ភារកិច្ចដ៏ពិបាករបស់លោកស្រីនាយករដ្ឋមន្ត្រីអង់គ្លេស Theresa May ក្នុងការនិយាយបញ្ចុះបញ្ចូលសភាឱ្យអនុម័តកិច្ចព្រមព្រៀងមួយស្តីពីការចាកចេញរបស់ប្រទេសអង់គ្លេសពីសហភាពអឺរ៉ុប(Brexit) បានជួបប្រទះបញ្ហានៅថ្ងៃព្រហស្បតិ៍នេះ នៅពេលដែលលោក Dominic Raab រដ្ឋមន្ត្រីទទួលបន្ទុកកិច្ចការ Brexit របស់លោកស្រីបានលាលែងចេញពីតំណែង។
នៅពេលដែលលោកចេញផ្សាយសេចក្តីថ្លែងការណ៍មួយគូសបញ្ជាក់ការជំទាស់របស់លោកដល់កិច្ចព្រមព្រៀងដែលលោកបានជួយធ្វើការចរចានោះ លោក Raab បាននិយាយថា «នៅក្នុងការមានសម្បជញ្ញៈល្អ ខ្ញុំមិនអាចគាំទ្រលក្ខខណ្ឌ ដែលបានត្រូវស្នើសម្រាប់កិច្ចព្រមព្រៀងរបស់យើងជាមួយសហភាពអឺរ៉ុបទេ»។
លោក Raab បានជំទាស់ជាពិសេសនឹងមាត្រាសំខាន់មួយសម្រាប់បង្កើតសហភាពគយមួយ ដែលនឹងលុបចោលសេចក្តីត្រូវការឱ្យមានព្រំដែនតឹងរ៉ឹងមួយរវាងអៀរឡង់ខាងជើង នៃចក្រភពអង់គ្លេស និងប្រទេសអៀរឡង់ ដែលជាសមាជិកនៃសហភាពអឺរ៉ុប នៅពេលដែលប្រទេសអង់គ្លេស និងសហភាពអឺរ៉ុបធ្វើការអំពីកិច្ចព្រមព្រៀងពាណិជ្ជកម្មថ្មីមួយ។
ប្រាក់ផោននៃប្រទេសអង់គ្លេសបានចុះថ្លៃខ្លាំង បើប្រៀបធៀបជាមួយប្រាក់ដុល្លារអាមេរិកាំងនៅក្រោយការចុះចេញពីតំណែងដោយលោក Raab។ លោកស្រី May បានទទួលការយល់ព្រមពីគណៈរដ្ឋមន្ត្រីរបស់លោកស្រីដល់កិច្ចព្រមព្រៀងនេះ នៅក្រោយការប្រជុំចំនួន ៥ម៉ោងកាលពីថ្ងៃពុធ ដែលលោកស្រីបានព៌ណនាថា «មានរយៈពេលយូរ ល្អិតល្អន់ និងមានភាពខ្លាំងក្លាផងដែរ»។ លោកស្រីបានមានប្រសាសន៍ថាលោកស្រីមានជំនឿថា កិច្ចព្រមព្រៀងនេះឋិតនៅក្នុងអត្ថប្រយោជន៍ល្អបំផុតរបស់ប្រទេសអ់គ្លេស៕
