឺរ៉ុប ត្រូវបានចោទសួរដោយសមាជិកសភារបស់អង់គ្លេសកាលពីថ្ងៃអង្គារ។
ពួកគេចង់ដឹងថា តើក្រុមនាយកប្រតិបត្តិបានដឹងអ្វីខ្លះអំពីទំហំនៃការលួចស្តាប់ទូរស័ព្ទ។ ពួកគេបានសួរលោក មឺដកហ៍ អំពីសារអ៊ីម៉ែលមួយ ដែលបានស្នើថា ការលួចស្តាប់ទូរស័ព្ទបានកើតឡើង មិនមែនត្រឹមតែអ្នកសារព័ត៌មានម្នាក់នោះទេ ហើយជាពិសេសថាតើលោកបានដឹងអំពីសារអ៊ីម៉ែលនោះដែរឬទេ នៅពេលដែលលោកបានចុះហត្ថលេខាទៅលើការអនុញ្ញាតឲ្យបង់ទឹកប្រាក់ដែលមានតូលេខចំនួន៦ខ្ទង់ ទៅឲ្យមនុស្សម្នាក់ដែលបានអះអាងថា ទូរស័ព្ទរបស់ខ្លួនត្រូវបានគេលួចស្តាប់។
លោក មឺដកហ៍ មានប្រសាសន៍ថា នៅពេលនោះលោកមិនបានដឹងអំពីអ៊ីម៉េលនោះទេ។
ប៉ុន្តែ ខូលីន ម៉ៃល័រ (Colin Myler) អតីតបណ្ណាធិការនៃកាសែតនេះ និង ថម គ្រោន (Tom Crone) ដែលជាអតីតប្រធានផ្នែកច្បាប់ បាននិយាយនៅក្នុងសេចក្តីថ្លែងការណ៍មួយថា លោក មឺដកហ៍ ពិតជាបានដឹងអំពីអ៊ីម៉ែលនោះ ថាពួកគេបានប្រាប់លោកអំពីរឿងនេះ។ លោក ថម វ៉ាត់សុន (Tom Watson) សមាជិកសភាមួយរូបពីគណបក្សការងារ បាននិយាយជាមួយទូរទស្សន៍ ប៊ីប៊ីស៊ី (BBC) អំពីសារៈសំខាន់នៃការរៀបរាប់បង្ហើបរឿងសម្ងាត់នេះ។
«ខ្ញុំគិតថា នេះគឺជាពេលវេលាដ៏មានសារៈសំខាន់បំផុត នៃការស៊ើបអង្កេតរយៈពេលពីរឆ្នាំទៅក្នុងរឿងលួចស្តាប់ទូរស័ព្ទ»។
លោកមានប្រសាសន៍ថា វាមិនច្បាស់លាស់ទេ ថាតើការពិតស្ថិតនៅទីណា។
ប៉ុន្តែ លោកមានប្រសាសន៍ថា ប្រសិនបើសេចក្តីថ្លែងការណ៍របស់បុរសទាំងពីរនាក់ជាពាក្យត្រឹមត្រូវមែន នេះមានន័យថា ចាប់តាំងពីដើមឆ្នាំ២០០៨មក លោក មឺដកហ៍ បានដឹងថា អ្នកផ្សេងទៀតមានការជាប់ពាក់ព័ន្ធនៅក្នុងរឿងលួចស្តាប់ទូរស័ព្ទ ហើយថាលោកមិនបានធ្វើអ្វីទាំងអស់ដើម្បីចាត់វិធានការលុបបំបាត់បញ្ហានេះ។
សំខាន់ជាងនេះទៅទៀត លោកមានប្រសាសន៍ថា នេះមានន័យថា លោក មឺដកហ៍ ប្រហែលជាបានធ្វើឱ្យខូចដល់លំនាំនៃយុត្តិធម៌ ដែលជាបទឧក្រិដ្ឋមួយនៅក្នុងប្រទេសអង់គ្លេស។
«ប្រសិនបើការបកស្រាយហេតុការណ៍របស់អ្នកទាំងពីរជារឿងត្រឹមត្រូវ វាមិនត្រឹមតែមានន័យថា សភាត្រូវបាននាំឱ្យយល់ខុសប៉ុណ្ណោះទេ។ វាមានន័យថា ប៉ូលីសមានការស៊ើបអង្កេតមួយទៀតដែលពួកគេត្រូវធ្វើ»។
លោក ចេមស៍ មឺដុហ៍ និយាយថា លោកនៅតែប្រកាន់ខ្ជាប់នូវជំហរនៃសក្ខីកម្ម ដែលលោកបានផ្តល់ជូនសភាកាលពីថ្ងៃអង្គារ៕
ប្រែសម្រួលដោយ ឌី ខាំបូលី
